Miżuri restrittivi tal-UE kontra l-Korea ta’ Fuq

SOMMARJU TA’:

Id-Deċiżjoni (PESK) 2016/849 — miżuri restrittivi kontra r-Repubblika Demokratika tal-Poplu tal-Korea

Ir-Regolament (UE) 2017/1509 — miżuri restrittivi kontra r-Repubblika Demokratika tal-Poplu tal-Korea

X’INHU L-GĦAN TAD-DEĊIŻJONI U TAR-REGOLAMENT?

• Huma jimponu sanzjonijiet kontra r-Repubblika Demokratika tal-Poplu tal-Korea (RDPK) li jimplimentaw bosta riżoluzzjonijiet tal-Kunsill tas-Sigurtà tan-Nazzjonijiet Uniti (UNSCR) kif ukoll miżuri addizzjonali li jikkumplimentaw u jsaħħu s-sanzjonijiet ibbażati fuq in-NU.

PUNTI EWLENIN

Sanzjonijiet

• Ir-RDPK ġiet soġġetta għal għadd ta’ UNSCR, billi applikat sanzjonijiet kontra r-RDPK immirati lejn il-programmi nukleari tagħha, relatati mal-qerda tal-massa u relatati mal-missili ballistiċi;
• l-iktar riċenti UNSCR 2270 (2016). Minbarra l-applikazzjoni tas-sanzjonijiet tan-NU, l-UE daħħlet ukoll miżuri awtonomi addizzjonali.

Kummerċ fuq oġġetti, servizzi u teknoloġija

Id-deċiżjoni u r-regolament jimponu projbizzjonijiet fuq il-kummerċ, il-merkanzija u t-teknoloġija li jistgħu jgħinu l-programmi ta’ armi tar-RDPK. Dawn jinkludu:

• projbizzjonijiet ta’ esportazzjoni u importazzjoni li jkopru merkanzija bħal:
  • armi;
  • metalli prezzjużi;
  • ħelikopters u bastimenti ġodda;
  • fjuwil għall-avjazzjoni u għal rokits;
  • oġġetti ta’ lussu;
• restrizzjonijiet fuq l-appoġġ finanzjarju għall-kummerċ;
• restrizzjonijiet ta’ investiment inkluża projbizzjoni fuq:
  • investiment mir-RDPK f’pajjiżi tal-UE;
  • parteċipazzjoni jew finanzjament ta’ kwalunkwe kumpanija involuta f’attivitajiet illegali fir-RDPK jew fis-setturi tal-minjieri, tar-raffinar jew tal-kimika;
• projbizzjoni fuq għajnuna finanzjarja għar-RDPK ħlief għal għanijiet umanitarji u ta’ żvilupp li jindirizzaw il-ħtieġa tal-popolazzjoni ċivili jew il-promozzjoni tad-denuklearizzazzjoni;
• spezzjonijiet obbligatorji fuq il-merkanzija kollha sejra lejn jew ġejja mir-RDPK permezz tal-art, il-baħar jew l-ajru;
• sospensjoni tal-kooperazzjoni xjentifika u teknika bejn il-pajjiżi tal-UE u persuni jew gruppi sponsorjati uffiċjalment minn jew li jirrappreżentaw lir-RDPK b’eżenzjonijiet għal skambji mediċi u attivitajiet oħra meqjusa li ma humiex fil-programmi tal-armi tar-RDPK;
• restrizzjonijiet ta’ dħul fit-territorju u residenza, iżda b’eżenzjonijiet umanitarji u ċerti eżenzjonijiet oħra;
• iffriżar ta’ fondi u riżorsi ekonomiċi.

Projbizzjoni fuq l-ivvjaġġar u l-iffriżar tal-assi

Id-deċiżjoni u r-regolament jimponu projbizzjonijiet tal-ivvjaġġar u l-iffriżar tal-assi fuq persuni u kumpaniji marbuta ma’ dawn il-programmi illegali;

• il-listi ta’ dawn il-persuni u l-kumpaniji huma annessi mad-deċiżjoni u r-regolament.
• dawn l-annessi huma aġġornati hekk kif in-NU żżid jew tneħħi persuni jew kumpaniji mil-listi tagħha.

MINN META JAPPLIKAW ID-DEĊIŻJONI U R-REGOLAMENT?

Id-deċiżjoni ilha tapplika mid-29 ta’ Mejju 2016. Hija tħassar id-Deċiżjoni 2013/183/PESK.

Ir-Regolament ilu japplika mill-1 ta’ Settembru 2017. Jirrevoka r-Regolament (KE) Nru 329/2007.

SFOND

Għal aktar informazzjoni, ara:

• Ir-RDPK u l-UE (Servizz Ewropew għall-Azzjoni Esterna).

DOKUMENTI EWLENIN

Id-Deċiżjoni tal-Kunsill (PESK) 2016/849 tas-27 ta’ Mejju 2016 dwar miżuri restrittivi kontra r-Repubblika Demokratika Popolari tal-Korea u li tħassar id-Deċiżjoni 2013/183/PESK (ĠU L 141, 28.5.2016, pp. 79-124)

L-emendi suċċessivi għad-Deċiżjoni (PESK) 2016/849 ġew inkorporati fit-test oriġinali. Din il-verżjoni konsolidata hija ta’ valur dokumentarju biss.

Ir-Regolament tal-Kunsill (UE) 2017/1509 tat-30 ta’ Awwissu 2017 dwar miżuri restrittivi kontra r-Repubblika Demokratika tal-Poplu tal-Korea u li jħassar ir-Regolament (KE) Nru 329/2007 (ĠU L 224, 31.8.2017, pp. 1-109)

Ara l-verżjoni konsolidata.

l-aħħar aġġornament 12.12.2022