Il-protezzjoni tad-data tirreferi għar-regoli rigward id-drittijiet ta’ persuni naturali (individwi) biex id-data personali tagħhom (kull informazzjoni li tirrigwarda persuna fiżika identifikata jew mhux identifikabbli) tkun protetta u l-obbligi ta’ awtoritajiet pubbliċi, negozji u organizzazzjonijiet oħra biex jipproteġu din id-data.
Id-dritt tal-protezzjoni ta’ data personali huwa dritt fundamentali minqux fil- Karta tad-Drittijiet Fundamentali tal-UE. Huwa jappartjeni għas-sett ta’ valuri protetti taħt l-Artikolu 2 tat-Trattat dwar l-Unjoni Ewropea u jikkontribwixxi għar-realizzazzjoni tal-oġġettivi tal-UE taħt l-Artikolu 3 tat-trattat.
L-Artikolu 16 tat-Trattat dwar il-Funzjonament tal-Unjoni Ewropea jagħti lill-individwi kollha d-dritt għall-protezzjoni tad-data personali. Huwa jeħtieġ ukoll li l-Parlament Ewropew u l-Kunsill tal-Unjoni Ewropea jistabbilixxu r-regoli biex jipproteġu l-individwi fir-rigward tal-ipproċessar tad-data personali mill-istituzzjonijiet, korpi, uffiċini u aġenziji tal-UE, u mill-Istati Membri meta jwettqu attivitajiet li jaqgħu fl-ambitu tal-liġi tal-UE.
L-Artikolu 8 tal-Karta tad-Drittijiet Fundamentali tal-UE jeħtieġ li d-data personali tkun ipproċessata b’mod ġust għal raġunijiet speċifikati u fuq il-bażi tal-kunsens tal-persuna kkonċernata jew xi bażi leġittima oħra stipulata mil-liġi tal-UE. Barra minn hekk, kull individwu għandu d-dritt ta’ aċċess għad-data li nġabret dwaru, u d-dritt li jirretifikaha. Il-konformità ma’ dawn ir-regoli għandha tkun soġġetta għall-verifika minn awtorità indipendenti.
Matul is-snin, l-UE għaddiet bosta biċċiet ta’ leġiżlazzjoni biex tiżgura l-protezzjoni tad-data personali, inkluż dawk elenkati hawn taħt.
Barra minn hekk, l-UE adottat strumenti differenti rigward it-trasferimenti ta’ data personali lil pajjiżi mhux tal-UE u diversi arranġamenti oħra ma’ pajjiżi mhux tal-UE rigward it-trasferimenti ta’ data personali. Dawn jinkludu deċiżjonijiet ta’ adegwatezza, klawsoli kuntrattwali standard u ftehimiet internazzjonali, bħall-ftehim umbrella bejn l-UE u l-Istati Uniti dwar il-protezzjoni ta’ informazzjoni personali relatata mal-evitar, l-investigazzjoni, is-sejbien u l-prosekuzzjoni ta’ reati kriminali, ftehimiet dwar rekords tal-ismijiet tal-passiġġieri (mal-Awstralja, il-Kanada u l-Istati Uniti) u l-programm dwar ir-rintraċċar tal-finanzjament tat-terroriżmu bejn l-UE u l-Istati Uniti.
ARA WKOLL