Ftehim ta’ sħubija u kooperazzjoni bejn l-UE u l-Iraq

SOMMARJU TA’:

Deċiżjoni (UE) 2018/1107— konklużjoni tal-Ftehim ta’ Sħubija u Kooperazzjoni bejn l-UE u l-Istati Membri tagħha, minn naħa, u l-Iraq, min-naħa l-oħra

Ftehim ta’ Sħubija u Kooperazzjoni bejn l-UE u l-Istati Membri tagħha, minn naħa, u l-Iraq, min-naħa l-oħra

X’INHU L-GĦAN TA’ DIN ID-DEĊIŻJONI U L-FTEHIM?

Id-deċiżjoni tikkonċerna l-konklużjoni, f’isem l-Unjoni Ewropea (UE), tal-Ftehim ta’ Sħubija u Kooperazzjoni mal-Iraq.

L-għanijiet tal-ftehim huma:

• li jipprovdi qafas xieraq għal djalogu politiku bejn il-partijiet, li jippermetti l-iżvilupp ta’ relazzjonijiet politiċi;
• li jippromwovi l-kummerċ u l-investiment u relazzjonijiet ekonomiċi armonjużi bejn il-partijiet u b’hekk jgħin irawwem l-iżvilupp ekonomiku sostenibbli tagħhom;
• li jipprovdi bażi għal
  • kooperazzjoni leġiżlattiva
  • ekonomika
  • soċjali
  • finanzjarja, u
  • kulturali.

PUNTI EWLENIN

Il-ftehim ikopri numru ta’ oqsma ewlenin, jiġifieri:

• djalogu politiku u ta’ kooperazzjoni fil-politika barranija u ta’ sigurtà, inkluż
  • fil-ġlieda kontra t-terroriżmu;
  • fil-ġlieda kontra l-proliferazzjoni ta’ armi nukleari;
  • fil-kummerċ illegali tal-armi, u
  • fl-adeżjoni tal-Iraq għall-istatut ta’ Ruma tal-Qorti Kriminali Internazzjonali;
• il-kummerċ u l-investiment, inkluż l-inkorporazzjoni tar-regoli tal-Organizzazzjoni Dinjija tal-Kummerċ u l-provvista lill-Iraq b’aċċess għas-suq tal-UE u elementi preferenzjali fl-akkwist pubbliku, is-servizzi u l-investimenti;
• oqsma ta’ kooperazzjoni, inkluża għajnuna finanzjarja u teknika; kooperazzjoni għall-iżvilupp soċjali u uman; l-edukazzjoni, it-taħriġ u ż-żgħażagħ; l-impjiegi u l-iżvilupp soċjali; id-drittijiet umani; l-enerġija; it-trasport; u l-ambjent;
• ġustizzja, libertà u sigurtà, inkluż impenn lejn l-istat tad-dritt, għal kooperazzjoni ġudizzjarja f’materji ċivili kif ukoll kooperazzjoni dwar il-migrazzjoni u l-ażil, u dwar il-ġlieda kontra l-kriminalità organizzata, il-ħasil tal-flus u l-finanzjament tat-terroriżmu;
• dispożizzjonijiet istituzzjonali, li jistabbilixxu Kunsill ta’ Kooperazzjoni biex jiltaqa’ darba fis-sena fuq livell ministerjali flimkien ma’ Kumitat Parlamentari ta’ Kooperazzjoni magħmul minn membri tal-parlament tal-Iraq u l-Parlament Ewropew.

DATA TAD-DĦUL FIS-SEĦĦ

Il-ftehim daħal fis-seħħ fl-1 ta’ Awwissu 2018.

SFOND

L-UE adottat strateġija ġdida għall-Iraq fl-2018.

Għal aktar informazzjoni, ara:

• L-UE u l-Iraq (Servizz Ewropew għall-Azzjoni Esterna).

DOKUMENTI EWLENIN

Deċiżjoni tal-Kunsill (UE) 2018/1107 tal- 20 ta’ Lulju 2018 dwar il-konklużjoni ta’ Ftehim ta’ Sħubija u Kooperazzjoni bejn l-Unjoni Ewropea u l-Istati Membri tagħha, minn naħa, u r-Repubblika tal-Iraq, min-naħa l-oħra (ĠU L 203,10.8.2018, p. 1)

Ftehim ta’ Sħubija u Kooperazzjoni bejn l-Unjoni Ewropea u l-Istati Membri tagħha, minn naħa, u r-Repubblika tal-Iraq, min-naħa l-oħra (ĠU L 204,31.7.2012, pp. 20-130)

DOKUMENTI RELATAT

Avviż dwar id-dħul fis-seħħ tal-Ftehim ta’ Sħubija u Koperazzjoni bejn l-Unjoni Ewropea u l-Istati Membri tagħha, minn naħa, u r-Repubblika tal-Iraq, min-naħa l-oħra (ĠU L 207, 16.8.2018, p. 1)

l-aħħar aġġornament 11.01.2019