Id-direttiva dwar il-piżijiet u d-dimensjonijiet timmira biex ittejjeb il-funzjonament tas-suq intern tal-Unjoni Ewropea (UE) u biex tassigura l-moviment liberu tal-merkanzija fl-UE billi tiffissa limiti massimi għal vetturi tqal tal-merkanzija, karozzi tal-linja u kowċis li jġorru trasport internazzjonali fl-UE.
Din titlob li l-kumpaniji nazzjonali tat-trasport jissodisfaw l-istandards stabbiliti għat-trasport internazzjonali.
Id-direttiva ġiet emendata mid-Direttiva (UE) 2015/719, li timmira biex tagħmel il-vetturi tqal tal-merkanzija u l-karozzi tal-linja iktar ekoloġiċi u iktar siguri billi tawtorizza piżijiet u dimensjonijiet li, f’ċerti każi u taħt kundizzjonijiet speċifiċi, jaqbżu l-limiti mniżżla fid-Direttiva 96/53/KE.
PUNTI EWLENIN
Kamp ta’ applikazzjoni
Id-direttiva, kif emendata, tapplika għad-dimensjonijiet ta’:
vetturi tal-merkanzija u t-trejlers tagħhom li jiżnu aktar minn 3.5 tunnellati;
vetturi tal-passiġġieri li jġorru aktar minn disa’ persuni.
Din ma tapplikax għal karozzi tal-linja artikulati li jikkonsistu f’iktar minn sezzjoni waħda artikulata.
Id-Direttiva (UE) 2015/719 tippermetti żieda ta’ piż ta’ iktar minn tunnellata għal dawk bi fjuwil alternattiv1trakkijiet u karozzi tal-linja bi tliet fusijiet, biex jittieħed kont tal-piż meħtieġ għat-teknoloġija tal-fjuwil alternattiv.
Ir-Regolament (UE) 2019/1242 emenda d-direttiva biex jippermetti tunnellata addizzjonali għal emissjoni żero2 trakkijiet jew karozzi tal-linja artikulati bi tliet fusien (ara s-sommarju).
Hija żżid ukoll il-piż massimu ta’ karozzi tal-linja b’żewġ fusien b’1.5 tunnellati biex l-iżviluppi fit-trasport kollettiv tal-passiġġieri jitqiesu bħal, pereżempju l-piż medju miżjud tal-passiġġieri u tal-bagalji tagħhom, kif ukoll tat-tagħmir meħtieġ mir-regolamenti tas-sigurtà.
Traffiku internazzjonali
Huwa jiffissa l-limiti massimi fuq il-piżijiet u d-dimensjonijiet, flimkien ma’ ċertu karatteristiċi ta’ vetturi oħrajn definiti fl-annessi tad-direttiva.
L-ebda vettura li taqbeż il-limiti stabbiliti ma titħalla tuża t-toroq ta’ Stat Membru tal-UE, ħlief b’permessi speċjali.
Vetturi minn Stat Membru wieħed li jaqa’ fil-limiti stabbiliti jridu jitħallew jużaw it-toroq ta’ Stat Membru ieħor, bl-eċċezzjoni possibbli ta’ xi partijiet minn toroq jew strutturi limitati bħal villaġġi żgħar, postijiet ta’ interess speċjali jew pontijiet qodma fejn l-amministrazzjoni tista’ tistabbilixxi limiti aktar baxxi.
Traffiku nazzjonali
L-ebda vettura li taqbeż il-limiti stabbiliti fuq id-dimensjonijiet ma titħalla tuża t-toroq ta’ Stat Membru. Madankollu, hemm xi eċċezzjonijiet għal dawn il-limiti, inkluż għal:
it-tul ta’ vetturi b’karatteristiċi ajrudinamiċi ddisinjati sabiex iżidu l-effiċjenza fl-enerġija;
it-tul ta’ vetturi ddisinjati sabiex jittrasportaw oġġetti partikolari bħall-injam;
it-tul ta’ taħlita ta’ vetturi standard (vetturi bil-magna, trejlers u semi-trejlers magħqudin f’daqqa);
it-tul u l-piż ta’ vetturi li qed jittrasportaw kontejners fi trasport intermodali3.
L-Istati Membri jistgħu jħallu limiti ogħla fuq piżijiet għal trasport nazzjonali.
L-Istati Membri jistgħu wkoll jittestjaw teknoloġiji ġodda fuq vetturi fit-territorji tagħhom li jaqbżu l-limiti ffisati għal perjodu limitat.
Konformità
L-Istati Membri jridu jiżguraw li l-vetturi jkunu jistgħu juru li jikkonformaw mar-regoli, billi jipprovdu waħda minn dawn li ġejjin:
pjanċa tal-fabbrikant bi pjanċa addizzjonali li turi d-dimensjonijiet;
pjanċa singola li jkun fiha ż-żewġ indikazzjonijiet t’hawn fuq;
dokument maħruġ mill-Istat Membru fejn ġiet irreġistrata l-vettura, li jkun fih l-istess informazzjoni.
Iktar dettalji huma disponibbli fl-Anness III tad-direttiva.
L-infurzar tar-regoli
Il-gvernijiet nazzjonali jiddeċiedu kif jiġu infurzati r-regoli u liema pieni huma imposti jekk jinqabżu l-piżijiet massimi permissibbli. Minkejja dan, huma għandhom jimplimentaw miżuri speċifiċi biex isibu vetturi tqal fiċ-ċirkulazzjoni li x’aktarx jaqbżu dawk il-limiti bl-għajnuna ta’ sistemi awtomatiċi (sensuri fuq it-triq jew fuq tagħmir tal-użin abbord). Għandu jintbagħat rapport lill-Kummissjoni Ewropea kull sentejn li jistabbilixxi:
l-għadd ta’ verifiki mwettqa fis-sentejn preċedenti;
l-għadd ta’ vetturi jew taħlit ta’ vetturi mgħobbija żżejjed identifikati.
Ir-Regolament ta’ Implimentazzjoni (UE) 2019/1213 jistabbilixxi kundizzjonijiet uniformi għall-interoperabbiltà u l-kompatibbiltà ta’ tagħmir għall-użin abbord installat fuq vetturi jew fuq taħlit ta’ vetturi biex jassigura konformità mad-Direttiva 96/53/KE jew ir-rekwiżiti għall-piż massimu għat-traffiku nazzjonali ta’ Stat Membru fejn il-vettura qiegħda tintuża.
Ir-Regolament ta’ Implimentazzjoni (UE) 2019/1916 jistabbilixxi regoli dettaljati rigward l-użu ta’ tagħmir ajrudinamiku fuq wara (eż. flaps li jitneħħew jew jintwew imwaħħla fuq wara tat-trakkijiet jew tat-trejlers tagħhom).
Nota: att relatat mill-qrib, ir-Regolament (UE) 2019/1892, jistabbilixxi r-regoli rigward approvazzjoni tat-tip għal kabini elongati u għal apparat u tagħmir ajrudinamiku.
MINN META TAPPLIKA D-DIRETTIVA?
Id-Direttiva 96/53/KE ilha tapplika mis- u kellha ssir liġi fl-Istati Membri sas-.
Fjuwils alternattivi. Fjuwils jew sorsi ta’ enerġija li jservu, għall-inqas parzjalment, bħala sostituti għas-sorsi fossili taż-żejt fil-forniment tal-enerġija għat-trasport u li għandhom il-potenzjal li jikkontribwixxxu għad-dekarbonizzazzjoni tagħha u li jtejbu l-prestazzjoni ambjentali tas-settur ta’ trasport, li jikkonsisti fi:
Trakkijiet u karozzi tal-linja b’emissjoni żero. Vetturi tqal (trakkijiet u karozzi tal-linja) mingħajr magna ta’ kombustjoni interna jew b’magna ta’ kombustjoni interna li tarmi inqas minn 1gr CO2/kWh jew inqas minn 1 g CO2/km.
Transport intermodali. Trasport tal-merkanzija li jinvolvi taħlita ta’ trasport bit-triq b’ferrovija alternattiva u/jew bi trasport ibbażat fuq l-ilma, fejn il-merkanzija tkun trasportata fi ħdan unità ta’ tagħbija intermodali (kontejner jew kaxxa skambjabbli sa 45 pied) mingħajr ma l-merkanzija attwali tkun immaniġġjata bit-trażbord. L-użu ta’ dawn il-mezzi alternattivi għandu jkun għall-biċċa l-kbira tal-vjaġġ, filwaqt li l-użu tal-parti tat-trasport stradali għandu jkun limitat għal distanzi qosra fil-bidu u/jew fit-tmiem tal-vjaġġ.
DOCUMENT EWLIENI
Id-Direttiva tal-Kunsill 96/53/KE tal- li tistabbilixxi għal ċerti vetturi tat-triq li jiċċirkolaw fi ħdan il-Komunità d-dimensjonijiet massimi awtorizzati fit-traffiku nazzjonali u internazzjonali u l-piżijiet massimi awtorizzati fit-traffiku internazzjonali (ĠU L 235, , pp. 59–75).
Emendi sussegwenti għad-Direttiva 96/53/KE ġew inkorporati fid-dokument oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Ir-Regolament ta’ Implimentazzjoni tal-Kummissjoni (UE) 2019/1916 tal- li jistabbilixxi dispożizzjonijiet dettaljati dwar l-użu ta’ tagħmir ajrudinamiku ta’ wara skont id-Direttiva tal-Kunsill 96/53/KE (ĠU L 297, , pp. 3–4).
Ir-Regolament tal-Kummissjoni (UE) 2019/1892 tal- li jemenda r-Regolament (UE) Nru 1230/2012 fir-rigward tar-rekwiżiti tal-approvazzjoni tat-tip għal ċertu vetturi bil-mutur mgħammra b’kabini elongati u għal apparat u tagħmir ajrudinamiċi għal vetturi bil-mutur u t-trejlers tagħhom (ĠU L 291, , pp. 17–41).
Ir-Regolament ta’ Implimentazzjoni tal-Kummissjoni (UE) 2019/1213 tat- li jistabbilixxi dispożizzjonijiet dettaljati li jiżguraw kundizzjonijiet uniformi għall-implimentazzjoni tal-interoperabbiltà u tal-kompatibbiltà tat-tagħmir għall-użin abbord skont id-Direttiva tal-Kunsill 96/53/KE (ĠU L 192, , pp. 1–22).