Ħelsien aktar rapidu u aktar sikur mit-taxxi f’ras il-għajn eċċessivi

PUNTI EWLENIN

Kamp ta’ applikazzjoni

• Ir-rekwiżiti relatati maċ-ċertifikat elettroniku ta’ residenza japplikaw għall-Istati Membri kollha tal-UE.
• Ir-rekwiżiti dwar il-proċeduri tat-taxxa f’ras il-għajn japplikaw fl-Istati Membri:
  • li għadhom ma jipprovdux proċedura domestika komprensiva għall-ħelsien mit-taxxa f’ras il-għajn fil-mument tal-ħlas (is-sistema nazzjonali tal-ħelsien mit-taxxa f’ras il-għajn); jew
  • fejn il-proporzjon tal-kapitalizzazzjoni tas-suq, kif stabbilit fl-aħħar erba’ pubblikazzjonijiet tal-Awtorità Ewropea tat-Titoli u s-Swieq (ESMA) (ara s-sommarju) li kienu disponibbli sal-31 ta’ Diċembru 2028, huwa ta’ 1,5 % jew ogħla għal kull waħda mill-4 snin konsekuttivi.
• Ladarba jiġu ssodisfati l-kundizzjonijiet, id-direttiva tkompli tapplika anke jekk aktar tard il-proporzjon jinżel taħt il-limitu.

Sistemi rapidi ta’ ħelsien mit-taxxa

• L-Istati Membri jridu japplikaw mill-inqas waħda mis-sistemi “rapidi” li ġejjin:
  • ħelsien mit-taxxa f’ras il-għajn, fejn it-taxxa tinżamm direttament bir-rata mnaqqsa, abbażi ta’ trattati tat-taxxa applikabbli jew ta’ regoli nazzjonali;
  • rifużjoni rapida, fejn it-taxxa tinżamm kollha kemm hi u tiġi rimborżata fi żmien 60 jum kalendarju mit-tmiem tal-perjodu li fih tista’ ssir it-talba għal rifużjoni rapida.
• L-Istati Membri jistgħu jagħżlu liema proċedura rapida jippermettu, jew inkella jistgħu jużaw taħlita taż-żewġ proċeduri.
• L-Istati Membri jistgħu jirrestrinġu l-użu ta’ proċeduri rapidi f’sitwazzjonijiet speċifikati fid-direttiva, pereżempju fejn l-informazzjoni meħtieġa tkun nieqsa, il-kriterji ma jiġux issodisfati jew ikun għaddej awditu. F’ każijiet bħal dawn, minflok jistgħu japplikaw il-proċeduri nazzjonali.
• Il-kontribwenti jew l-intermedjarji finanzjarji ċċertifikati jridu jissottomettu talbiet għal ħelsien u dokumentazzjoni b’mod elettroniku, billi jużaw il-formoli kompjuterizzati standardizzati stabbiliti fl-atti ta’ implimentazzjoni.

Ċertifikat diġitali ta’ residenza tat-taxxa

Sabiex jiffaċilitaw il-ħelsien rapidu, l-Istati Membri jridu joħorġu ċertifikat elettroniku ta’ residenza tat-taxxa (eTRC) standardizzat, dokument diġitali sigur li jagħti prova tar-residenza tal-kontribwent.

L-eTRC:

• irid jinħareġ fi żmien 14-il jum kalendarju mid-data li fiha tiġi ppreżentata talba kompluta;
• huwa validu għal mhux aktar minn sena kalendarja jew fiskali tal-ħruġ;
• irid jinkludi għadd ta’ punti ta’ informazzjoni, inklużi l-isem, l-indirizz, in-numru ta’ identifikazzjoni tat-taxxa tal-kontribwent u, jekk disponibbli, l-identifikatur uniku Ewropew jew l-identifikatur ta’ entità ġuridika;
• jista’ jiġi invalidat jekk il-kontribwent ma jibqax resident fl-Istat Membru emittenti jew jekk ikun inħareġ abbażi ta’ informazzjoni inkorretta jew frawdolenti.

Intermedjarji u reġistri ċċertifikati

• L-Istati Membri li huma soġġetti għar-rekwiżiti tal-proċedura tat-taxxa f’ras il-għajn iridu jistabbilixxu u jimmaniġġjaw reġistru nazzjonali tal-intermedjarji finanzjarji ċċertifikati².
• L-intermedjarji finanzjarji li huma istituzzjonijiet ta’ kreditu, impriżi ta’ investiment jew depożitorji ċentrali tat-titoli li jwettqu attivitajiet ta’ kustodja jistgħu jirreġistraw bħala intermedjarji finanzjarji ċċertifikati u mbagħad joffru l-proċeduri rapidi lill-klijenti tagħhom.
• Ir-reġistrazzjoni hija:
  • obbligatorja għall-istituzzjonijiet kbar kollha li jimmaniġġjaw pagamenti ta’ dividendi u, meta jkun rilevanti, imgħax fuq titoli maħruġa minn resident fil-ġuriżdizzjoni tagħhom, u għal depożitorji ċentrali tat-titoli li huma l-aġent tat-taxxa f’ras il-għajn għal dawk il-pagamenti;
  • volontarja għal intermedjarji finanzjarji oħra, inklużi dawk li jinsabu barra mill-UE.
• L-applikazzjonijiet iridu jintbagħtu permezz tal-Portal Ewropew tal-Intermedjarji Finanzjarji Ċċertifikati, li ġie żviluppat u miżmum mill-Kummissjoni Ewropea.
• L-intermedjarji li ma jibqgħux jissodisfaw il-kundizzjonijiet ta’ reġistrazzjoni jew li jiksru l-obbligi tagħhom iridu jitneħħew mir-reġistru, u l-Istati Membri l-oħra għandhom jiġu infurmati kif xieraq.

Obbligi u responsabbiltà tal-intermedjarji

• L-intermedjarji ċċertifikati jridu:
  • jivverifikaw l-eliġibbiltà u d-dokumentazzjoni tal-kontribwent (eż. eTRC, dikjarazzjonijiet);
  • jirrapportaw id-dettalji tal-pagament, it-taxxa f’ras il-għajn u l-ħelsien mogħti, kif ukoll l-identità tal-kontribwent, lill-awtorità kompetenti tal-Istat Membru fejn joriġina l-pagament, billi jużaw il-format standardizzat tar-rappurtar speċifikat fl-att ta’ implimentazzjoni;
  • japplikaw proċeduri ta’ diliġenza dovuta, inkluż kontrolli kun af lill-klijent tiegħek (KYC)³; u
  • iżommu evidenza ta’ kull dokumentazzjoni u tranżazzjonijiet rilevanti.
• Huma jibqgħu responsabbli għat-telf kollu tad-dħul mit-taxxa f’ras il-għajn, jew għal parti minnu.

Miżuri ta’ kontra l-frodi u ta’ prevenzjoni tal-abbuż

• L-intermedjarji jridu jivvalutaw jekk il-ħelsien jikkonċernax arranġament finanzjarju potenzjalment diżkwalifikanti, bħal self ta’ titoli jew tranżazzjonijiet ta’ riakkwist fejn il-perjodu ta’ żamma ma jirriflettix investiment ġenwin.
• L-Istati Membri jistgħu jirrifjutaw ħelsien rapidu f’każijiet bħal dawn.
• Il-ħelsien jista’ jiġi miċħud ukoll jekk:
  • id-dokumentazzjoni tkun inkompleta, inkorretta jew qarrieqa;
  • ikun hemm indikaturi ta’ abbuż, ta’ rappreżentazzjoni qarrieqa jew ta’ frodi.
• Il-kontribwenti jistgħu xorta waħda jitolbu rifużjonijiet skont il-proċeduri nazzjonali jekk il-ħelsien rapidu jiġi miċħud.

Monitoraġġ, penali u evalwazzjoni

• L-Istati Membri jridu:
  • jissorveljaw il-konformità tal-intermedjarji;
  • jimponu penali effettivi, proporzjonati u dissważivi għal ksur tad-direttiva;
  • jirrapportaw kull sena lill-Kummissjoni dwar l-implimentazzjoni u l-funzjonament tas-sistemi rapidi.
• Il-Kummissjoni trid tivvaluta l-effettività tad-direttiva u, jekk ikun meħtieġ, tista’ tipproponi emendi.

Protezzjoni tad-data

• L-ipproċessar tad-data personali jrid jikkonforma mar-regoli tal-UE dwar il-protezzjoni tad-data, b’mod partikolari:
  • ir-Regolament Ġenerali dwar il-Protezzjoni tad-Data (GDPR) (ara s-sommarju); u
  • ir-Regolament dwar il-Protezzjoni tad-Data tal-UE (EUDPR) għall-istituzzjonijiet tal-UE (ara s-sommarju).
• L-Istati Membri jridu jiżguraw il-kunfidenzjalità, is-sigurtà u l-integrità tad-data kollha pproċessata.