Regoli speċifiċi dwar il-produzzjoni, it-tikkettar u l-kontroll organiku

SOMMARJU TA’:

Ir-Regolament (KE) Nru 889/2008 li jistabbilixxi regoli dettaljati fir-rigward tal-produzzjoni, it-tikkettar u l-kontroll organiku

X’INHU L-GĦAN TAR-REGOLAMENT?

Huwa att ta’ implimentazzjoni li jistabbilixxi regoli speċifiċi li jirregolaw il-produzzjoni, it-tikkettar u l-kontroll organiku.

PUNTI EWLENIN

Kamp ta’ applikazzjoni

Ir-regolament japplika għall-prodotti li ġejjin (imsemmija fl-Artikolu 1(2) tar-Regolament (KE) Nru 834/2007 dwar il-produzzjoni u t-tikkettar ta’ prodotti organiċi — ara s-sommarju) li joriġinaw mill-agrikoltura, inkluża l-akkwakultura:
- prodotti agrikoli ħajjin jew mhux ipproċessati;
- prodotti agrikoli pproċessati biex jintużaw bħala ikel;
- l-għalf tal-annimali;
- materjal għall-propagazzjoni* veġetattiva u żrieragħ għall-kultivazzjoni;
- ħmira użata bħala ikel jew għalf.
Għall-bhejjem, dan ikopri biss il-bovini inklużi bubalus u l-biżonte, l-ekwidi, il-porċini, l-ovini, il-kaprini, it-tjur (kif elenkati fl-Anness III tar-Regolament (KE) Nru 889/2008) u n-naħal.
Għall-prodotti tal-akkwakultura, dan japplika biss għall-ispeċijiet tal-ħut, tal-krustaċji, tal-ekinodermi u tal-molluski elenkati fl-Anness XIIIa (fil-verżjoni konsolidata tar-Regolament (KE) Nru 889/2008).
Il-prodotti tal-kaċċa u s-sajd mhumiex meqjusa bħala organiċi.

Il-produzzjoni, l-ipproċessar, l-ippakkjar, it-trasport u l-ħażna ta’ prodotti organiċi

Ir-regoli, li jkopru wkoll il-prevenzjoni tal-mard u t-trattament veterinarju, jirregolaw l-oqsma li ġejjin.

Il-produzzjoni tal-pjanti
- il-ġestjoni u l-fertilizzazzjoni tal-ħamrija;
- il-ġestjoni tal-pesti, il-mard u l-ħaxix ħażin;
- regoli speċjali japplikaw għall-faqqiegħ;
- il-produzzjoni idroponika hija pprojbita.
Il-produzzjoni tal-alka
- l-adegwatezza tal-mezz akkwatiku u l-pjan ta’ ġestjoni sostenibbli;
- il-ħsad sostenibbli tal-alka selvaġġa;
- il-kultivazzjoni tal-alka;
- il-miżuri għall-anti-fouling u t-tindif tat-tagħmir u l-faċilitajiet tal-produzzjoni.
Il-produzzjoni tal-bhejjem
- l-oriġini ta’ annimali organiċi u mhux organiċi;
- il-prattiki tal-akkomodazzjoni u tat-trobbija, inklużi regoli speċifiċi għall-mammiferi, it-tjur u t-trobbija tan-naħal;
- l-aċċess għall-arja miftuħa,
- id-densità tal-ħażna;
- il-produzzjoni ta’ bhejjem mingħajr art hija pprojbita;
- il-produzzjoni simultanja ta’ bhejjem organiċi u mhux organiċi;
- il-ġestjoni tal-annimali, l-evitar tat-krudeltà u t-tbatija.
Għalf
- għalf mill-azjenda stess u sorsi oħra;
- għalf li jissodisfa l-ħtiġijiet nutrizzjonali tal-annimali;
- għalf fil-konverżjoni (jiġifieri matul il-perjodu li fih il-pakketti tal-art qed jiġu kkonvertiti minn status mhux organiku għal organiku);
- l-użu ta’ ċerti prodotti u sustanzi fl-għalf.
Il-produzzjoni tal-annimali tal-akkwakultura
- l-adegwatezza tal-mezz akkwatiku u l-pjan ta’ ġestjoni sostenibbli;
- il-produzzjoni simultanja ta’ annimali tal-akkwakultura organiċi u mhux organiċi;
- l-oriġini tal-annimali tal-akkwakultura organika;
- l-oriġini u l-ġestjoni ta’ annimali tal-akkwakultura mhux organiċi;
- prattiki tat-trobbija tal-akkwakultura;
- regoli speċifiċi għas-sistemi ta’ konteniment akkwatiku;
- il-ġestjoni tal-annimali tal-akkwakultura;
- l-użu tal-ormoni huwa pprojbit fit-tgħammir.
L-għalf għall-ħut, il-krustaċji u l-ekinodermi
- regoli ġenerali li jiffukaw fuq is-saħħa tal-annimali, il-kwalità tal-prodott, u impatt ambjentali baxx;
- regoli speċifiċi għall-annimali tal-akkwakultura karnivori, iż-żgħar organiċi, u l-molluski (inklużi l-gajdri).
Prodotti ppreservati u pproċessati
- regoli għall-preservazzjoni ta’ prodotti u għall-produzzjoni ta’ għalf u ikel ipproċessat;
- l-użu ta’ ċerti prodotti u sustanzi fl-ipproċessar tal-ikel;
- l-użu ta’ ċerti ingredjenti mhux organiċi ta’ oriġini agrikola fl-ipproċessar tal-ikel;
- regoli speċifiċi għall-alka u għall-produzzjoni tal-inbid.
Il-ġbir, l-ippakkjar, it-trasport u l-ħażna.

Hemm regoli addizzjonali dwar:

prodotti minn irqajja ta’ art li jkunu qed jiġu konvertiti minn status mhux organiku għal dak organiku;
restrizzjonijiet klimatiċi, ġeografiċi jew strutturali, inklużi regoli dwar l-irbit u l-produzzjoni parallela u għat-trobbija tan-naħal;
in-nuqqas ta’ disponibbiltà ta’ dħul organiku agrikolu;
l-użu ta’ prodotti u sustanzi speċifiċi fl-ipproċessar;
ċirkustanzi katastrofiċi;
il-bażi ta’ data taż-żerriegħa;
it-tikkettar, inkluż il-logo tal-produzzjoni organika, it-trademarks u r-rekwiżiti speċifiċi tal-UE għall-għalf;
il-ksur u l-iskambju ta’ informazzjoni;
sorveljanza mill-awtoritajiet kompetenti;
data organika fil-pjan ta’ kontroll nazzjonali multiannwali u r-rapport annwali.

Kontrolli

Ir-regoli ta’ kontroll ikopru rekwiżiti speċifiċi għall-prodotti mill-pjanti, l-alka, il-bhejjem, it-trobbija tan-naħal u l-akkwakultura, u jinkludu:

ir-responsabbiltajiet tal-operatur;
spezzjonijiet annwali mill-awtoritajiet ta’ kontroll;
dokumentazzjoni u kontijiet;
aċċess għall-faċilitajiet;
importazzjonijiet ta’ prodotti organiċi minn pajjiżi mhux fl-UE;
unitajiet li jużaw kuntratti lil partijiet terzi;
unitajiet li jħejju l-għalf.

It-trażmissjoni tal-informazzjoni

Il-pajjiżi tal-UE jipprovdu lill-Kummissjoni Ewropea b’informazzjoni statistika dwar il-produzzjoni organika qabel l-1 ta’ Lulju ta’ kull sena.

Tħassir

Ir-regolament iħassar ir-Regolamenti (KEE) Nru 207/93, (KE) Nru 223/2003 u (KE) Nru 1452/2003.

MINN META JAPPLIKA R-REGOLAMENT?

Ilu japplika mill-1 ta’ Jannar 2009.

SFOND

Ara wkoll:

Il-produzzjoni organika u l-prodotti (Kummissjoni Ewropea).

TERMINI EWLENIN

Materjal tal-propagazzjoni: il-partijiet minn pjanti u l-materjal kollu tal-pjanti, inklużi r-riżomi maħsuba għat-tgħammir, ir-riproduzzjoni u l-produzzjoni tal-ħaxix. Eżempji jinkludu l-basal, ir-riżomi, eċċ.

DOKUMENT EWLIENI

Ir-Regolament tal-Kummissjoni (KE) Nru 889/2008 tal-5 ta’ Settembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta’ prodotti organiċi fir-rigward tal-produzzjoni, it-tikkettar u l-kontroll organiku (ĠU L 250, 18.9.2008, pp. 1-84)

L-emendi suċċessivi għar-Regolament (KE) Nru 889/2008 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

DOKUMENT RELATAT

Ir-Regolament tal-Kunsill (KE) Nru 834/2007 tat-28 ta’ Ġunju 2007 dwar il-produzzjoni organika u t-tikkettar ta’ prodotti organiċi u li jħassar ir-Regolament (KEE) Nru 2092/91 (ĠU L 189, 20.7.2007, pp. 1-23)

Ara l-verżjoni konsolidata.

l-aħħar aġġornament 17.06.2020