Il-Qorti Ewropea tal-Awdituri

Il-Qorti Ewropea tal-Awdituri (QEA), ibbażata fil-Lussemburgu, bdiet il-ħidma tagħha fl-1977. Din hija l-awditur estern indipendenti u l-gwardjana tal-finanzi tal-Unjoni Ewropea (UE). Hija topera skont ir-regoli stabbiliti fit-Trattat dwar il-Funzjonament tal-Unjoni Ewropea (l-Artikoli 285–287).

Il-QEA għandha madwar 900 impjegat tan-nazzjonalitajiet kollha tal-UE. Hija magħmula minn membru wieħed minn kull Stat Membru tal-UE, maħtur għal sitt snin (rinnovabbli) mill-Kunsill tal-Unjoni Ewropea wara konsultazzjoni mal-Parlament Ewropew. Il-membri tal-QEA jaħtru l-President, li l-mandat tiegħu huwa għal tliet snin (rinnovabbli). Il-membri kollha huma meħtieġa li jaqdu dmirijiethom fl-interess ġenerali tal-UE u b’indipendenza sħiħa.

Il-Qorti Ewropea tal-Awdituri:

• tiżgura li l-UE żżomm kontijiet tajbin u tapplika b’mod korrett ir-regoli finanzjarji tagħha, u li l-politiki u l-programmi tagħha jilħqu l-objettivi maħsuba tagħhom u jagħtu valur għall-flus;
• tikkontribwixxi għat-titjib tal-ġestjoni finanzjarja tal-UE u tippromwovi r-responsabbiltà u t-trasparenza;
• twissi dwar ir-riskji, tipprovdi assigurazzjoni, tindika nuqqasijiet u suċċessi u toffri gwida lil dawk li jfasslu l-politika u lil-leġiżlaturi tal-UE;
• tippreżenta osservazzjonijiet u rakkomandazzjonijiet lill-Parlament Ewropew, lill-Kunsill, lill-gvernijiet u lill-parlamenti nazzjonali u lill-pubbliku ġenerali.

ARA WKOLL

• Baġit tal-UE
• Il-Kunsill tal-Unjoni Ewropea
• Il-Parlament Ewropew
• Istituzzjonijiet tal-Unjoni Ewropea
• L-Istati Membri
• Il-parlamenti nazzjonali
• Il-Qorti Ewropea tal-Awdituri (QEA) (sommarju)
• Il-Qorti Ewropea tal-Awdituri (QEA) (Ewropa)
• Il-Qorti Ewropea tal-Awdituri (sit elettroniku).