L-ilma tax-xorb — standards essenzjali tal-kwalità
SOMMARJU TA’:
Id-Direttiva (UE) 2020/2184 dwar il-kwalità tal-ilma maħsub għall-konsum mill-bniedem (riformulazzjoni)
X’INHU L-GĦAN TAD-DIRETTIVA?
Din tfittex li tintroduċi regoli riveduti biex tipproteġi s-saħħa tal-bniedem mill-kontaminazzjoni tal-ilma maħsub għall-konsum mill-bniedem billi tiżgura li jkun “tajjeb għas-saħħa u nadif”, filwaqt li tfittex ukoll li tintroduċi rekwiżiti iġjeniċi għal materjali f’kuntatt mal-ilma tax-xorb, bħal pajpijiet, kif ukoll:
- ittejjeb l-aċċess għall-ilma maħsub għall-konsum mill-bniedem;
- tintroduċi approċċ kosteffettiv ibbażat fuq ir-riskju għall-monitoraġġ tal-kwalità tal-ilma.
PUNTI EWLENIN
L-ilma maħsub għall-konsum mill-bniedem huwa ddefinit bħala:
- l-ilma kollu, fl-istat oriġinali tiegħu jew wara trattament, maħsub għax-xorb, tisjir, tħejjija tal-ikel jew għanijiet oħra domestiċi f’postijiet pubbliċi jew privati, irrispettivament mill-oriġini tiegħu u minn jekk huwiex fornut minn network ta’ distribuzzjoni, fornut minn bawżer jew imqiegħed fi fliexken jew kontenituri, inkluż ilma tan-nixxiegħa;
- l-ilma kollu użat fi kwalunkwe negozju tal-ikel għall-manifattura, l-ipproċessar, il-preservazzjoni jew il-kummerċjalizzazzjoni ta’ prodotti jew sustanzi maħsuba għall-konsum mill-bniedem.
Eżenzjonijiet mid-Direttiva
Id-Direttiva ma tapplikax għal:
- ilmijiet minerali naturali (iżda mhux ilma tan-nixxiegħa) kif imsemmija fid-Direttiva 2009/54/KE (ara s-sommarju); jew
- ilmijiet li huma prodotti mediċinali kif iddefiniti fid-Direttiva 2001/83/KE (ara s-sommarju).
Barra minn hekk, il-pajjiżi tal-UE jistgħu jeżentaw:
- ilma maħsub esklussivament għal dawk l-għanijiet li għalihom l-awtoritajiet ikunu sodisfatti li l-kwalità ma għandha l-ebda influwenza, jew direttament jew indirettament, fuq is-saħħa tal-konsumatur;
- ilma għall-konsum mill-bniedem minn provvista individwali li tipprovdi medja ta’ inqas minn 10 m3 kuljum jew li taqdi inqas minn 50 persuna, sakemm l-ilma ma jiġix fornut bħala parti minn attività kummerċjali jew pubblika.
Il-bastimenti marittimi li jwettqu desalinizzazzjoni tal-ilma, iġorru l-passiġġieri u jaġixxu bħala fornituri tal-ilma mhumiex suġġetti għal xi aspetti tad-Direttiva, inklużi s-sustanzi kimiċi għat-trattament u l-filtri.
L-istandards tal-kwalità tal-ilma
Il-pajjiżi tal-UE għandhom jiżguraw li l-ilma maħsub għall-konsum mill-bniedem ikun “tajjeb għas-saħħa u nadif”. Ma jkunx fih mikroorganiżmi u parassiti u sustanzi li, f’numri jew konċentrazzjonijiet, jistgħu jkunu ta’ periklu għas-saħħa tal-bniedem. B’mod speċifiku, għandu jissodisfa r-rekwiżiti minimi li ġejjin.
- Parametri mikrobijoloġiċi. L-ilma ma għandux ikun fih:
- Enterokokki intestinali; u
- E.coli
- Parametri kimiċi. Il-kwantitajiet ta’ sustanzi kimiċi ma għandhomx jaqbżu l-valuri li ġejjin (Nota: g/l = grammi għal kull litru, mg/l = milligrammi għal kull litru, u μg/l = mikrogrammi għal kull litru):
- Akrilammid 0.10 μg/l
- Antimonju 10 μg/l
- Arseniku 10 μg/l
- Benżen 1.0 μg/l
- Benżo(a)piren 0.010 μg/l
- Bisfenol A 2.5 μg/l
- Boron 1.5 mg/l
- Bromat 10 μg/l
- Kadmju 5.0 μg/l
- Klorat 0.25 mg/l
- Klorit 0.25 mg/l
- Kromju 25 μg/l
- Ram 2.0 mg/l
- Ċjanur 50 μg/l
- 1,2-dikloroetan 3.0 μg/l
- Epikloroidrin 0.10 μg/l
- Fluworur 1.5 mg/l
- Aċidi Aloaċetiċi (HAAs) 60 μg/l
- Ċomb 5 μg/l
- Merkurju 1.0 μg/l
- Microċistina-LR 1.0 μg/l
- Nikil 20 μg/l
- Nitrat 50 mg/l
- Nitrit 0.50 mg/l
- Pestiċidi 0.10 μg/l
- Pestiċidi Total 0.50 μg/l
- PFAS Total 0.50 μg/l
- Għadd ta’ PFAS 0.10 μg/l
- Idrokarburi aromatiċi poliċikliċi 0.10 μg/l
- Selenju 20 μg/l
- Tetrakloroeten u Trikloroeten 10 μg/l
- Triħalometani Total 100 μg/l
- Uranju 30 μg/l
- Klorur tal-vinil 0,50 μg/l.
- Parametri rilevanti għall-valutazzjoni tar-riskju tas-sistemi ta’ distribuzzjoni domestika (eż. pajpijiet, tankijiet). Dawn huma:
- Legionella 1,000 CFU/g*/l
- Ċomb 10 μg/l.
- Parametri indikaturi. Dan jinkludi l-preżenza ta’ aġenti aggressivi jew korrużivi. Jekk dawn ikunu ogħla mil-limiti stabbiliti fid-Direttiva, il-pajjiżi tal-UE għandhom jivvalutaw jekk dan in-nuqqas ta’ konformità joħloqx riskju għas-saħħa tal-bniedem u jieħdu azzjoni ta’ rimedju.
Il-pajjiżi tal-UE għandhom ukoll jikkonformaw mar-regoli l-oħra tad-Direttiva.
Valutazzjoni tar-riskju
Il-pajjiżi tal-UE jiżguraw li jitwettqu l-valutazzjoni tar-riskju u l-ġestjoni tar-riskju taż-żoni ta’ wesgħa għall-punti tal-astrazzjoni tal-ilma tax-xorb u tas-sistemi tal-provvista, kif ukoll valutazzjoni tar-riskju tas-sistemi ta’ distribuzzjoni domestiċi, u jekk ir-riskji potenzjali jaffettwawx il-kwalità tal-ilma, inkluż l-identifikazzjoni ta’ perikli fis-sistema u l-applikazzjoni ta’ miżuri ta’ kontroll.
Materjali li jiġu f’kuntatt mal-ilma tax-xorb
Il-pajjiżi tal-UE jiżguraw li l-materjali użati għall-astrazzjoni, it-trattament, il-ħżin jew id-distribuzzjoni tal-ilma li jiġu f’kuntatt mal-ilma:
- ma jikkompromettux is-saħħa tal-bniedem direttament jew indirettament;
- ma jaffettwawx b’mod negattiv il-kulur, ir-riħa jew it-togħma tal-ilma;
- ma jżidux fit-tkabbir mikrobjali;
- ma jħollux kontaminanti fl-ilma f’livelli li huma ogħla milli meqjus meħtieġ għall-għan maħsub tal-materjal.
Metodoloġiji u proċeduri addizzjonali tal-ittestjar għall-aċċettazzjoni ta’ sustanzi tal-bidu u materjali finali awtorizzati (sat-12 ta’ Jannar 2024), kif ukoll listi ta’ sustanzi tal-bidu awtorizzati (sat-12 ta’ Jannar 2025) se jiddaħħlu gradwalment.
Aċċess, informazzjoni, monitoraġġ u evalwazzjoni
Il-pajjiżi tal-UE għandhom:
- itejbu jew iżommu l-aċċess għall-ilma tax-xorb għal kulħadd, b’mod partikolari għal gruppi vulnerabbli u emarġinati;
- jiżguraw li tkun disponibbli informazzjoni adegwata u aġġornata dwar l-ilma tax-xorb;
- jistabbilixxu sat-12 ta’ Jannar 2029 sett ta’ data ta’ miżuri meħuda biex jittejjeb l-aċċess għall-ilma maħsub għall-konsum mill-bniedem u jiġi promoss l-użu tiegħu;
- jistabbilixxu sat-12 ta’ Lulju 2027 sett ta’ data ta’ valutazzjoni tar-riskju u ġestjoni tar-riskju u monitoraġġ taż-żoni ta’ wesgħa għall-punti tal-astrazzjoni tal-ilma;
- jistabbilixxu settijiet ta’ data ta’ riżultati ta’ monitoraġġ tal-kwalità tal-ilma, inċidenti u kwalunkwe deroga mogħtija.
Il-Kummissjoni Ewropea se twettaq evalwazzjoni tad-Direttiva sat-12 ta’ Jannar 2035 u, sadanittant, tirrevedi l-istandards mikrobjali u kimiċi kif ukoll il-proċeduri ta’ monitoraġġ, teħid ta’ kampjuni u valutazzjoni tar-riskju, mill-inqas kull 5 snin.
Tħassir
Id-Direttiva tirriformula u tħassar id-Direttiva 98/83/KE u l-emendi sussegwenti tagħha (ara s-sommarju) mit-12 ta’ Jannar 2023.
MINN META BDIET TAPPLIKA D-DIRETTIVA?
Din ilha tapplika mit-12 ta’ Jannar 2021 u għandha ssir liġi fil-pajjiżi tal-UE sat-12 ta’ Jannar 2023 (xi aspetti sat-12 ta’ Jannar 2026).
SFOND
Għal aktar informazzjoni, ara:
TERMINI EWLENIN
CFU (unità li tifforma kolonja): unità użata fil-mikrobijoloġija biex jiġi stmat l-għadd ta’ batterji vijabbli jew ċelloli fungali f’kampjun. Vijabbli hija ddefinita bħala l-abbiltà ta’ multiplikazzjoni permezz tal-fissjoni binarja f’kundizzjonijiet kontrollati.
DOKUMENT EWLIENI
Id-Direttiva (UE) 2020/2184 tal-Parlament Ewropew u tal-Kunsill tas-16 ta’ Diċembru 2020 dwar il-kwalità tal-ilma maħsub għall-konsum mill-bniedem (riformulazzjoni) (ĠU L 435, 23.12.2020, pp. 1-62)
DOKUMENTI RELATATI
Ir-Regolament (UE) 2019/1020 tal-Parlament Ewropew u tal-Kunsill tal-20 ta’ Ġunju 2019 dwar is-sorveljanza tas-suq u l-konformità tal-prodotti u li jemenda d-Direttiva 2004/42/KE u r-Regolamenti (KE) Nru 765/2008 u (UE) Nru 305/2011 (ĠU L 169, 25.6.2019, pp. 1-44)
Id-Direttiva tal-Kummissjoni (UE) 2015/1787 tas-6 ta’ Ottubru 2015 li temenda l-Anness II u III tad-Direttiva tal-Kunsill 98/83/KE dwar il-kwalità tal-ilma maħsub għall-konsum mill-bniedem (ĠU L 260, 7.10.2015, pp. 6-17)
Id-Direttiva 2009/54/KE tal-Parlament Ewropew u tal-Kunsill tat-18 ta’ Ġunju 2009 dwar l-isfruttament u t-tqegħid fis-suq ta’ ilmijiet minerali naturali (Riformulazzjoni) (ĠU L 164, 26.6.2009, pp. 45-58)
Id-Direttiva 2001/83/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (ĠU L 311, 28.11.2001, pp. 67-128)
L-emendi suċċessivi għad-Direttiva 2001/83/KE ġew inkorporati fit-test oriġinali. Din il-verżjoni konsolidata għandha valur dokumentarju biss.
Id-Direttiva 2000/60/KE tal-Parlament Ewropew u tal-Kunsill tat-23 ta’ Ottubru 2000 li tistabilixxi qafas għal azzjoni Komunitarja fil-qasam tal-politika tal-ilma (ĠU L 327, 22.12.2000, pp. 1-73)
Ara l-verżjoni kkonsolidata.
l-aħħar aġġornament 10.02.2021