L-Istrateġija “Mill-Għalqa sal-Platt” għal sistema tal-ikel ġusta, tajba għas-saħħa u favur l-ambjent

SOMMARJU TA’:

Komunikazzjoni: Strateġija “Mill-Għalqa sal-Platt” għal sistema tal-ikel ġusta, tajba għas-saħħa u favur l-ambjent

X’INHU L-GĦAN TAL-KOMUNIKAZZJONI?

Din tistabbilixxi l-istrateġija ““Mill-Għalqa sal-Platt”” li għandha l-għan li tħaffef it-tranżizzjoni tal-UE għal sistema tal-ikel sostenibbli li:

• ikollha impatt ambjentali newtrali jew pożittiv;
• tgħin biex jittaffa t-tibdil fil-klima u tadatta għall-impatti tiegħu;
• treġġa’ lura t-telfien tal-bijodiversità;
• tiżgura s-sigurtà tal-ikel, in-nutrizzjoni u s-saħħa pubblika, filwaqt li tiżgura li kulħadd ikollu aċċess għal ikel suffiċjenti, sikur, nutrittiv u sostenibbli;
• tippreserva l-affordabbiltà tal-ikel filwaqt li tiġġenera redditu ekonomiku aktar ġust, trawwem il-kompetittività tas-settur tal-provvista tal-UE u tippromwovi l-kummerċ ġust.

PUNTI EWLENIN

Patt Ekoloġiku Ewropew

L-istrateġija ““Mill-Għalqa sal-Platt”” hija element ewlieni tal-Patt Ekoloġiku Ewropew (ara s-sommarju) u taħdem flimkien mal-istrateġija tal-UE għall-bijodiversità għall-2030 (ara s-sommarju).

Sistema tal-ikel sostenibbli

L-istrateġija hija mfassla biex twassal sistema tal-ikel sostenibbli billi tindirizza għadd ta’ kwistjonijiet:

• l-iżgurar ta’ produzzjoni sostenibbli tal-ikel;
• l-iżgurar tas-sigurtà sostenibbli tal-ikel;
• l-istimular tal-ipproċessar sostenibbli tal-ikel, il-bejgħ bl-ingrossa, il-bejgħ bl-imnut, l-ospitalità u l-prattiki tas-servizzi tal-ikel;
• il-promozzjoni tal-konsum sostenibbli tal-ikel u l-iffaċilitar tal-bidla għal dieti tajbin għas-saħħa u sostenibbli;
• it-tnaqqis fit-telf u l-ħela ta’ ikel;
• il-ġlieda kontra l-frodi alimentari tul il-katina tal-provvista tal-ikel.

Pjan ta’ azzjoni

Abbozz ta’ pjan ta’ azzjoni huwa anness mal-Komunikazzjoni. Dan fih lista ta’ proposti għal leġiżlazzjoni ġdida u lista ta’ leġiżlazzjoni attwali li għandha tiġi riveduta, kif ukoll għadd ta’ rieżamijiet u inizjattivi oħra. Dawn jinkludu:

• proposta biex tiġi riveduta d-Direttiva 2009/128/KE dwar l-użu sostenibbli tal-pestiċidi (ara s-sommarju) biex jitnaqqas b’mod sinifikanti l-użu, ir-riskju u d-dipendenza fuq il-pestiċidi u tittejjeb il-ġestjoni integrata tal-pesti;
• proposta għal tikkettar dwar in-nutrizzjoni fuq il-parti ta’ quddiem tal-pakkett armonizzat u obbligatorju biex il-konsumaturi jkunu jistgħu jagħmlu għażliet dwar l-ikel b’kunsiderazzjoni tas-saħħa, li ssegwi r-rapport tal-Kummissjoni Ewropea dwar l-użu ta’ tikkettar dwar in-nutrizzjoni fuq il-parti ta’ quddiem tal-pakkett li jirriżulta mir-Regolament (UE) Nru 1169/2011 (ara s-sommarju);
• l-istabbiliment ta’ profili nutrizzjonali biex tiġi ristretta l-promozzjoni ta’ ikel b’livell għoli ta’ melħ, zokkor u/jew xaħam, li jsegwi d-dokument ta’ ħidma tal-Kummissjoni li jevalwa r-Regolament (KE) Nru 1924/2006 dwar indikazzjonijiet dwar in-nutrizzjoni u s-saħħa (ara s-s-sommarju);
• l-evalwazzjoni u r-reviżjoni tal-leġiżlazzjoni eżistenti dwar il-benessri tal-annimali, inkluż dwar it-trasport tal-annimali u l-qtil tal-annimali, li torbot mal-pjan direzzjonali tal-Kummissjoni għall-kontroll tal-idoneità tal-leġiżlazzjoni tal-UE dwar il-benessri tal-annimali.

Miri sal-2030

L-istrateġija tistabbilixxi għadd ta’ miri konkreti li għandhom jintlaħqu sal-2030:

• Il-pestiċidi. Jitnaqqas b’50 % l-użu u r-riskju ta’ pestiċidi kimiċi u l-użu ta’ pestiċidi aktar perikolużi.
• In-nutrijenti. Jitnaqqas it-telf tan-nutrijenti b’mill-inqas 50 % filwaqt li jiġi żgurat li ma jkun hemm l-ebda telf fil-fertilità tal-ħamrija u jitnaqqas l-użu tal-fertilizzant b’mill-inqas 20 %.
• Ir-reżistenza għall-antimikrobiċi. Jitnaqqas b’50 % l-użu ta’ antimikrobiċi bħall-antibijotiċi għall-annimali mrobbija f’razzett u l-akkwakultura.
• Il-biedja organika. Mill-inqas 25 % tar-raba’ tkun taħt biedja organika.

L-istrateġija għandha wkoll l-għan li jkollha broadband veloċi disponibbli fiż-żoni rurali kollha sal-2025.

SFOND

Għal aktar informazzjoni, ara:

• Mill-Għalqa sal-Platt (Kummissjoni Ewropea).

DOKUMENT EWLIENI

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni –– Strateġija “Mill-Għalqa sal-Platt” għal sistema tal-ikel ġusta, tajba għas-saħħa u favur l-ambjent (COM(2020) 381 final, 20.5.2020)

DOKUMENTI RELATATI

Ir-Rapport mill-Kummissjoni lill-Parlament Ewropew u lill-Kunsill – Dwar l-esperjenza miksuba mill-Istati Membri b’rabta mal-implimentazzjoni tal-miri nazzjonali stabbiliti fil-Pjanijiet ta’ Azzjoni Nazzjonali tagħhom u mal-progress fl-implimentazzjoni tad-Direttiva 2009/128/KE dwar l-użu sostenibbli tal-pestiċidi (COM(2020) 204 final, 20.5.2020)

Id-Dokument ta’ ħidma tal-persunal tal-Kummissjoni: Evalwazzjoni tar-Regolament (KE) Nru 1924/2006 dwar indikazzjonijiet dwar in-nutrizzjoni u s-saħħa mogħtija fuq l-ikel fir-rigward ta’ profili nutrizzjonali u indikazzjonijiet dwar is-saħħa mogħtija fuq il-pjanti u t-tħejjijiet tagħhom u tal-qafas regolatorju ġenerali għall-użu tagħhom fuq l-ikel (SWD(2020) 95 final, 20.5.2020)

Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni –– Strateġija tal-UE għall-Bijodiversità għall-2030 — Inreġġgħu n-natura lura f’ħajjitna (COM(2020) 380 final, 20.5.2020)

Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Il-Patt Ekoloġiku Ewropew (COM(2019) 640 final, 11.12.2019)

Ir-Regolament (UE) Nru 1169/2011 tal-Parlament Ewropew u tal-Kunsill tal-25 ta’ Ottubru 2011 dwar l-għoti ta’ informazzjoni dwar l-ikel lill-konsumaturi, li jemenda r-Regolamenti (KE) Nru 1924/2006 u (KE) Nru 1925/2006 tal-Parlament Ewropew u tal-Kunsill u li jħassar id-Direttiva tal-Kummissjoni 87/250/KEE, id-Direttiva tal-Kunsill 90/496/KEE, id-Direttiva tal-Kummissjoni 1999/10/KE, id-Direttiva 2000/13/KE tal-Parlament Ewropew u tal-Kunsill, id-Direttivi tal-Kummissjoni 2002/67/KE u 2008/5/KE u r-Regolament tal-Kummissjoni (KE) Nru 608/2004 (ĠU L 304, 22.11.2011, pp. 18-63)

L-emendi suċċessivi għar-Regolament (UE) Nru 1169/2011 ġew inkorporati fit-test oriġinali. Din il-verżjoni konsolidata għandha valur dokumentarju biss.

Id-Direttiva 2009/128/KE tal-Parlament Ewropew u tal-Kunsill tal-21 ta’ Ottubru 2009 li tistabbilixxi qafas għal azzjoni Komunitarja biex jinkiseb użu sostenibbli tal-pestiċidi (ĠU L 309, 24.11.2009, pp. 71-86)

Ara l-verżjoni kkonsolidata.

l-aħħar aġġornament 05.02.2021