Ħin tas-sewqan u perjodi ta’ mistrieħ fis-settur tat-trasport bit-triq

PUNTI EWLENIN

Ir-Regolament (KE) Nru 561/2006:

• japplika għall-ġarr ta’ merkanzija bit-trasport stradali minn veikoli b’massa totali li teċċedi 3.5 tunnellata u għat-trasport stradali ta’ passiġġieri minn veikoli li huma adatti biex iġorru iktar minn disa’ persuni (inkluż is-sewwieq);
• Mill-1 ta’ Lulju 2026 ser japplika għall-ġarr ta’ merkanzija bit-triq ta’ prodotti fit-trasport internazzjonali jew f’operazzjonijiet ta’ kabotaġġ minn veikoli (inklużi kull trailer jew semi-trailer) b’massa totali li teċċedi 2.5 tunnellata;
• japplika, irrispettivament mill-pajjiż ta’ reġistrazzjoni tal-vettura, għat-trasport bit-triq fl-Unjoni Ewropea (UE) u bejn l-Istati Membri tal-UE, l-Iżvizzera u l-pajjiżi taż-Żona Ekonomika Ewropea.

Età minima

L-assistenti tax-xufiera u l-kondutturi jrid ikollhom tal-inqas 18-il sena, għajr f’ċerti ċirkostanzi għall-assistenti tax-xufiera li qed jitħarrġu, għal min l-età minima hija ta’ 16-il sena (ara l-Artikolu 5 għal aktar dettalji).

Regoli dwar il-ħinijiet tas-sewqan, pawżi u perjodi ta’ mistrieħ

Regoli dettaljati għal dawn huma stabbiliti fl-Artikoli 6, 7, 8, 8a u 9.

• Dawn ir-regoli jinkludu:
  • ammont massimu ta’ ħin ta’ sewqan ta’ kuljum ta’ 9 sigħat, li jistgħu jkunu estiżi għal 10 sigħat mhux iktar minn darbtejn fil-ġimgħa;
  • ammont massimu ta’ 56 siegħa għal ħin tas-sewqan fil-ġimgħa;
  • total massimu akkumulat ta’ 90 siegħa għal ħin tas-sewqan matul kwalunkwe ġimagħtejn konsekuttivi;
  • li wara li ssuq għal perjodu ta’ 4.5 sigħat, sewwieq irid jieħu pawża mingħajr interruzzjonijiet ta’ mhux inqas minn 45 minuta, ħlief jekk jieħu perjodu ta’ mistrieħ;
  • pawża għal mistrieħ minima ta’ kuljum ta’ 11-il siegħa, li tista’ titnaqqas għal 9 sigħat, imma mhux iktar minn tliet darbiet bejn kwalunkwe żewġ perjodi ta’ mistrieħ settimanali;
  • perjodu regolari ta’ mistrieħ ta’ mill-inqas 45 siegħa kull ġimgħa u perjodu mnaqqas ta’ mistrieħ ta’ mill-inqas 24 siegħa kull ġimgħa.
• Għal sewwieq ta’ xarabank tat-turisti, ir-Regolament emendatorju (UE) 2024/1258 jintroduċi xi flessibbiltà fir-rigward to pawżiet u perjodi ta’ mistrieħ għal sewwieqa professjonali impenjati fi trasport ta’ passiġġiera okkażjonali, sew fil-livell nazzjonali kif ukoll fil-livell internazzjonali. Din il-flessibbiltà ma tbiddilx ir-regoli kurrenti dwar pawżiet totali minimi, dwar perjodi ta’ sewqan massimi kull ġurnata u kull ġimgħa, dwar ħin ta’ sewqan massimu kull ħmistax u dwar ħin massimu tax-xogħol konformi mal-liġi applikabbli. Dawn is-sewwieqa jistgħu jaqsmu l-pawża obbligatorja tagħhom f’żewġ pawżiet ta’ tal-inqas 15-il minuta kull waħda, waqt li jirrispettaw il-pawża minima totali meħtieġa ta’ 45 minuta. jistgħu jipposponu l-perjodu ta’ mistrieħ ta’ kuljum b’siegħa, sakemm l-akkumulat totali ta’ ħin ta’ sewqan ma jkunx eċċeda 7 sigħat, u sakemm din l-opzjoni tkun eżerċitata biss darba matul vjaġġ b’durata ta’ mill-inqas 6 ijiem, jew darbtejn matul vjaġġ ta’ mill-inqas 8 ijiem. Huma jistgħu wkoll jipposponu l-perjodu ta’ mistrieħ settimanali sa 12-il jum konsekutiv wara perjodu ta’ mistrieħ settimanali preċedenti regolari.
• Il-kumpaniji tat-trasport iridu jorganizzaw ix-xogħol tas-sewwieqa b’tali mod li jħalluhom jerġgħu jmorru lura fiċ-ċentru operattiv tal-impjegatur fejn is-sewwieqa normalment ikunu bbażati fil-pajjiż tal-UE jew fil-post ta’ residenza tas-sewwieqa u jqattgħu mill-inqas perjodu wieħed regolari ta’ mistrieħ kull ġimgħa (jew perjodu ta’ mistrieħ ta’ aktar minn 45 siegħa kull ġimgħa f’kumpens għal perjodu ta’ mistrieħ imnaqqas kull ġimgħa) f’kull perjodu ta’ 4 ġimgħat konsekuttivi.
• Is-sewwieqa għandhom ikunu jistgħu jieħdu l-mistrieħ tagħhom ta’ 45 siegħa fil-ġimgħa f’akkomodazzjoni adatta għall-ġeneri b’faċilitajiet adegwati għall-irqad u dawk sanitarji (jiġifieri lil hinn mill-kabina tal-vettura), li l-ispiża tagħhom trid titħallas mill-kumpanija tat-trasport bħala l-impjegatur.
• Il-perjodu ta’ mistrieħ regolari ta’ kuljum tas-sewwieqa, il-perjodi mnaqqsa ta’ mistrieħ settimanali u l-perjodi ta’ mistrieħ regolari settimanali ma jistgħux ikunu interotti iktar minn darbtejn b’attivitajiet oħra li ma jeċċedux siegħa fit-total tagħhom, fejn dawn is-sewwieqa jakkumpanjaw veikoli li jkunu ttrasportati bil-lanċa jew ferrovija. L-interruzzjoni ta’ perjodi regolari ta’ mistrieħ ta’ kuljum u settimanali hi possibbli biss fil-każ ta’ sewwieqa li jkollhom aċċess għal vagun għall-irqad, bunk jew kuċċetta fil-lanċa jew ferrovija u, fil-każ ta’ mistrieħ regolari settimanali, l-interruzzjoni hi possibbli biss fejn id-durata skedata tal-vjaġġ hi ta’ 8 sigħat, jew iktar u s-sewwieq ikullu aċċess għal vagun għall-irqad.
• Il-Kummissjoni Ewropea adottat att delegat, ir-Regolament delegat (UE) 2022/1012, li jistabbilixxi standards għal-livell ta’ servizz f’żoni ta’ parkeġġ siguri u mingħajr periklu għal sewwieqa, u proċeduri biex jiċċertifikaw is-sikurezza u s-sigurtà ta’ dawn iż-żoni.

Kundizzjonijiet minimi għall-implimentazzjoni tar-regolament

• id-Direttiva 2006/22/KE, bl-emendi tad-Direttiva (UE) 2020/1057 tistabbilixxi kundizzjonijiet minimi għall-implimentazzjoni tar-Regolamenti (KE) Nru. 561/2006 u (UE) Nru. 165/2014 (ara s-sezzjoni fuq takografs hawn taħt).
• Din tipprova tassikura l-applikazzjoni tajba u interpretazzjoni armonizzata tar-regoli soċjali fuq trasport stradali billi tistabbilixxi rekwiżiti minimi għall-verifika uniformi u effettiva mill-Istati Membri ta’ konformità mar-regoli rilevanti. Dawk il-kontrolli għandhom iservu biex inaqqsu u jipprevjenu l-ksur.
• Dan jirrikjedi li l-Istati Membri jintroduċu sistema ta’ klassifikazzjoni tar-riskju għall-kumpaniji tat-trasport ibbażata fuq l-għadd u l-gravità relattivi ta’ kwalunkwe ksur li tkun wettqet il-kumpanija individwali. Kumpaniji bi klassifikazzjoni ta’ riskju għoli għandhom jiġu kkontrollati aktar mill-qrib u aktar ta’ spiss.

Takografi

• Skont ir-Regolament (UE) Nru 165/2014 (ara s-sommarju), it-takografi jridu jiġu installati fil-vetturi kollha ta’ aktar minn 3.5 tunnellati li jittrasportaw merkanzija bit-triq, u f’vetturi li jistgħu jġorru aktar minn disa’ persuni (inkluż is-sewwieq), b’ċerti eċċezzjonijiet. Mill-1 ta’ Lulju 2026, takografs iridu jkunu installati fil-veikoli ta’ iktar minn 2.5 tunnellata involuti fit-trasport stradali internazzjonali jew f’operazzjonijiet ta’ kabotaġġ.
• It-teknoloġija ta’ takografi mxiet l-ewwel minn analogu għal diġitali u wara minn diġitali għal diġitali iktar avvanzat, jiġifieri intelliġenti.
• Ir-Regolament (UE) Nru 165/2014 introduċa regoli dwar takografi intelliġenti — ġenerazzjoni ġdida ta’ tagħmir abbord sabiex tiġi infurzata l-leġiżlazzjoni tal-UE dwar is-sewqan u l-ħinijiet ta’ mistrieħ tas-sewwieqa professjonali. Il-verżjoni 1 ta’ takografi intelliġenti hija obbligatorja fil-veikoli kollha ġodda reġistrati wara l-15 ta’ Ġunju 2019 u l-verżjoni 2 wara l-21 t’Awwissu 2023. It-takografi intelliġenti jipprovdu reġistrazzjoni awtomatizzata permezz tal-ippożizzjonar bis-satellita tal-ħin tas-sewqan, il-pawżi u l-perjodi ta’ mistrieħ, kif ukoll perjodi ta’ disponibbiltà u xogħol ieħor imwettaq minn sewwieq. Dawn għandhom itejbu l-konformità u jippermettu l-identifikazzjoni bikrija ta’ frodi jew ta’ użu ħażin possibbli.
• Taħt ir-Regolament (UE) 2024/1258, fil-kuntest ta’ verifiki stradali, sakemm tkun disponibbli formola diġitali tal-vjaġġ, is-sewwieqa jridu jġorru abbord il-karta tal-veikola tagħhom jew kopji elettroniċi ta’ formoli ta’ vjaġġi magħmula li jkopru t-28 jum ta’ qabel u, mill-31 ta’ Diċembru 2024, jkopru s-56 jum preċedenti. Il-Kummissjoni għandha tqis l-opzjonijiet għad-diġitalizzazzjoni tal-formola tal-vjaġġ sal-31 ta’ Diċembru 2026.
• Ir-Regolament Emendatorju (UE) 2024/1258 jippermetti wkoll li Stat Membru jagħmilha possibbli għal awtoritajiet kompetenti biex jimponu piena fuq impriża u/jew sewwieq għal ksur ta’ Regolament (UE) Nru. 165/2014 (s’issa esklużivament ta’ Regolament (KE) Nru. 561/2006), misjub fuq it-territorju tiegħu u li għaliha għad ma jkunx hemm piena anki meta dak il-ksur jkun sar fuq it-territorju ta’ Stat Membru ieħor jew ta’ pajjiż mhux tal-UE.