Drittijiet tal-awtur — trażmissjonijiet online ta’ organizzazzjonijiet tax-xandir u trażmissjonijiet mill-ġdid tal-programmi tat-televiżjoni u tar-radju

PUNTI EWLENIN

Prinċipju tal-pajjiż tal-oriġiniPrinċipju tal-pajjiż tal-oriġini: l-organizzazzjonijiet tax-xandir għandhom bżonn biss jingħataw id-drittijiet tal-awtur fil-pajjiż tagħhom tal-UE fejn huma stabbiliti (jiġifieri l-pajjiż tal-oriġini) sabiex jagħmlu programmi tar-radju, aħbarijiet televiżivi u affarijiet kurrenti kif ukoll il-produzzjonijiet proprji ffinanzjati bis-sħiħ minnhom u disponibbli fil-pajjiżi kollha tal-UE. għal ċerti servizzi online pprovduti minn organizzazzjonijiet tax-xandir

• B’żieda mal-forom tradizzjonali tax-xandir, l-organizzazzjonijiet tax-xandir qegħdin dejjem aktar joffru trażmissjonijiet simultanji fuq l-Internet (xandir simultanju) kif ukoll il-possibilità li programm online jintwera jew jinstema’ wara perjodu definit ta’ żmien (servizzi tar-ripetizzjoni).
• Id-Direttiva tipprovdi li, biex l-organizzazzjonijiet tax-xandir jinkludu ċerti programmi fis-servizzi online tagħhom disponibbli lil hinn mill-fruntieri tal-pajjiż, ikunu jeħtieġu biss li jiksbu l-awtorizzazzjoni tad-detenturi tad-drittijiet tax-xogħlijiet u suġġetti oħra li jkunu jinsabu f’dawk il-programmi għall-pajjiż tal-UE fejn ikollhom is-sede prinċipali tagħhom.
• Dan il-prinċipju tal-“pajjiż tal-oriġini” (li diġà ntuża għax-xandir bis-satellita fid-Direttiva 93/83/KEE) japplika għall-programmi kollha tar-radju u għal ċerti tipi ta’ programmi tat-televiżjoni:
  • programmi ta’ aħbarijiet u ġrajjiet kurrenti (minbarra avvenimenti sportivi u materjal protett inkluż fihom); u
  • programmi li huma prodotti u ffinanzjati bis-sħiħ mill-organizzazzjoni tax-xandir innifisha.
• Il-kuntratti eżistenti ma jiġux affettwati sa erbgħa snin mid-dħul fis-seħħ tad-Direttiva (sas-7 ta’ Ġunju 2023).

Ġestjoni kollettiva obbligatorja tad-drittijiet għal trażmissjoni mill-ġdid tal-programmi tar-radju u tat-televiżjoni b’mezzi oħra minbarra l-kejbil

• Id-Direttiva tagħmilha wkoll aktar faċli li tinkiseb l-awtorizzazzjoni tad-detenturi tad-drittijiet tal-awtur u d-drittijiet relatati għat-trażmissjoni mill-ġdid tal-programmi tat-televiżjoni jew tar-radju minn pajjiżi oħra tal-UE. Id-detenturi tad-drittijiet jistgħu jeżerċitaw id-dritt tagħhom li jawtorizzaw jew jiċħdu l-awtorizzazzjoni għal tali trażmissjonijiet mill-ġdid permezz ta’ organizzazzjoni tal-immaniġġjar kollettiv⁵ biss, ħlief għad-drittijiet li huma diġà miżmuma mill-organizzazzjoni tax-xandir ikkonċernata. Dan japplika għat-trażmissjonijiet mill-ġdid b’mod simultanju, b’mod mhux mibdul u b’mod mhux imqassar permezz ta’ kwalunkwe mezz minbarra l-kejbil, inkluż l-Internet miftuħ (iżda biss meta t-trażmissjoni mill-ġdid fuq l-Internet miftuħ isseħħ f’ambjent sigur u għal grupp ta’ utenti awtorizzati). Itr-trażmissjonijiet mill-ġdid bil-kejbil huma koperti mid-Direttiva 93/83/KEE.
• Il-pajjiżi tal-UE jridu jiżguraw li tkun disponibbli medjazzjoni biex tassisti lill-partijiet fil-konklużjoni ta’ liċenzji għal servizzi ta’ trażmissjoni mill-ġdid.
• Il-pajjiżi tal-UE huma wkoll permessi b’mod espliċitu li japplikaw ir-regoli deskritti hawn fuq meta t-trażmissjonijiet u t-trażmissjonijiet mill-ġdid isiru fit-territorju tagħhom.

Injezzjoni diretta

• Id-Direttiva tistabbilixxi regoli li jirregolaw l-użu ta’ xogħlijiet protetti jew suġġett ieħor permezz ta’ “injezzjoni diretta”, jiġifieri t-teknika li permezz tagħha organizzazzjoni tax-xandir tittrażmetti s-sinjal tagħha lid-distributuri permezz ta’ linja privata — b’tali mod li dawk is-sinjali ma jkunux jistgħu jiġu riċevuti mill-pubbliku ġenerali waqt dik it-trażmissjoni — u, sussegwentement, id-distributur joffri l-programmi rilevanti lill-pubbliku.
• Meta tintuża l-injezzjoni diretta, u ma jkun hemm l-ebda trażmissjoni parallela tal-istess programmi mill-organizzazzjoni tax-xandir innifisha, l-organizzazzjoni tax-xandir u d-distributur tas-sinjali huma meqjusa li qed jipparteċipaw f’att uniku ta’ komunikazzjoni lill-pubbliku. Dan ifisser li ż-żewġ partijiet għandhom bżonn jiksbu awtorizzazzjoni għall-parteċipazzjoni rispettiva tagħhom f’dik l-attività.
• Il-kuntratti eżistenti ma jiġux affettwati sa sitt snin mid-dħul fis-seħħ tad-Direttiva (sas-7 ta’ Ġunju 2025).