Ftehim ta’ Kummerċ Ħieles bejn l-Unjoni Ewropea u Singapore

PUNTI EWLENIN

L-FTA bejn l-UE u Singapore jistabbilixxi l-kundizzjonijiet biex l-operaturi ekonomiċi tal-UE jkunu jistgħu jieħdu vantaġġ sħiħ mill-opportunitajiet maħluqa f’Singapore billi jiġi żgurat dan li ġej:

• il-liberalizzazzjoni komprensiva tas-swieq tas-servizzi u tal-investiment, inklużi:
  • regoli trażversali dwar il-liċenzjar u r-rikonoxximent reċiproku tad-diplomi, u
  • regoli speċifiċi għas-settur imfassla biex jiżguraw kundizzjonijiet ekwi għall-impriżi tal-UE;
• opportunitajiet ġodda ta’ sejħiet għall-offerti għall-offerenti tal-UE, speċjalment fis-suq tal-utilitajiet fejn hemm ħafna fornituri ewlenin tal-UE;
• it-tneħħija tal-ostakoli tekniċi u regolatorji għall-kummerċ fil-kummerċ ta’ oġġetti, bħall-ittestjar doppju, b’mod partikolari billi jiġi promoss l-użu ta’ standards tekniċi u regolatorji familjari fl-UE fis-setturi ta’:
  • il-vetturi bil-mutur,
  • l-elettronika,
  • il-farmaċewtiċi u l-apparati mediċi,
  • it-teknoloġiji ekoloġiċi;
• reġim aktar favur il-kummerċ, ibbażat fuq standards internazzjonali, għall-approvazzjoni tal-esportazzjonijiet tal-laħam tal-UE lejn Singapore;
• L-impenn ta’ Singapore li ma jgħollix it-tariffi tiegħu (li bħalissa, fuq bażi volontarja, normalment ma jiġux applikati) fuq l-importazzjonijiet mill-UE, flimkien ma’ aċċess orħos għan-negozji u għall-konsumaturi tal-UE għal prodotti magħmula f’Singapore;
• livell għoli ta’ protezzjoni għad-drittijiet tal-proprjetà intellettwali, inkluż l-infurzar ta’ dawn id-drittijiet u l-kontrolli fil-fruntieri;
• livell ogħla ta’ protezzjoni milli skont il-Ftehim dwar l-Aspetti tad-Drittijiet tal-Proprjetà Intellettwali Relatati mal-Kummerċ għall-indikazzjonijiet ġeografiċi (IĠ) tal-UE wara r-reġistrazzjoni tagħhom f’Singapore, permezz tar-reġistru domestiku tal-IĠ stabbilit fl-1 ta’ April 2019, wara l-kunsens tal-Parlament Ewropew għall-FTA – mid-dħul fis-seħħ tal-FTA, il-Kumitat għall-Kummerċ UE–Singapore adotta tliet deċiżjonijiet dwar l-IĠ (id-Deċiżjonijiet Nru 1/2020 tas-17 ta’ April 2020, 2/2020 tas-27 ta’ April 2020 u 3/2022 tad-19 ta’ April 2022);
• kapitolu komprensiv dwar il-kummerċ u l-iżvilupp sostenibbli – li għandu l-għan li jiżgura li l-kummerċ jappoġġa l-protezzjoni ambjentali u l-iżvilupp soċjali, u jippromwovi l-ġestjoni sostenibbli tal-foresti u tas-sajd – u dwar kif is-sħab soċjali u s-soċjetà ċivili se jkunu involuti fl-implimentazzjoni u l-monitoraġġ tiegħu;
• mekkaniżmi rapidi għas-soluzzjoni tat-tilwim jew permezz ta’ arbitraġġ minn bord jew bl-għajnuna ta’ medjatur; u
• kapitolu ġdid komprensiv biex jiġu promossi opportunitajiet ġodda fis-“settur tat-tkabbir ekoloġiku”, li jilħqu l-għanijiet stabbiliti fil-pjan ta’ azzjoni tal-UE għall-Patt Ekoloġiku.

Hemm protokoll tal-ftehim li jikkonċerna d-definizzjoni ta’ “prodotti oriġinarji” u l-metodi ta’ kooperazzjoni amministrattiva. Dan ġie emendat lejn l-aħħar tal-2022 biex jirrifletti:

• il-bidliet li saru fil-Konvenzjoni Internazzjonali dwar is-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta’ Oġġetti tal-Organizzazzjoni Dinjija Doganali (ara s-sommarju);
• is-sostituzzjoni tas-sistema ta’ awtoċertifikazzjoni tal-oriġini tal-merkanzija minn esportaturi approvati tal-UE b’sistema ta’ awtoċertifikazzjoni tal-oriġini tal-merkanzija minn esportaturi rreġistrati (magħrufa bħala s-sistema REX); u
• l-espansjoni tal-ambitu ta’ tliet kwoti tal-oriġini applikabbli għal prodotti li joriġinaw f’Singapore u jiġu importati fl-UE: luncheon meat fil-laned, pulpetti tal-ħut bil-kàri, u pulpetti tas-siċċa.