Ir-rimi ta’ skart f’terraferma
SOMMARJU TA’:
Id-Direttiva 1999/31/KE dwar ir-rimi ta’ skart f’terraferma
X’INHU L-GĦAN TAD-DIRETTIVA?
- Hija għandha l-għan li tipprevjeni jew tnaqqas, kemm jista’ jkun, kwalunkwe impatt negattiv mit-terraferma fuq l-ilma tal-wiċċ, l-ilma ta’ taħt l-art, il-ħamrija, l-arja jew is-saħħa tal-bniedem.
- Hija tagħmel dan billi tintroduċi rekwiżiti tekniċi stretti.
PUNTI EWLENIN
- Is-siti tat-terraferma huma maqsuma fi 3 kategoriji:
- terraferma għal skart perikoluż;
- terraferma għal skart mhux perikoluż; u
- terraferma għal skart inert (skart li la jiddekomponi u lanqas jinħaraq, bħal żrar, ramel u ġebel).
- Il-pajjiżi tal-UE għandhom jimplimentaw strateġiji nazzjonali biex inaqqsu b’mod progressiv l-ammont ta’ skart bijodegradabbli li jintbagħat fit-terraferma.
- Il-faċilitajiet tat-terraferma ma jistgħux jaċċettaw tajers użati jew skart li jkun likwidu, li jista’ jieħu n-nar, splussiv jew korrużiv, jew li jkun ġej minn sptarijiet u minn prattiki mediċi u veterinarji.
- Fil-landfill jista’ jintrema biss skart li jkun ġie trattat.
- Skart muniċipali jista’ jmur f’terraferma għall-iskart mhux perikoluż.
- L-awtoritajiet nazzjonali għandhom jiżguraw li l-prezz li jitolbu l-operaturi għar-rimi tal-iskart ikun ikopri l-ispejjeż kollha involuti mill-ftuħ sal-għeluq finali tas-sit.
- L-operaturi tas-siti tat-terraferma għandhom japplikaw għal permess u jipprovdu l-informazzjoni li ġejja:
- l-identità tal-applikant u, f’xi każijiet, tal-operatur,
- deskrizzjoni tat-tip u tal-kwantità tal-iskart li jrid jiġi ddepożitat,
- il-kapaċità u d-deskrizzjoni tas-sit, inklużi pjanijiet ta’ operat, monitoraġġ u kontroll,
- modi ta’ prevenzjoni u tnaqqis tat-tniġġis, u
- dettalji tal-proċeduri tal-għeluq u tal-kura ta’ wara.
- Fl-2014, ġiet adottata l-emenda tad-Direttiva 2014/52/UE biex tissaħħaħ il-kwalità tal-proċedura dwar il-valutazzjoni tal-effetti ta’ proġetti fuq l-ambjent stabbilita fid-Direttiva 2011/92/UE (ara s-sommarju). Din kienet neċessarja sabiex jiġu żgurati l-konsistenza u s-sinerġija ma’ oqsma oħrajn tal-leġiżlazzjoni u l-politiki Ewropej.
- Id-Deċiżjoni 2003/33/KE tistabbilixxi l-kriterji u l-proċeduri għall-aċċettazzjoni tal-iskart fil-landfills.
Id-Direttiva Emendatorja (UE) 2018/850
- Biex tappoġġja t-tranżizzjoni tal-UE għal ekonomija ċirkolari, id-Direttiva (UE) 2018/850 temenda d-Direttiva 1999/31/KE.
- Id-Direttiva (UE) 2018/850:
- tintroduċi restrizzjonijiet fuq ir-rimi fil-landfills mill-2030 tal-iskart kollu li huwa adattat għar-riċiklaġġ jew materjal ieħor jew l-irkupru tal-enerġija;
- tfittex li tillimita s-sehem tal-iskart muniċipali mormi f’terraferma għal 10 % sal-2035;
- tintroduċi regoli dwar il-kalkolu tal-kisba tal-miri tal-iskart muniċipali u tirrikjedi li l-pajjiżi tal-UE jistabbilixxu sistema effettiva ta’ kontroll tal-kwalità u ta’ traċċabbiltà għall-iskart muniċipali mormi f’terraferma;
- tirrikjedi lill-Kummissjoni Ewropea, flimkien mal-Aġenzija Ewropea għall-Ambjent, 3 snin qabel kull skadenza, biex tfassal rapporti ta’ twissija bikrija biex tidentifika n-nuqqasijiet fil-kisba tal-miri u tirrakkomanda li tittieħed azzjoni;
- tippermetti lill-pajjiżi tal-UE jużaw strumenti ekonomiċi u miżuri oħra biex jinkoraġġixxu l-applikazzjoni tal-ġerarkija tal-iskart* introdotta skont id-Direttiva 2008/98/KE, id-Direttiva Qafas dwar l-Iskart (ara s-sommarju).
MINN META TAPPLIKA D-DIRETTIVA?
- Id-Direttiva 1999/31/KE ilha tapplika sa mis-16 ta’ Lulju 1999 u kellha ssir liġi fil-pajjiżi tal-UE sas-16 ta’ Lulju 2001.
- Id-Direttiva Emendatorja (UE) 2018/850 kellha ssir liġi fil-pajjiżi tal-UE sal-5 ta’ Lulju 2020.
SFOND
Għal aktar informazzjoni, ara:
- Skart (Kummissjoni Ewropea).
TERMINI EWLENIN
Il-ġerarkija tal-iskart: ġerarkija b’5 passi fejn il-prevenzjoni hija l-aħjar għażla, segwita mill-użu mill-ġdid, ir-riċiklaġġ u forom oħra ta’ rkupru, bir-rimi tal-iskart bħala l-aħħar għażla.
DOKUMENT EWLIENI
Id-Direttiva tal-Kunsill 1999/31/KE tas-26 ta’ April 1999 dwar ir-rimi ta’ skart f’terraferma (ĠU L 182, 16.7.1999, pp. 1-19)
L-emendi suċċessivi għad-Direttiva 1999/31/KE ġew inkorporati fit-test oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Id-Direttiva 2011/92/UE tal-Parlament Ewropew u tal-Kunsill tat-13 ta’ Diċembru 2011 dwar l-istima tal-effetti ta’ ċerti proġetti pubbliċi u privatifuq l-ambjent (kodifikazzjoni) (ĠU L 26, 28.1.2012, pp. 1-21)
Ara l-verżjoni konsolidata.
Id-Direttiva 2008/98/KE tal-Parlament Ewropew u tal-Kunsill tad-19 ta’ Novembru 2008 dwar l-iskart u li tħassar ċerti Direttivi (ĠU L 312, 22.11.2008, pp. 3-30)
Ara l-verżjoni konsolidata.
Id-Deċiżjoni tal-Kunsill 2003/33/KE tad-19 ta’ Diċembru 2002 li tistabbilixxi l-kriterji u proċeduri għall-aċċettazzjoni ta’ skart f’terraferma artifiċjali skont l-Artikolu 16 ta’ u l-Anness II għad-Direttiva 1999/31/KE (ĠU L 11, 16.1.2003, pp. 27-49).
l-aħħar aġġornament 22.07.2020