Il-baġit tal-UE 2021: €164.3 biljun

SOMMARJU TA’:

Adozzjoni definittiva (UE, Euratom) 2021/417 tal-baġit ġenerali tal-UE għall-2021

X’INHU L-GĦAN TAL-ATT?

Huwa t-test maqbul mill-Parlament Ewropew u mill-Kunsill tal-Unjoni Ewropea li jadotta l-baġit tal-UE għall-2021.
Dan huwa stabbilit għal €164.3 biljun f’impenji* tal-infiq u €166.1 biljun f’approprjazzjoni ta’ pagamenti*.
Dan jirrappreżenta –5.5 % għal dawk tal-ewwel u +1.2 % għal dawn tal-aħħar, meta mqabbla mal-baġit tal-2020.

PUNTI EWLENIN

Il-baġit jimmobilizza fondi pubbliċi sinjifikanti biex:

jirrispondi għall-pandemija tal-coronavirus u l-firxa wiesgħa tal-konsegwenzi tagħha;
jagħtu bidu lil irkupru ekonomiku sostenibbli, u jipproteġi u joħloq impjiegi;
jinvesti f’UE aktar ekoloġika, aktar diġitali u aktar reżiljenti.

L-oqsma ewlenin tan-nefqa huma kif ġej.

	Impenji (€ miljun)	Pagamenti (€ miljun)
Suq uniku, innovazzjoni u diġitali	20 817	17 192
Koeżjoni u valuri Koeżjoni ekonomika, soċjali u territorjali Reżiljenza u valuri	52 862 48 191 4 671	66 154 61 868 4 286
Riżorsi naturali u l-ambjent Nefqa relatata mas-suq u għajnuniet diretti	58 569 40 368	56 804 40 354
Il-migrazzjoni u l-ġestjoni tal-fruntieri	2 279	2 686
Is-sigurtà u d-difiża	1 709	671
Il-viċinat u d-dinja	16 097	10 811
Amministrazzjoni pubblika Ewropea	10 448	10 450
Strumenti speċjali tematiċi (Riżerva ta’ Solidarjetà u Għajnuna ta’ Emerġenza, Fond Ewropew ta’ Aġġustament għall-Globalizzazzjoni, Riżerva ta’ Aġġustament għall-Brexit)	1 471	1 293
Approprjazzjonijiet totali	164 252	166 061

Il-baġit jidentifika l-impenji ta’ prijorità speċifiċi li ġejjin:

€48.2 biljun f’impenji sabiex jappoġja l-irkupru u jagħti spinta lill-investiment fil-koeżjoni ekonomika, soċjali u territorjali;
€55.7 biljun għall-politika agrikola komuni u €760.7 miljun għall-Fond Ewropew għall-Affarijiet Marittimi u s-Sajd, għall-bdiewa u s-sajjieda tal-UE, iżda wkoll biex tissaħħaħ ir-reżiljenza tas-setturi agroalimentari u tas-sajd u għall-provvediment tal-ambitu meħtieġ għall-immaniġġjar tal-kriżijiet;
€1.1 biljun għall-programm Ewropa diġitali, għad-difiża ċibernetika tal-UE u għall-appoġġ tat-tranżizzjoni diġitali;
€1.1 biljun taħt il-Fond għal Tranżizzjoni Ġusta u €738.5 miljun taħt il-Programm LIFE għall-appoġġ tal-azzjoni klimatika ambjentali;
€2.8 biljun għall-Faċilità Nikkollegaw l-Ewropa għal infrastruttura tat-trasport ta’ prestazzjoni għolja aġġornata biex tiffaċilita l-konnessjonijiet transkonfinali;
€575 miljun għall-programm tas-suq Uniku, u €36.2 miljun u €126.9 miljun rispettivament għall-programmi li jappoġġjaw il-kooperazzjoni fl-oqsma tat-tassazzjoni u d-dwana;
€2.7 biljun għall-Erasmus+ sabiex jinvesti fiż-żgħażagħ, u €306.4 miljun għas-setturi kulturali u kreattivi permezz tal-programm Ewropa kreattiva;
€873.3 miljun għall-Fond għall-Migrazzjoni u l-Ażil u €533.5 miljun għall-Fond għall-Ġestjoni Integrata tal-Fruntieri, biex iżid il-kooperazzjoni dwar il-ġestjoni tal-fruntieri esterni u l-politika dwar il-migrazzjoni u l-ażil;
€175.6 miljun għall-Fond għas-Sigurtà Interna u €945.7 miljun għall-Fond Ewropew għad-Difiża, biex jappoġġjaw l-awtonomija u s-sigurtà strateġika tal-UE;
€12.1 biljun biex jappoġġjaw il-ġirien tagħna u l-iżvilupp u l-kooperazzjoni internazzjonali, flimkien ma’ €1.9 biljun għall-għajnuna ta’ qabel l-adeżjoni, inkluż fil-Balkani tal-Punent.

MINN META JAPPLIKA L-BAĠIT?

Dan ilu japplika mill-1 ta’ Jannar 2021.

SFOND

Fl-4 ta’ Diċembru 2020, il-Parlament, il-Kunsill u l-Kummissjoni Ewropea laħqu ftehim politiku informali dwar il-baġit tal-UE 2021. Din hija l-ewwel taħt il-baġit fit-tul għall-2021–2027 (il-qafas finanzjarju pluriennali) stabbilit skont ir-Regolament (UE, Euratom) 2020/2093, li se jipprovdi € 1 074 triljun ta’ finanzjament tal-UE matul is-7 snin li ġejjin (ara s-sommarju).

B’mod partikolari, il-baġit fit-tul tal-UE huwa akkumpanjat minn NextGenerationEU, mekkaniżmu ta’ finanzjament ta’ rkupru eċċezzjonali u temporanju li jagħti s-setgħa lill-Kummissjoni biex tissellef sa €807 biljun (jew €750 biljun fil-prezzijiet tal-2018) f’isem l-UE, għal miżuri ta’ rkupru marbuta ma’ impenji matul il-perjodu 2021–2023. Id-dħul fis-seħħ tad-deċiżjoni l-ġdida dwar ir-riżorsi proprji fl-1 ta’ Ġunju 2021 jippermetti lill-Kummissjoni biex tibda malajr l-operazzjonijiet ta’ self biex tiġbor il-fondi meħtieġa għall-pagamenti relatati ma’ NextGenerationEU u tgħin liċ-ċittadini, lin-negozji, lir-reġjuni u lill-ibliet tal-UE jirkupraw mill-pandemija.

Għal aktar informazzjoni, ara:

Baġit tal-UE (il-Kummissjoni Ewropea)
Skeda informattiva dwar il-baġit tal-UE 2021 (il-Kummissjoni Ewropea).

TERMINI EWLENIN

Impenji: reżervazzjoni ta’ flus biex jiġu koperti spejjeż sussegwenti. Din hija l-ispiża total tal-obbligi legali (kuntratti, ftehimiet/deċiżjonijiet ta’ għotjiet) biex tipprovdi finanzjament f’sena partikolari, jekk kemm-il darba jissodisfaw ċerti kundizzjonijiet.

Pagamenti: flus li se jitħallsu permezz ta’ trasferimenti ta’ flus kontanti jew bankarji lill-benefiċjarji matul is-sena baġitarja.

DOKUMENT EWLIENI

Adozzjoni definittiva (UE, Euratom) 2021/417 tal-baġit ġenerali tal-Unjoni Ewropea għas-sena finanzjarja 2021 (ĠU L 93, 17.3.2021, pp. 1-2286)

DOKUMENTI RELATATI

Ir-Regolament (UE) Nru 2021/241 tal-Parlament Ewropew u tal-Kunsill tat-12 ta’ Ottubru 2021 li jistabbilixxi l-Faċilità għall-Irkupru u r-Reżiljenza (ĠU L 57, 18.2.2021, pp. 17-75)

Ir-Regolament tal-Kunsill (UE, Euratom) Nru 2020/2093tas-17 ta’ Diċembru 2020 li jistabbilixxi l-qafas finanzjarju pluriennali għas-snin mill-2021 sal-2027 (ĠU L 433I, 22.12.2020, pp. 11-22)

Ir-Regolament tal-Kunsill (UE) 2020/2094 tal-14 ta’ Diċembru 2020 li jistabbilixxi Strument tal-Unjoni Ewropea għall-Irkupru biex jappoġġa l-irkupru wara l-kriżi tal-COVID-19 (ĠU L 433I, 22.12.2020, pp. 23-27)

Id-Deċiżjoni tal-Kunsill (UE, Euratom) 2020/2053 tal-14 ta’ Diċembru 2020 dwar is-sistema tar-riżorsi proprji tal-Unjoni Ewropea u li tħassar id-Deċiżjoni 2014/335/UE, Euratom (ĠU L 424, 15.12.2020, pp. 1-10)

l-aħħar aġġornament 21.06.2021