It-teknoloġija tal-informatika għall-finijiet doganali

PUNTI EWLENIN

Is-CIS jikkonsisti f’bażi tad-data ċentrali, aċċessibbli minn kull pajjiż tal-UE. Dan jinkludi esklussivament data meħtieġa biex jikseb l-għan tiegħu, inkluża d-data personali, fl-oqsma li ġejjin:

• prodotti bażiċi (prodotti li jistgħu jinxtraw jew jinbiegħu);
• mezzi ta’ trasport;
• negozji;
• persuni;
• xejriet ta’ frodi;
• disponibbiltà ta’ għarfien espert;
• oġġetti miżmuma, maqbuda jew ikkonfiskati;
• flus miżmuma, maqbuda jew ikkonfiskati.

Protezzjoni tad-data

• Id-Direttiva (UE) 2016/680 tapplika għall-protezzjoni tad-data sakemm ma tkunx ipprovduta mod ieħor f’din id-deċiżjoni.
• Is-CIS fiha d-data (inkluża dik ta’ karattru personali) meħtieġa biex jinkiseb l-objettiv tas-sistema permezz ta’ attivitajiet bħal osservazzjoni u rappurtar, sorveljanza diskreta, kontrolli speċifiċi u analiżi strateġika u operazzjonali.
• Din id-deċiżjoni tirrispetta d-drittijiet fundamentali u taderixxi mal-prinċipji rikonoxxuti b’mod partikolari mal-Karta tad-Drittijiet Fundamentali tal-Unjoni Ewropea. Hi ma timpedixxix lill-pajjiżi tal-UE milli japplikaw ir-regoli kostituzzjonali tagħhom relatati mal-aċċess tal-pubbliku għad-dokumenti uffiċjali.
• Il-pajjiżi tal-UE biss li jipprovdu l-informazzjoni lill-bażi tad-data tas-CIS għandhom id-dritt li jemendaw, iżidu jew iħassru dik id-data.
• Id-data tinżamm biss għall-ħin meħtieġ biex jinkiseb l-għan li għalih tkun iddaħħlet. Il-ħtieġa għaż-żamma tiġi riveduta mill-inqas kull sena mill-pajjiż fornitur.

Bażi tad-data għall-identifikazzjoni tal-fajls doganali

• Ġiet stabbilita bażi tad-data speċjali magħrufa bħala l-bażi tad-data għall-identifikazzjoni tal-fajls doganali, li tippermetti lill-awtoritajiet nazzjonali jkunu jafu jekk persuni jew negozji li jkunu qegħdin jinvestigaw humiex qegħdin jiġu investigati wkoll jew ġewx investigati f’pajjiżi oħra tal-UE. Għall-iskop ta’ din il-bażi tad-data, il-pajjiżi tal-UE jaqsmu bejniethom, kif ukoll mal-Europol u mal-Eurojust, lista ta’ kontravenzjonijiet serji tal-liġijiet nazzjonali: dawk li jistgħu jiġu kkastigati b’tal-inqas b’sentenza ta’ kustodja ta’ 12-il xahar jew b’multa ta’ mill-inqas €15 000.
• Pajjiż tal-UE mhuwiex obbligat li jaqsam informazzjoni ma’ din il-bażi tad-data speċjali meta dan ikun ta’ ħsara għall-politika pubblika jew interessi essenzjali oħra.
• Id-data tinżamm għal tliet snin jekk ma jkunx ġie stabbilit li seħħ xi ksur, b’data mħassra 12-il xahar wara l-aktar att investigattiv reċenti. Dan jiġi estiż għal 6 snin meta jkun hemm ksur li ma wassalx għal kundanna jew 10 snin fejn kien hemm kundanna.

Superviżjoni u amministrazzjoni

• Kull pajjiż tal-UE jinnomina awtorità jew awtoritajiet superviżorji nazzjonali responsabbli għall-protezzjoni tad-data personali biex iwettqu superviżjoni indipendenti tad-data koperta mid-deċiżjoni. Ġiet stabbilita wkoll awtorità ta’ sorveljanza konġunta, magħmula minn 2 rappreżentanti mill-awtorità superviżorja nazzjonali rispettiva ta’ kull pajjiż tal-UE.
• Il-Kontrollur Ewropew għall-Protezzjoni tad-Data jissorvelja l-attivitajiet tal-Kummissjoni fir-rigward tas-CIS.
• Kumitat li jikkonsisti minn rappreżentanti mill-amministrazzjonijiet doganali tal-pajjiżi tal-UE, bl-involviment tal-Kummissjoni, huwa responsabbli għall-implimentazzjoni u għall-applikazzjoni korretta ta’ din id-deċiżjoni (ibbażata fuq l-unanimità) u għall-funzjonament tekniku u operazzjonali xieraq tas-CIS (deċiżjonijiet minn maġġoranza ta’ żewġ terzi).