Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fit-Tramuntana tal-Oċean Paċifiku

SOMMARJU TA’:

Il-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fit-Tramuntana tal-Oċean Paċifiku

Id-Deċiżjoni (UE) 2022/314 dwar l-adeżjoni tal-Unjoni Ewropea għall-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fit-Tramuntana tal-Oċean Paċifiku

X’INHU L-GĦAN TAL-KONVENZJONI U TAD-DEĊIŻJONI?

• Il-konvenzjoni għandha l-għan li tiżgura l-konservazzjoni fit-tul u l-użu sostenibbli tar-riżorsi tas-sajd, filwaqt li tipproteġi l-ekosistemi tal-baħar fejn jinsabu dawn ir-riżorsi. Din tapplika għat-Tramuntana tal-Oċean Paċifiku lil hinn minn żoni ta’ ġurisdizzjoni nazzjonali, skont il-liġi internazzjonali. Il-konvenzjoni tkopri r-riżorsi tas-sajd kollha minbarra:
  • speċi sedentarji (li, fl-istadju li jistgħu jinħasdu, huma jew immobbli fuq jew taħt qiegħ il-baħar jew ma jistgħux jiċċaqilqu ħlief meta jkunu f’kuntatt fiżiku kostanti ma’ qiegħ il-baħar jew mas-sottoswol);
  • speċi katadromi (ħut li jqattgħu l-biċċa l-kbira ta’ ħajjithom fl-ilma ħelu, imbagħad jemigraw lejn il-baħar għat-tnissil); u
  • mammiferi tal-baħar, rettili tal-baħar u għasafar tal-baħar.
• Id-deċiżjoni tirratifika l-konvenzjoni f’isem l-Unjoni Ewropea (UE).

PUNTI EWLENIN

Il-partijiet għall-konvenzjoni għandhom japplikaw numru ta’ prinċipji ġenerali individwalment jew kollettivament, billi jadottaw approċċ ta’ prekawzjoni jew ekosistema. Dawn jinkludu:

• il-promozzjoni tal-aħjar użu u l-iżgurar tas-sostenibbiltà fit-tul tar-riżorsi tas-sajd;
• it-teħid ta’ passi biex jiġi żgurat li r-riżorsi tas-sajd jinżammu jew jiġu rrestawrati għal livelli sostenibbli;
• il-ħarsien tal-bijodiversità fl-ambjent tal-baħar;
• il-prevenzjoni jew l-eliminazzjoni tas-sajd żejjed u l-kapaċità żejda tas-sajd;
• l-iżgurar li d-data dwar l-attivitajiet tas-sajd, inkluż l-impatt fuq speċijiet mhux fil-mira, tkun kompluta u preċiża;
• l-iżgurar ta’ konformità mar-regoli ta’ konservazzjoni u ġestjoni, flimkien ma’ sanzjonijiet li jiskoraġġixxu l-ksur u jipprevjenu lil trasgressuri milli jibbenefikaw mill-attivitajiet illegali tagħhom;
• il-minimizzazzjoni tat-tniġġis u l-iskart li ġejjin minn bastimenti tas-sajd, qbid skartat jew irkaptu abbandunat.

Fl-applikazzjoni tal-approċċ ta’ prekawzjoni, il-partijiet għandhom:

• ikunu aktar kawti meta l-informazzjoni tkun inċerta, mhux affidabbli jew mhux adegwata;
• ma jużawx in-nuqqas ta’ informazzjoni xjentifika adegwata bħala raġuni għaliex ma jiħdux azzjoni ta’ konservazzjoni u ġestjoni;
• iqisu l-aħjar prattika internazzjonali.

L-approċċ tal-ekosistema huwa approċċ integrat fejn jittieħdu deċiżjonijiet biex jiġu salvagwardjati l-ekosistemi tal-baħar usa’ u jiġu żgurati l-konservazzjoni fit-tul u l-użu sostenibbli tar-riżorsi.

Organizzazzjoni

• Il-konvenzjoni toħloq il-Kummissjoni tas-Sajd tal-Paċifiku tat-Tramuntana (NPFC), b’membru wieħed minn kull parti kontraenti, li tiltaqa’ mill-inqas kull sentejn.
• Hemm żewġ korpi sussidjarji: Kumitat Xjentifiku u Kumitat Tekniku u ta’ Konformità.
• L-NPFC tista’ wkoll twaqqaf korpi sussidjarji oħra biex jintlaħqu l-għanijiet tal-konvenzjoni.

Konservazzjoni u ġestjoni

• L-NPFC għandha għadd ta’ responsabbiltajiet inkluż li tiddetermina:
  • in-natura u l-firxa tas-sajd għal kwalunkwe riżorsa tas-sajd, inkluż il-qabda totali permissibbli jew l-isforz totali permissibbli tas-sajd;
  • żoni fejn jista’ jseħħ is-sajd;
  • perjodi meta jista’ jsir is-sajd;
  • limiti tad-daqs ta’ qabda li tista’ tinżamm;
  • tipi permessi ta’ rkaptu, teknoloġija jew prattiki.
• L-NPFC għandha tistabbilixxi proċeduri għall-monitoraġġ, il-kontroll u s-sorveljanza tas-sajd, sabiex tiġi żgurata l-konformità mal-konvenzjoni.
• L-NPFC għandu jistabbilixxi wkoll programm ta’ osservaturi biex jiġbor data vverifikata dwar il-qabda u l-isforz, data xjentifika oħra u informazzjoni addizzjonali relatata mal-attività tas-sajd u l-impatti tagħha fuq l-ambjent tal-baħar.

DATA TAD-DĦUL FIS-SEĦĦ

Il-konvenzjoni daħlet fis-seħħ fit-23 ta’ Marzu 2022.

SFOND

Għal aktar informazzjoni, ara:

• Oċeani u sajd (il-Kummissjoni Ewropea).

DOKUMENTI PRINĊIPALI

Il-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fit-Tramuntana tal-Oċean Paċifiku (ĠU L 55, 28.2.2022, pp. 14–32).

Id-Deċiżjoni tal-Kunsill (UE) 2022/314 tal-25 ta’ Frar 2022 dwar l-adeżjoni tal-Unjoni Ewropea għall-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fit-Tramuntana tal-Oċean Paċifiku (ĠU L 55, 28.2.2022, pp. 12–13).

DOKUMENTI RELATATI

Il-Konvenzjoni Tan-Nazzjonijiet Uniti Dwar Il-Liġi Tal-Baħar (Konvenzjoni ta’ Montego Bay) (ĠU L 179, 23.6.1998, pp. 3–134).

Id-Deċiżjoni tal-Kunsill 98/392/KE tat-23 ta’ Marzu 1998 li tirrigwarda l-konklużjoni mill-Komunità Ewropea tal-Konvenzjoni tan-Nazzjonijiet Uniti tal-10 ta’ Diċembru 1982 dwar il-Liġi tal-Baħar u l-Ftehim tat-28 ta’ Lulju 1994 li għandu x’jaqsam mal-implimentazzjoni tal-Parti XI tiegħu (ĠU L 179, 23.6.1998, pp. 1–2).

l-aħħar aġġornament 26.04.2022