X’INHU L-GĦAN TAD-DIRETTIVA?

Din tintroduċi regoli madwar l-UE biex jitnaqqsu l-emissjonijiet minn sistemi ta’ kondizzjonament tal-arja¹ tal-vetturi bil-muturu tipprevedi l-projbizzjoni gradwali ta’ sistemi ta’ kondizzjonament tal-arja ddisinjati biex ikun fihom gassijiet fluworurati b’potenzjal ta’ tisħin globali (GWP)² ogħla minn 150.
Għalhekk hija tevita kull ostakolu li jista’ jirriżulta, fis-suq intern tal-UE, mill-adozzjoni mill-pajjiżi tal-UE ta’ rekwiżiti tekniċi differenti dwar dan l-aspett.
Din tagħmel parti mill-proċedura tal-approvazzjoni tat-tip ta’ vetturi tal-UE.
Din tikkomplementa l-leġiżlazzjoni tal-UE biex jitnaqqsu l-gassijiet fluworurati b’effett ta’ serra f’konformità mal-għanijiet tal-Protokoll ta’ Kyoto.

PUNTI EWLENIN

Id-direttiva tistabbilixxi regoli għall-kontroll ta’ tnixxijiet minn sistemi ta’ kondizzjonament tal-arja mfassla biex jikkontjenu gassijiet b’effett ta’ serra b’GWP ogħla minn 150. Sistemi bħal dawn huma għalhekk ipprojbiti b’miżura tranżitorja, sakemm ir-rata ta’ tnixxija minn dik is-sistema ma teċċedix il-limiti massimi permissibbli. Din il-miżura tapplika għat-tipi ta’ vetturi ġodda kollha mill-21 ta’ Ġunju 2008 u għal vetturi ġodda mill-21 ta’ Ġunju 2009.
Bħala t-tieni stadju, din tintroduċi projbizzjoni totali fuq sistemi ta’ kondizzjonament tal-arja mfassla biex jikkontjenu gassijiet fluworurati b’effett ta’ serra b’GWP ogħla minn 150. Il-projbizzjoni tkopri t-tipi ta’ vetturi ġodda kollha mill-1 ta’ Jannar 2011 u tapplika għall-vetturi ġodda kollha mill-1 ta’ Jannar 2017.
Din tistipula wkoll regoli dwar ir-rikonfigurazzjoni u r-riforniment tas-sistemi ta’ kondizzjonament tal-arja.

Id-direttiva tkopri karozzi tal-passiġġieri (vetturi tal-kategorija M1) u vetturi kummerċjali ħfief (vetturi tal-kategorija N1, tal-klassi 1).
Din hija l-ewwel stadju ta’ pakkett leġiżlattiv dwar is-sistemi ta’ kondizzjonament tal-arja. Ir-Regolament (KE) Nru 706/2007 jistabbilixxi r-regoli amministrattivi dwar il-proċedura tal-approvazzjoni tat-tip tal-UE u dwar it-test armonizzat ta’ skoperta ta’ tnixxija sabiex titkejjel ir-rata ta’ tnixxija ta’ gassijiet fluworurati b’effett ta’ serra b’potenzjal ta’ tisħin globali ogħla minn 150.

Sistema ta’ kondizzjonament tal-arja: kwalunkwe sistema li l-għan prinċipali tagħha huwa li tnaqqas it-temperatura tal-arja u l-umdità tal-kompartiment tal-passiġġieri ta’ vettura.
Potenzjal ta’ tisħin globali (GWP): il-potenzjal ta’ tisħin klimatiku ta’ gass fluworurat b’effett ta’ serra relattiv għal dak tad-dijossidu tal-karbonju. Huwa kalkolat f’termini tal-potenzjal ta’ tisħin f’100 sena ta’ kilogramma ta’ gass meta mqabbla ma’ kilogramma ta’ CO₂. Il-figuri rilevanti tal-GWP huma dawk ippubblikati fit-tielet rapport ta’ valutazzjoni adottat mill-Grupp Intergovernattiv ta’ Esperti dwar it-Tibdil fil-Klima (il-valuri IPCC GWP tal-2001).