Vetturi għat-trasport tat-triq nodfa u effiċjenti fl-użu tal-enerġija

PUNTI EWLENIN

Kamp ta’ applikazzjoni

Kif emendat mid-Direttiva (UE) 2019/1161, id-direttiva tapplika għal kuntratti għall-akkwist ta’ ċertu vetturi ta’ trasport fit-toroq (karozzi, vannijiet, trakkijiet u karozzi tal-linja) u servizzi, minn obbligazzjonijiet ta’ awtoritajiet kontraenti, entitajiet kontraenti u operaturi tas-servizz pubbliku taħt kuntratt ta’ servizz pubbliku.

Id-direttiva emendatorja estendiet l-applikazzjoni tad-direttiva ħalli issa tkopri l-akkwist permezz ta’:

• Kuntratti għax-xiri, għall-kiri, u għax-xiri għall-kera ta’ vetturi;
• Kuntratti ta’ servizz għat-trasport pubbliku ta’ passiġġieri fit-toroq;
• Kuntratti ta’ servizz għal servizzi ta’ trasport pubbliku bit-toroq, servizzi ta’ trasport ta’ passiġġieri fit-toroq b’għan speċjali, trasport ta’ passiġġieri mhux ippjanat, servizzi ta’ ġbir ta’ skart u trasport u kunsinna ta’ posta u pakketti.

Id-Direttiva Emendatorja (UE) 2019/1161introduċiet ukoll definizzjoni ġdida ta’ “vettura nadifa”¹.

Miri minimi għall-akkwist

Id-Direttiva 2009/33/UE, kif emendata mid-Direttiva (UE) 2019/1161, tiffissa miri minimi għall-akkwist pubbliku ta’ vetturi ħfief (karozzi u vannijiet), trakkijiet u karozzi tal-linja għall-2025 u għall-2030. Fil-każ ta’ karozzi tal-linja, nofs il-miri jeħtieġ li jintlaħqu b’vetturi b’emissjonijiet żero (batterija elettrika jew karozzi tal-linja bl-idroġenu). Dawn il-miri huma stabbiliti fl-anness tar-regolament.

Għal kull Stat Membru, mira differenti ser tiġi ffisata għal vetturi ħfief, għal trakkijiet u għal karozzi tal-linja. Dawn il-miri huma kkalkulati bħala persentaġġ minimu ta’ vetturi nodfa fin-numru totali ta’ vetturi akkwistati permezz ta’ akkwist pubbliku f’kull Stat Membru fuq medda ta’ żewġ perijodi ta’ 5 snin: 2021–2025 u 2026–2030. L-Istati Membri għandhom jassiguraw li l-miri jintlaħqu, imma għandhom il-flessibilità li jqassmu l-impenn madwar awtoritajiet kontraenti u entitajiet kontraenti differenti.

Kondiviżjoni tal-aħjar prassi

Il-Kummissjoni Ewropea tħeġġeġ il-kondiviżjoni tal-għarfien u tal-aħjar prassi bejn l-Istati Membri bl-għan li tippromwovi x-xiri ta’ vetturi tat-trasport tat-triq nodfa u effiċjenti fl-użu tal-enerġija.

Għaddejjin diversi inizjattivi li jiżguraw li d-direttiva tiġi implimentata. Dawn jinkludu:

• linji gwida fuq akkwist pubbliku ekoloġiku u rapport ta’ sfond tekniku;
• l-Inizjattiva Ewropea tal-Vettura Ekoloġika, li tfittex li ssostni l-iżvilupp tal-vetturi ekoloġiċi u s-soluzzjonijiet sostenibbli għall-mobilità;
• l-inizjattiva Ewropea għall-użu tax-xarabank nadif; u
• diversi studji.

Proċedura tal-Kumitat

Il-Kummissjoni għandha s-setgħa li tadotta atti ta’ implimentazzjoni u hija assistita f’dan permezz ta’ kumitat iggvernat mir-regoli ta’ komitoloġija tal-UE.