Il-kodiċi għall-komunikazzjonijiet elettroniċi huwa stabbilit fid-Direttiva (UE) 2018/1972. Il-kodiċi jistabbilixxi sett ta’ regoli tal-Unjoni Ewropea(UE) li jirregolaw networks tal-komunikazzjonijiet elettroniċi (telekomunikazzjoni), servizzi ta’ telekomunikazzjoni, u faċilitajiet u servizzi assoċjati. Huwa jistabbilixxi kompiti għal awtoritajiet regolatorji nazzjonali u awtoritajiet rilevanti oħra, u jistabbilixxi sett ta’ proċeduri biex jiġi żgurat li l-qafas regolatorju jkun armonizzat madwar l-UE kollha.
L-għanijiet ewlenin tiegħu huma li:
- jippromwovi l-konnettività u l-adozzjoni ta’ networks ta’ kapaċità għolja ħafna, inklużi networks fissi, mobbli u bla fili;
- jippromwovi l-interessi taċ-ċittadini billi:
- jippermetti benefiċċji massimi f’termini ta’ għażla, prezz u kwalità permezz ta’ kompetizzjoni effettiva,
- iżomm is-sigurtà tan-networks u s-servizzi,
- jiżgura protezzjoni għall-konsumaturi permezz ta’ regoli speċifiċi, u
- jindirizza l-bżonnijiet ta’ gruppi soċjali speċifiċi, b’mod partikolari nies b’diżabbiltà, nies akbar fl-età u nies bi bżonnijiet soċjali speċjali;
- jiffaċilita d-dħul fis-suq u jippromwovi l-kompetizzjoni fit-twassil ta’ networks ta’ telekomunikazzjoni u faċilitajiet assoċjati;
- jikkontribwixxi għall-iżvilupp tas-suq intern fin-networks u s-servizzi tat-telekomunikazzjoni fl-UE, billi jiżviluppa regoli komuni u regolamenti prevedibbli li jinkludu:
- l-użu effettiv, effiċjenti u kkoordinat tal-ispettru tar-radju,
- innovazzjoni miftuħa,
- l-iżvilupp ta’ networks trans-Ewropej,
- id-disponibbiltà u l-interoperabbiltà ta’ servizzi mal-UE kollha, u
- konnettività minn tarf sa tarf.