Ħaddiema mhux mill-UE — residenza u formalitajiet tal-impjieg aktar faċli (sal-2026)

PUNTI EWLENIN

Min hu kkonċernat?

Id-Direttiva tapplika għaċ-ċittadini mhumiex mill-UE li huma awtorizzati jgħixu jew jaħdmu fl-UE, indipendentement mir-raġuni inizjali tagħhom għall-ammissjoni. Dan jinkludi:

• Ċittadini mhux mill-UE li jfittxu li jiġu ammessi f’pajjiż tal-UE biex jirrisjedu u jaħdmu fih;
• ċittadini mhux mill-UE li diġà huma residenti u li għandhom aċċess għas-suq tax-xogħol jew li diġà qed jaħdmu f’pajjiż tal-UE.

Ċerti kategoriji ta’ ċittadini mhux mill-UE mhumiex koperti minn din id-direttiva, bħal dawk li ngħataw l-istatus ta’ residenti għal żmien twil (dawn jaqgħu taħt leġiżlazzjoni oħra tal-UE).

Proċedura ta’ applikazzjoni unika

L-awtoritajiet fl-Istati Membri għandhom jittrattaw kull applikazzjoni għal dan il-permess uniku għar-residenza u x-xogħol (ġdida, emendata jew imġedda) bħala proċedura ta’ applikazzjoni unika. Huma għandhom jiddeċiedu jekk l-applikazzjoni hijiex qed issir miċ-ċittadin ta’ pajjiż mhux fl-UE jew minn min qed iħaddimhom (jew mit-tnejn).

Il-format tal-permess uniku huwa l-istess bħal dak deskritt fir-Regolament (KE) Nru 1030/2002 li jistabbilixxi permess ta’ residenza uniku għal ċittadini ta’ pajjiżi mhux fl-UE.

Dritt għal trattament indaqs

Il-permess uniku jippermetti lill-benefiċjarji minn pajjiżi mhux fl-UE li jgawdu minn sett ta’ drittijiet, inklużi:

• id-dritt li jaħdmu, jgħixu u jiċċaqilqu b’mod liberu fl-Istat Membru emmittenti;
• l-istess kundizzjonijiet bħaċ-ċittadini tal-Istat Memrbu fir-rigward tal-kundizzjonijiet tax-xogħol (bħal paga u tkeċċija, saħħa u sigurtà, ħin tax-xogħol u ġranet franki), edukazzjoni u taħriġ, għarfien tal-kwalifiki, ċerti aspetti tas-sigurtà soċjali, benefiċċji tat-taxxa, aċċess għal prodotti u servizzi inkluż fil-qasam tal-akkomodazzjoni u servizz ta’ pariri marbuta mal-impjieg.

Id-Direttiva tistipula kriterji speċifiċi, li fuqhom l-Istati Membri jistgħu jirrestrinġu t-trattament ugwali dwar ċerti kwistjonijiet (aċċess għall-edukazzjoni/taħriġ, benefiċċji tas-sigurtà soċjali bħal benefiċċji tal-familja jew akkomodazzjoni).

Revoka

Id-Direttiva 2011/98/UE se tiġi revokata u sostitwita bid-Direttiva (UE) 2024/1233 (ara s-sommarju) mit-22 ta’ Mejju 2026.