Statistika integrata tal-azjendi agrikoli tal-UE

PUNTI EWLENIN

Ir-regolament:

• jistabbilixxi sistema ssimplifikata u mmodernizzata għall-ġbir tal-istatistiċi agrikoli Ewropej fil-livell tal-azjendi agrikoli. Dan jippermetti l-integrazzjoni ta’ informazzjoni strutturali ma’ informazzjoni oħra, fosthom il-metodi tal-produzzjoni, il-miżuri dwar l-iżvilupp rurali u aspetti agro-ambjentali;
• tfassal biex jiżgura l-kontinwazzjoni ta’ sensiela ta’ eżerċizzji ta’ stħarriġ Ewropew dwar l-istruttura ta’ impriżi agrikoli, billi jippermetti li tinżamm serje kronoloġika konsistenti filwaqt li jiġu ssodisfati ħtiġijiet ġodda u emerġenti għad-data fil-livell tal-azjendi agrikoli;
• jipprovdi sensiela ta’ definizzjonijiet li jinkludu unità agrikola tal-art komuni¹, unità ta’ bhejjem², erja agrikola użata³ u ġonna kulinari⁴.

Kopertura u sorsi ta’ data

Id-data meħtieġa mir-regolament għandha tkopri:

• 98 % tal-erja agrikola utilizzata totali (minbarra l-ġnien kulinari); u
• 98 % tal-unitajiet tal-bhejjem ta’ kull pajjiż tal-UE.

Diment li dawn jissodisfaw ir-rekwiżiti tal-kwalità stabbiliti fir-regolament, il-pajjiżi tal-UE jistgħu jużaw wieħed jew aktar mis-sorsi jew metodi li ġejjin biex jipproduċu l-istatistika:

• stħarriġ statistiku;
• sorsi amministrattivi bħal data minn:
  • is-sistema integrata ta’ amministrazzjoni u kontroll (Regolament (UE) Nru 1306/2013);
  • is-sistema għall-identifikazzjoni u r-reġistrazzjoni tal-bhejjem tal-fart (Regolament (KE) Nru 1760/2000);
  • is-sistema ta’ dentifikazzjoni u tikkettjar tal-laħam taċ-ċanga u l-vitella (Regolament (KE) Nru 21/2004);
  • Is-sistema tar-reġistru tal-vinji (Regolament (EU) Nru 1308/2013); u
  • ir-reġistri tal-biedja agrikola (Regolament (KE) Nru 834/2007);
• sorsi oħra, metodi jew approċċi innovattivi (il-pajjiżi tal-UE għandhom jagħtu avviż bil-quddiem lill-Eurostat dwar l-intenzjoni tagħhom li jużawhom u jipprovdu dettalji dwar kif se jintużaw).

Il-pajjiżi tal-UE għandhom jiġbru u jipprovdu d-data strutturali ċentrali⁵ għas-snin ta’ referenza 2020, 2023 u 2026, kif elenkati fl-Anness III tar-regolament. Il-ġbir tad-data ċentrali għas-sena ta’ referenza 2020 għandu jitwettaq bħala ċensiment.

Il-pajjiżi tal-UE jistgħu, fejn dan iċ-ċensiment tal-2020 jikkoinċidi maċ-ċensiment ta’ 10 snin tal-popolazzjoni, imexxu ’l quddiem il-ġbir tad-data dwar l-azjendi agrikoli b’sena biex jevitaw il-piż li jwettqu żewġ eżerċizzji maġġuri ta’ ġbir ta’ data fl-istess ħin.

Il-ġbir tad-data ċentrali għas-snin ta’ referenza 2023 u 2026 jista’ jsir bl-użu ta’ kampjuni. Meta jseħħ dan, il-pajjiżi tal-UE għandhom jiżguraw li r-riżultati peżati jkunu statistikament rappreżentattivi tal-azjendi agrikoli f’kull reġjun u mfassla biex jissodisfaw ir-rekwiżiti ta’ preċiżjoni stabbiliti fl-Anness V.

Kontribuzzjoni baġitarja tal-UE

L-UE sejra tikkontribwixxi €40 miljun f’għotjiet lill-istituti nazzjonali tal-istatistika biex tgħin fl-implimentazzjoni tal-programm tal-ġbir tad-data għas-sena ta’ referenza 2020. L-ammont għall-perjodu ta’ wara l-2020 se jkun stabbilit mill-Parlament Ewropew u mill-Kunsill fuq proposta mill-Kummissjoni.

Delega tas-setgħat

Ir-regolament jagħti lill-Kummissjoni Ewropea s-setgħa li tadotta atti delegati sabiex tqis il-ħtiġijiet emerġenti tad-data li jirriżultaw mill-iżviluppi fl-agrikoltura, mil-leġiżlazzjoni riveduta u mill-bidliet fil-prijoritajiet tal-politika. F’dan ir-rigward, din tirċievi gwida minn esperti maħtura minn kull pajjiż tal-UE.