Il-ġestjoni tas-sikurezza tal-infrastruttura tat-toroq

PUNTI EWLENIN

Id-Direttiva 2008/96/KE ġiet emendata bid-Direttiva (UE) 2019/1936 bħala parti mit-tielet pakkett tal-Kummissjoni Ewropea “Ewropa Attiva”.

Kif emendata, id-Direttiva tirrikjedi li l-pajjiżi tal-UE jistabbilixxu u jimplimentaw proċeduri relatati ma’:

• valutazzjonijiet tal-impatt tas-sikurezza fit-toroq;
• verifiki tas-sikurezza fit-toroq;
• spezzjoni tas-sikurezza fit-toroq;
• valutazzjonijiet tas-sikurezza fit-toroq man-netwerk kollu;
• l-iskambju tal-aħjar prattiki u t-titjib kontinwu tagħhom.

Kamp ta’ applikazzjoni

Id-Direttiva emendata għandha kamp ta’ applikazzjoni estiż. Din tapplika għal:

• toroq li huma parti min-netwerk tat-toroq trans-Ewropew, għall-awtostradi u għal toroq primarji oħra, kemm jekk huma fl-istadju tad-disinn, qed jinbnew jew qed jintużaw;
• toroq oħra li jinsabu barra ż-żoni urbani, li ma jservux proprjetajiet li jmissu magħhom, u li jitlestew bl-użu ta’ finanzjament mill-UE, ħlief għal toroq li mhumiex miftuħa għat-traffiku ġenerali, jew li mhumiex iddisinjati għalih.

Valutazzjoni tas-sikurezza fit-toroq

• Il-pajjiżi tal-UE għandhom iwettqu valutazzjoni tas-sikurezza fit-toroq man-netwerk kollu, sa mhux aktar tard mill-2024 u kull ħames snin wara dan, fuq in-netwerk kollu tat-toroq li jkun qed jopera li huwa kopert mid-Direttiva. Dawn il-valutazzjonijiet għandhom jivvalutaw ir-riskju ta’ inċidenti u ta’ severità tal-impatt, abbażi ta’:
  • eżami viżwali, jew fuq il-post jew b’mezzi elettroniċi, tal-karatteristiċi tad-disinn tat-triq; u
  • analiżi tas-sezzjonijiet tan-netwerk tat-toroq li ilhom joperaw għal aktar minn 3 snin u fejn kien hemm numru kbir ta’ inċidenti serji meta mqabbel mal-fluss tat-traffiku.
• Is-sejbiet tal-valutazzjoni għandhom jiġu segwiti minn spezzjonijiet tas-sikurezza fit-toroq immirati jew, jekk ikun meħtieġ, minn azzjoni rimedjali.
• Għandhom isiru wkoll spezzjonijiet perjodiċi tas-sikurezza fit-toroq, ta’ spiss biżżejjed biex jinżammu livelli adegwati ta’ sikurezza għall-infrastruttura tat-toroq inkwistjoni.
• Il-ħtiġijiet speċifiċi tal-utenti vulnerabbli tat-triq bħaċ-ċiklisti u l-persuni mexjin għandhom jiġu kkunsidrati sistematikament fil-proċeduri kollha tal-ġestjoni tas-sikurezza fit-toroq.
• Il-valutazzjonijiet tas-sikurezza għandhom jiġu ppubblikati biex jenfasizzaw il-livell tas-sikurezza tal-infrastrutturi tat-toroq madwar l-UE.

Marki u sinjali tat-triq

• Il-proċeduri eżistenti u futuri għall-marki u s-sinjali tat-triq għandhom jiffukaw fuq il-qari u l-identifikazzjoni tas-sewwieqa umani u s-sistemi ta’ assistenza tas-sewwieqa awtomatizzati.
• Valutazzjoni minn grupp ta’ esperti stabbilit mill-Kummissjoni għandha, sa Ġunju 2021, tivvaluta l-opportunità li jiġu stabbiliti regoli komuni filwaqt li tqis:
  • l-interazzjoni bejn id-diversi teknoloġiji tal-assistenza tas-sewwieq u l-infrastruttura;
  • l-effett tal-fenomeni tat-temp u tal-atmosfera kif ukoll tat-traffiku fuq il-marki u s-sinjali tat-triq preżenti fit-territorju tal-UE;
  • it-tip u l-frekwenza tal-isforzi ta’ manutenzjoni meħtieġa għal diversi teknoloġiji, inkluża stima tal-ispejjeż.

Informazzjoni u trasparenza

• Il-pajjiżi tal-UE għandhom jinnotifikaw lill-Kummissjoni bl-awtostradi u t-toroq primarji kollha fuq in-netwerks tagħhom, kif ukoll dawk it-toroq eżentati minħabba li wrew li għandhom riskju baxx ta’ sikurezza, sas-17 ta’ Diċembru 2021.
• Il-Kummissjoni għandha tippubblika mappa tan-netwerk Ewropew tat-toroq fi ħdan il-kamp ta’ applikazzjoni tad-Direttiva, aċċessibbli online, li tenfasizza kategoriji differenti skont il-livell ta’ sikurezza tagħhom.