Il-konvenzjoni tistabbilixxi regoli biex tittejjeb il-protezzjoni tat-tfal f’sitwazzjonijiet internazzjonali u jiġu evitati l-kunflitti bejn id-diversi sistemi legali nazzjonali.
Il-pajjiżi kollha tal-UE huma parti għall-Konvenzjoni tal-Aja. Dan ifisser li jistgħu jinvokaw regoli legali komuni meta jittrattaw ma’ pajjiżi barra l-UE li huma parti għall-Konvenzjoni, sabiex jipproteġu lit-tfal involuti f’tilwim internazzjonali.
Il-konvenzjoni tara li tagħti protezzjoni internazzjonali lit-tfal sa 18-il sena, billi tistabbilixxi:
liema pajjiż għandu ġurisdizzjoni sabiex jieħu l-miżuri biex jipproteġi minuri jew il-proprjetà tiegħu;
liema liġi tapplika għall-eżerċitar ta’ din il-ġurisdizzjoni;
liema liġi tapplika għall-awtorità tal-ġenituri;
li l-miżuri ta’ protezzjoni huma rikonoxxuti u infurzati fil-pajjiżi firmatarji kollha;
kooperazzjoni bejn il-pajjiżi firmatarji.
Il-miżuri għall-protezzjoni ta’ minuri jirrigwardaw:
ir-responsabbiltà tal-ġenituri;
il-jeddijiet ta’ kustodja;
it-tutela;
kif huwa rappreżentat il-minuri;
it-tqegħid tal-minuri ma’ familja tar-rispett jew taħt kura oħra;
is-sorveljanza ta’ dik il-kura;
kif inhi ġestita l-proprjetà tal-minuri.
Liema pajjiż huwa responsabbli?
Il-pajjiżi bil-ġurisdizzjoni li jipprovdi miżuri ta’ protezzjoni ġeneralment huwa l-pajjiż fejn il-minuri huwa normalment residenti.
Huwa l-pajjiż li fih il-minuri huwa preżenti:
għar-refuġjati jew għat-tfal spustati b’mod internazzjonali;
għat-tfal li l-pajjiż ta’ residenza normali tagħhom ma jistax ikun stabbilit;
f’emerġenza (fakultattiva).
Eċċezzjoni
F’każ partikolari, jekk pajjiż ieħor jidher li huwa f’qagħda aħjar li jivvaluta l-aħjar interessi tal-minuri, jista’ jitħalla jieħu l-ġurisdizzjoni.
Liema liġi tapplika?
Il-pajjiż li jeżerċita l-ġurisdizzjoni jagħmel dan taħt il-liġi tiegħu stess.
B’mod eċċezzjonali, jista’ japplika jew jieħu inkunsiderazzjoni l-liġi ta’ pajjiż ieħor li huwa involut mill-qrib fis-sitwazzjoni – jekk dan ikun fl-aħjar interess tal-minuri.
Pajjiż jista’ biss jirrifjuta li japplika l-liġi magħżula mill-konvenzjoni għal raġunijiet iġġustifikati ta’ politika pubblika u fl-aħjar interess tal-minuri.
Rikonoxximent u infurzar
Il-miżuri li jieħu pajjiż firmatarju taħt din il-konvenzjoni sabiex jipproteġi minuri jew il-proprjetà tiegħu għandhom ikunu rikonoxxuti fil-pajjiżi firmatarji kollha.
Kif speċifikat fil-konvenzjoni, pajjiż jista’ jirrifjuta r-rikonoxximent f’numru limitat ta’ każijiet biss.
Meta l-miżuri ta’ protezzjoni jiġu ddikjarati infurzabbli f’pajjiż ieħor, dak il-pajjiż irid jinfurzahom daqs li kieku ħadhom huwa stess, u jagħmel dan skont il-liġi tiegħu stess.
Il-kooperazzjoni
Kull pajjiż firmatarju għandu jagħżel awtorità jew awtoritajiet ċentrali li jwettqu l-obbligi imposti fuqu mill-konvenzjoni.
Dawn l-awtoritajiet iridu jikkooperaw u jiskambjaw informazzjoni bejniethom, kif ukoll jippromwovu l-kooperazzjoni f’każijiet bħal dawn fost l-awtoritajiet nazzjonali tagħhom.
Id-Deċiżjoni tal-Kunsill 2003/93/KE tad- li tawtorizza lill-Istati Membri, fl-interess tal-Komunità, li jiffirmaw il-Konvenzjoni tal-Aja tal-1996 dwar il-ġurisdizzjoni, il-liġi applikabbli, ir-rikonoxximent, l-infurzar u l-kooperazzjoni fir-rigward tar-responsabbiltà tal-ġenituri u miżuri għall-protezzjoni tat-tfal (ĠU L 48, , pp. 1–2)
ATTI RELATATI
Id-Deċiżjoni tal-Kunsill 2008/431/KE tal- li tawtorizza lil ċerti Stati Membri li jirratifikaw, jew jaderixxu ma’, fl-interess tal-Komunità Ewropea, Konvenzjoni ta’ l-Aja ta’ l-1996 dwar il-Ġurisdizzjoni, il-Liġi Applikabbli, ir-Rikonoxximent, l-Infurzar u l-Kooperazzjoni fir-rigward tar-Responsabbiltà tal-Ġenituri u Miżuri għall-Protezzjoni tat-Tfal u li tawtorizza lil ċerti Stati Membri li jagħmlu dikjarazzjoni dwar l-applikazzjoni tar-regoli interni rilevanti tal-liġi Komunitarja - Konvenzjoni fuq il-Ġurisdizzjoni, il-Liġi Applikabbli, Rikonoxximent, Infurzar u Kooperazzjoni dwar ir-Responsabbiltà tal-Ġenituri u Miżuri għall-Protezzjoni tat-Tfal (ĠU L 151, , pp. 36–48)