L-infurzar tad-drittijiet tal-proprjetà intellettwali

PUNTI EWLENIN

Objettivi

L-għan ewlieni tad-direttiva huwa li jiġi żgurat li l-istess għodod ikunu disponibbli madwar l-UE għall-ħallieqa u l-innovaturi biex ikunu jistgħu jeżerċitaw id-drittijiet tal-proprjetà intellettwali tagħhom. Madankollu, minbarra l-indirizzar tal-iffalsifikar u l-piraterija, tgħin ukoll biex jintlaħqu għanijiet oħrajn li jinkludu:

• Il-promozzjoni tal-innovazzjoni u l-kompetittività tan-negozju — l-ikkastigar tal-iffalsifikar u l-piraterija b’mod effettiv, jista’ jgħin biex jiżgura l-fiduċja fis-suq uniku;
• is-salvagwardja tal-impjiegi fl-Ewropa — il-ħsara mġarrba min-negozji bħala riżultat tal-iffalsifikar u l-piraterija hija riflessa fin-numru ta’ impjiegi offruti;
• l-iżgurar tal-protezzjoni tal-konsumatur — il-konsumaturi huma deliberatament misruqin fir-rigward tal-kwalità li huma intitolati li jistennew minn prodott li jippreżenta riskji kemm għas-saħħa (eż. mediċini jew kożmetiċi foloz) u sigurtà (eż. ġugarelli jew apparat elettriku foloz) u ma jibbenefikawx minn garanzija, servizz ta’ wara l-bejgħ jew rimedju effettiv f’każ ta’ ħsara;
• l-iżgurar taż-żamma tal-ordni pubbliku — il-falsifikazzjoni u l-piraterija jiksru l-leġiżlazzjoni dwar ix-xogħol (impjieg klandestin), il-leġiżlazzjoni fiskali (telf ta’ dħul tal-gvern), il-leġiżlazzjoni dwar is-saħħa u l-leġiżlazzjoni dwar is-sikurezza tal-prodott.

Kamp ta’ applikazzjoni

Id-direttiva tapplika għal kwalunkwe ksur tad-drittijiet tal-proprjetà intellettwali previst mil-liġi tal-UE u/jew mil-liġi nazzjonali tal-pajjiż tal-UE kkonċernat.

Din id-direttiva ma taffettwax:

• ir-regoli tal-UE dwar l-infurzar tad-drittijiet li jikkonċernaw u huma relatati mad-dritt tal-awtur;
• regoli tal-UE li jirregolaw il-liġi sostantiva dwar il-proprjetà intellettwali (jiġifieri, il-liġi li tiddefinixxi d-drittijiet u l-obbligi fir-rigward tal-proprjetà intellettwali);
• l-obbligi internazzjonali tal-pajjiżi tal-UE u notevolment il-Ftehim dwar l-Aspetti tad-Drittijiet tal-Proprjetà Intellettwali Relatati mal-Kummerċ (magħruf bħala “l-Ftehim TRIPS”);
• kwalunkwe regola nazzjonali fil-pajjiżi tal-UE relatata ma’ proċeduri kriminali jew penali għall-ksur tal-IPRs.

Obbligu ġenerali

• Il-pajjiżi tal-UE għandhom jistabbilixxu l-miżuri, il-proċeduri u r-rimedji meħtieġa biex jiżguraw l-IPRs ta’ infurzar u jieħdu azzjoni xierqa kontra dawk responsabbli għall-iffalsifikar u l-piraterija.
• Dawk il-miżuri, proċeduri u rimedji għandhom ikunu effettivi, proporzjonati u dissważivi, iżda għandhom jevitaw li joħolqu ostakoli għall-kummerċ leġittimu u joffru salvagwardji kontra l-abbuż tagħhom.

Applikazzjoni għall-protezzjoni

Talba biex jiġu applikati miżuri ta’ protezzjoni tal-proprjetà intellettwali tista’ tiġi sottomessa minn:

• id-detenturi ta’ IPRs,
• il-persuni l-oħrajn kollha awtorizzati biex jużaw dawk id-drittijiet (pereżempju detenturi ta’ liċenzja) u korpi li jirrappreżentaw detenturi ta’ drittijiet ta’ proprjetà intellettwali (korpi kollettivi ta’ drittijiet ta’ proprjetà intellettwali u korpi ta’ difiża professjonali) skont il-liġi applikabbli.

Dritt ta’ informazzjoni

Fuq it-talba tal-pretendent, qorti tista’ tordna li l-informazzjoni tiġi pprovduta fuq l-oriġini tal-prodotti jew servizzi li huma maħsuba li jiksru IPR u fuq in-netwerks għad-distribuzzjoni jew il-forniment tagħhom, minn min jagħmel il-ksur jew minn kwalunkwe persuna oħra, jekk dik il-persuna:

• instabet fil-pussess tal-oġġetti li jikkontravjenu fuq skala kummerċjali;
• instabet li qed tuża s-servizzi kontraventorji fuq skala kummerċjali;
• instabet li qed tipprovdi fuq skala kummerċjali servizzi użati f’attivitajiet kontraventorji;
• kienet indikata bħala involuta fil-produzzjoni, il-manifattura jew id-distribuzzjoni tal-oġġetti jew servizzi li jiksru l-liġi.

Regoli dwar il-kisba u l-preservazzjoni tal-evidenza

Fuq talba tal-applikant, qorti tista’ tordna lill-parti li qed topponi biex tippreżenta evidenza li tinsab fil-kontroll tagħha, soġġetta għall-protezzjoni ta’ informazzjoni kunfidenzjali. Il-qorti tista’ wkoll toħroġ miżuri li jippermettu li tinżamm evidenza rilevanti fir-rigward tal-allegat ksur.

Miżuri provviżorji u ta’ prekawzjoni

Fuq talba tal-applikant, qorti tista’ toħroġ mandat interlokutorju¹ maħsuba biex:

• jipprevjenu kwalunkwe ksur imminenti ta’ IPR;
• jipprojbixxu, fuq bażi provviżorja, it-tkomplija tal-ksur allegat ta’ IPR;
• jagħmlu l-kontinwazzjoni tal-ksur allegat soġġett għall-preżentazzjoni ta’ garanziji maħsuba biex jiżguraw li d-detentur tad-dritt ikun ikkumpensat.

F’ċerti każijiet, l-awtoritajiet ġudizzjarji jistgħu jawtorizzaw is-sekwestru prekawzjonarju tal-proprjetà mobbli u immobbli tal-allegat persuna li wettqet il-ksur, inkluż l-imblukkar tal-kontijiet bankarji tiegħu/tagħha u assi oħra.

Miżuri li jirriżultaw minn deċiżjoni dwar il-każ

Fuq it-talba tal-applikant, qorti tista’ tordna miżuri korrettivi li jippermettu l-irtirar jew it-tneħħija tal-oġġetti li jikkontravjenu mis-suq jew il-qerda tagħhom.

Qorti tista’ wkoll toħroġ mandat permanenti li jipprevjeni l-ksur milli jkompli jew jagħti d-danni lill-parti danneġġjata.