Regoli tas-sigurtà għall-protezzjoni ta’ informazzjoni klassifikata (IKUE)

SOMMARJU TA’:

Deċiżjoni 2013/488/UE dwar ir-regoli tas-sigurtà għall-protezzjoni ta’ informazzjoni klassifikata tal-UE

X’INHU L-GĦAN TAD-DEĊIŻJONI?

Għandha l-għan li tistabbilixxi sistema ta’ sigurtà komprensiva għall-protezzjoni ta’ informazzjoni klassifikata li tkopri l-Kunsill tal-UE, is-Segretarjat Ġenerali (SĠK) tagħha u l-pajjiżi tal-UE sabiex tappoġġa l-attivitajiet tal-Kunsill fl-oqsma kollha li jeħtieġu li jimmaniġġjaw informazzjoni klassifikata.

PUNTI EWLENIN

Kamp ta’ applikazzjoni

• Id-deċiżjoni tistabbilixxi l-prinċipji bażiċi u l-istandards minimi ta’sigurtà għall-protezzjoni ta’ Informazzjoni Klassifikata tal-UE (IKUE).
• Dawn il-prinċipji u standards japplikaw għall-Kunsill u l-SĠK u għandhom jiġu rispettati mill-pajjiżi tal-UE skont il-liġijiet tagħhom biex jiżguraw li kull wieħed jipprovdi livell ekwivalenti ta’protezzjoni għall-IKUE.

Informazzjoni klassifikata

L-IKUE tfisser kwalunkwe informazzjoni jew materjal innominat minn klassifikazzjoni tas-sigurtà tal-UE, li, jekk tiġi żvelata mingħajr awtorizzazzjoni, tista’ taffettwa l-interessi tal-UE jew ta’ pajjiż tal-UE wieħed jew aktar.

Hemm 4 livelli ta’ klassifikazzjoni:

• 1.

  L-Għola Sigriet: l-iżvelar mhux awtorizzat ta’ informazzjoni u materjal li jista’ jikkawża preġudizzju gravi eċċezzjonalment għall-interessi essenzjali tal-UE jew ta’ pajjiż wieħed jew aktar tal-UE;

• 2.

  Sigriet: l-iżvelar mhux awtorizzat ta’ informazzjoni u materjal li jista’ jikkawża ħsara serja lill-interessi essenzjali tal-UE jew ta’ pajjiż wieħed jew aktar tal-UE;

• 3.

  Kunfidenzjali għall-UE: l-iżvelar mhux awtorizzat ta’ informazzjoni u materjal li jista’ jikkawża ħsara lill-interessi essenzjali tal-UE jew ta’ pajjiż wieħed jew aktar tal-UE;

• 4.

  Ristrett għall-UE: l-iżvelar mhux awtorizzat ta’ informazzjoni u materjal li jista’ jkun ta’ żvantaġġ għall-interessi tal-UE jew ta’ pajjiż wieħed jew aktar tal-UE;

Aċċess għall-IKUE

Miżuri ta’ sigurtà personali huma mfassla biex jiżguraw li l-aċċess għall-IKUE jingħata biss lil dawk li:

• għandhom ħtieġa ta’ għarfien (need-to know);
• ingħataw approvazzjoni ta’ sigurtà sal-livell rilevanti, fejn xieraq; u
• ingħataw informazzjoni dwar ir-responsabbiltajiet tagħhom.

MINN META TAPPLIKA D-DEĊIŻJONI?

Ilha tapplika mill-15 ta’ Ottubru 2013.

SFOND

Il-Kummissjoni Ewropea u l-Parlament Ewropew adottaw ukoll regoli li jirregolaw it-trattament tal-IKUE:

• Ir-regoli tal-Kummissjoni huma stabbiliti f’Deċiżjoni tal-2015;
• ir-regoli tal-Parlament huma stabbiliti f’Deċiżjoni tal-Bureau li daħlet fis-seħħ fl-2014.

DOKUMENT PRINĊIPALI

Id-Deċiżjoni tal-Kunsill 2013/488/UE tat-23 ta’ Settembru 2013 dwar ir-regoli tas-sigurtà għall-protezzjoni ta’ informazzjoni klassifikata tal-UE (ĠU L 274, 15.10.2013, p. 1-50).

L-emendi suċċessivi għad-Direttiva 2013/488/KE ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Id-Deċiżjoni tal-Kunsill (UE, Euratom) 2015/444 tat-13 ta’ Marzu 2015 dwar ir-regoli tas-sigurtà għall-protezzjoni ta’ informazzjoni klassifikata tal-UE (ĠU L 72, 17.3.2015, p. 53-88).

Deċiżjoni tal-Bureau tal-Parlament Ewropew tal-15 ta’ April 2013 dwar ir-regoli li jirregolaw it-trattament ta’ informazzjoni kunfidenzjali mill-Parlament Ewropew (ĠU C 96, 1.4.2014, p. 1-51)

l-aħħar aġġornament 23.11.2018