Sigurtà tal-karti tal-identità u tad-dokumenti ta’ residenza
SOMMARJU TA’:
Regolament (UE) 2019/1157 — it-tisħiħ tas-sigurtà tal-karti tal-identità u tad-dokumenti ta’ residenza maħruġa liċ-ċittadini tal-UE u lill-membri tal-familja tagħhom li jeżerċitaw id-dritt tagħhom ta’ moviment liberu
X’INHU L-GĦAN TAR-REGOLAMENT?
- Dan isaħħaħ is-sigurtà tal-karti tal-identità li l-pajjiżi tal-UE joħorgu liċ-ċittadini tagħhom stess u tad-dokumenti ta’ residenza li dawn jipprovdu lil ċittadini oħra tal-UE u lill-membri tal-familja tagħhom.
- Dan jintroduċi standards minimi għall-informazzjoni li tinsab fuq il-kards u l-karatteristiċi tas-sigurtà li għandhom jiġu applikati mill-pajjiżi kollha tal-UE li joħorġu dawn id-dokumenti.
PUNTI EWLENIN
Kamp ta’ applikazzjoni
Dan ir-Regolament japplika għal:
- karti tal-identità, bl-eċċezzjoni ta’ dokumenti proviżorji validi għal inqas minn 6 xhur, li l-pajjiżi tal-UE joħorġu liċ-ċittadini tagħhom stess;
- ċertifikati ta’ reġistrazzjoni għaċ-ċittadini tal-UE li jgħixu f’pajjiż ieħor tal-UE għal aktar minn 3 xhur u dokumenti ta’ residenza għal dawk li jgħixu hemmhekk b’mod permanenti;
- karti ta’ residenza u karti ta’ residenza permanenti għall-membri tal-familja ta’ ċittadini tal-UE li mhumiex ċittadini tal-UE.
Karti tal-identità
- Il-karti tal-identità għandhom jiġu prodotti fil-format ID-1, ikollhom parti li tinqara minn magna (MRZ) u jissodisfaw ċerti speċifikazzjonijiet u standards tas-sigurtà, inklużi:
- ir-rekwiżiti tad-daqs, tat-tqassim u tal-kontenut (isem, sess, nazzjonalità, data tat-twelid, karatteristiċi personali fakultattivi, numru tad-dokument u data ta’ skadenza) tad-Dokument 9303 tal-Organizzazzjoni tal-Avjazzjoni Ċivili Internazzjonali (ICAO);
- it-titolu “karta tal-identità” jew deżinjazzjoni nazzjonali stabbilita sew oħra fil-lingwa uffiċjali tal-pajjiż tal-UE emittenti, u l-kliem “karta tal-identità” f’mill-inqas waħda mil-lingwi uffiċjali l-oħra tal-UE;
- il-kodiċi b’żewġ ittri tal-pajjiż tal-UE emittenti ġewwa l-bandiera tal-UE fuq quddiem;
- mezz ta’ ħżin sigur ferm li fih l-immaġni tal-wiċċ tad-detentur u żewġ marki tas-swaba’
- tfal taħt is-6 snin huma eżentati mill-marki tas-swaba’ u
- tfal li għandhom bejn 6 u 12-il sena jistgħu jiġu eżentati;
- dettalji u osservazzjonijiet oħra meħtieġa mil-liġi nazzjonali.
- Dawn huma validi għal minimu ta’ 5 snin u għal massimu ta’ 10 snin. Il-pajjiżi tal-UE:
- jistgħu jillimitaw dan għal inqas minn 5 snin f’każijiet eċċezzjonali u għall-minuri;
- jistgħu jestendu dan għal aktar minn 10 snin għal persuni li għandhom 70 sena u aktar;
- għandhom jillimitaw il-validità għal 12-il xahar jew anqas meta jkun temporanjament fiżikament impossibbli li jittieħdu l-marki tas-swaba’ ta’ applikant.
- Dawk li bħalissa qegħdin jiċċirkolaw mhux se jibqgħu aktar validi fid-data ta’ skadenza tagħhom:
- jew sa mhux aktar tard mit-3 ta’ Awwissu 2031 jekk ma jissodisfawx ir-rekwiżiti l-ġodda;
- jew sa mhux aktar tard mit-3 ta’ Awwissu 2026 jekk ma jissodisfawx l-istandards minimi tas-sigurtà tal-Parti 2 tad-Dokument 9303 tal-ICAO jew jinkludu MRZ funzjonali;
- jekk maħruġa lil persuni li għandhom 70 sena jew aktar u jissodisfaw is-sigurtà tal-ICAO u r-rekwiżiti tal-MRZ.
Id-dokumenti ta’ residenza maħruġa liċ-ċittadini tal-UE għandhom, bħala minimu, jinkludu:
- it-titolu tad-dokument fil-lingwa/lingwi uffiċjali tal-pajjiż tal-UE;
- referenza ċara li dawn huma maħruġa skont id-Direttiva 2004/38/KE (ara s-sommarju dwar il-libertà ta’ moviment u residenza tal-UE);
- numru tad-dokument;
- kunjom u isem/ismijiet tad-detentur;
- data tat-twelid tad-detentur;
- l-informazzjoni li għandha tiġi inkluża fiċ-ċertifikati u fid-dokumenti ta’ reġistrazzjoni li jiċċertifikaw residenza permanenti;
- awtorità emittenti;
- il-kodiċi b’żewġ ittri tal-pajjiż tal-UE emittenti ġewwa l-bandiera tal-UE fuq quddiem.
Il-karti ta’ residenza għall-membri tal-familja li mhumiex ċittadini tal-UE:
- għandhom jużaw il-format uniformi stabbilit mir-Regolament (KE) Nru 1030/2002 kif emendat mir-Regolament (UE) 2017/1954 u mid-Deċiżjoni ta’ Implimentazzjoni C(2018) 7767; u
- ikollhom it-titolu “Karta ta’ Residenza” jew “Karta ta’ residenza permanenti” skont id-Direttiva 2004/38/KE u l-kodiċi standardizzat “Membru tal-Familja UE Art 10 DIR 2004/38/KE” jew “Membru tal-Familja UE Art 20 DIR 2004/38/KE”;
- li bħalissa qegħdin jiċċirkolaw mhux se jibqgħu aktar validi fid-data ta’ skadenza tagħhom jew sat-3 ta’ Awwissu 2026, liema waħda tiġi l-ewwel. Il-kards li ma jissodisfawx l-istandards minimi tas-sigurtà jew jinkludu MRZ funzjonali mhux se jkunu aktar validi fid-data ta’ skadenza tagħhom jew sat-3 ta’ Awwissu 2023, liema waħda tiġi l-ewwel.
Il-pajjiżi tal-UE:
Il-Kummissjoni Ewropea:
- sat-2 ta’ Awwissu 2020, għandha tistabbilixxi programm dettaljat għall-monitoraġġ tal-outputs, tar-riżultati u tal-impatt tal-leġiżlazzjoni, inkluż dwar id-drittijiet fundamentali;
- tirrapporta lill-Parlament Ewropew, lill-Kunsill u lill-Kumitat Ekonomiku u Soċjali Ewropew (KESE) dwar l-impatt tal-leġiżlazzjoni, speċjalment dwar il-protezzjoni tad-drittijiet fundamentali u d-data personali, sentejn u 11-il sena wara li din tidħol fis-seħħ;
- tevalwa l-applikazzjoni tal-leġiżlazzjoni għall-Parlament Ewropew, għall-Kunsill u għall-KESE 6 snin wara li din tidħol fis-seħħ, u wara dan f’intervalli ta’ 6 snin, b’enfasi fuq:
- l-impatt fuq id-drittijiet fundamentali
- il-mobbiltà taċ-ċittadini tal-UE
- l-effikaċja tal-verifika bijometrika għas-sigurtà tad-dokumenti tal-ivvjaġġar
- l-użu possibbli ta’ karti ta’ residenza bħala dokumenti tal-ivvjaġġar
- il-possibbiltà ta’ aktar armonizzazzjoni viżiva tal-karti tal-identità
- il-ħtieġa li jiġu introdotti karatteristiċi ta’ sigurtà komuni ta’ dokumenti proviżorji ta’ identifikazzjoni;
- tadotta atti ta’ implimentazzjoni dwar speċifikazzjonijiet tekniċi addizzjonali meħtieġa mir-regolament.
MINN META JAPPLIKA R-REGOLAMENT?
Dan japplika mit-2 ta’ Awwissu 2021. Minn din id-data, id-dokumenti ta’ identità u ta’ residenza l-ġodda kollha għandhom jissodisfaw kriterji ġodda.
SFOND
- Il-kombinazzjoni taż-żieda fl-ivvjaġġar u tar-regolamenti frammentati tagħmel is-sigurtà tad-dokumenti tal-identità element ewlieni fil-ġlieda kontra t-terroriżmu, il-kriminalità organizzata u s-serq tal-identità.
- Ir-regolament huwa parti mill-pjan ta’ azzjoni tal-2016 tal-Kummissjoni sabiex tiġi indirizzata l-frodi tad-dokumenti tal-ivvjaġġar. Dan talab biex ikun hemm miżuri biex titjieb is-sigurtà tad-dokumenti bħall-karti tal-identità u ta’ residenza, b’mod partikolari fid-dawl tal-attakki terroristiċi riċenti.
- Ir-regolament ma jirrikjedix li l-pajjiżi tal-UE jintroduċu karti tal-identità jew li jagħmlu ż-żamma ta’ karta tal-identità obbligatorja. Lanqas ma jżommhom milli jużaw dokumenti oħra, bħal liċenzji tas-sewqan, għal finijiet ta’ identifikazzjoni domestika.
DOKUMENT EWLIENI
Ir-Regolament (UE) 2019/1157 tal-Parlament Ewropew u tal-Kunsill tal-20 ta’ Ġunju 2019 dwar it-tisħiħ tas-sigurtà tal-karti tal-identità taċ-ċittadini tal-Unjoni u tad-dokumenti ta’ residenza maħruġa liċ-ċittadini tal-Unjoni u lill-membri tal-familja tagħhom li jeżerċitaw id-dritt tagħhom ta’ moviment liberu (ĠU L 188, 12.7.2019, pp. 67-78)
DOKUMENTI RELATATI
Id-Deċiżjoni ta’ Implimentazzjoni tal-Kummissjoni tat-30 ta’ Novembru 2018 li tistabbilixxi l-ispeċifikazzjonjiet tekniċi għall-format uniformi tal-permessi ta’ residenza għaċ-ċittadini ta’ pajjiżi terzi u li tħassar id-Deċiżjoni C(2002)3069
Il-Komunikazzjoni tal-Kummissjoni lill-Parlament Ewropew u lill-Kunsill — Pjan ta’ Azzjoni għat-tisħiħ tar-reazzjoni Ewropea għall-frodi tad-dokumenti tal-ivvjaġġar (COM(2016) 790 finali, 8.12.2016)
Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, pp. 1-88)
Emendi suċċessivi għar-Regolament (UE) 2016/679 ġew inkorporati fit-test oriġinali. Din il-verżjoni kkonsolidata hija ta’ valur dokumentarju biss.
Ir-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal transazzjonijiet elettroniċi fis-suq intern u li jħassar id-Direttiva 1999/93/KE (ĠU L 257, 28.8.2014, pp. 73-114)
Id-Direttiva 2004/38/KE tal-Parlament Ewropew u tal-Kunsill tad-29 ta’ April 2004 dwar id-drittijiet taċ-ċittadini tal-Unjoni u tal-membri tal-familja tagħhom biex jiċċaqilqu u jgħixu liberament fit-territorju tal-Istati Membri u li temenda r-Regolament (KEE) Nru 1612/68 u li tħassar id-Direttivi 64/221/KEE, 68/360/KEE, 72/194/KEE, 73/148/KEE, 75/34/KEE, 75/35/KEE, 90/364/KEE, 90/365/KEE u 93/96/KEE (ĠU L 158, 30.4.2004, pp. 77-123)
Ara l-verżjoni kkonsolidata.
Ir-Regolament tal-Kunsill (KE) Nru 1030/2002 tat-13 ta’ Ġunju 2002 li jippreskrivi format uniformi għall-permessi ta’ residenza għaċ-ċittadini ta’ pajjiz terz (ĠU L 157, 15.6.2002, pp. 1-7)
Ara l-verżjoni kkonsolidata.
Ir-Regolament tal-Kunsill (KE) Nru 1683/95 tad-29 ta’ Mejju 1995 li jistabbilixxi format uniformi għall-viża (ĠU L 164, 14.7.1995, pp. 1-4)
Ara l-verżjoni kkonsolidata.
l-aħħar aġġornament 21.10.2019