Il-missjoni tal-politika ta’ sigurtà u ta’ difiża komuni tal-Unjoni Ewropea fin-Niġer (EUCAP Sahel Niger)

SOMMARJU TA’:

Id-Deċiżjoni 2012/392/PESK tal-missjoni tal-politika ta’ sigurtà u ta’ difiża komuni tal-Unjoni Ewropea fin-Niġer (EUCAP Sahel Niger)

X’INHU L-GĦAN TAD-DEĊIŻJONI?

• Din tipprovdi l-bażi legali għall-missjoni tal-politika ta’ sigurtà u ta’ difiża komuni tal-Unjoni Ewropea (UE) fin-Niġer (EUCAP Saħel Niger) u tissettja l-objettivi, kompiti u struttura ta’ kmand tagħha.
• Hi għandha l-għan li tippermetti lill-atturi tas-sigurtà Niġerjani li jiġġieldu t-terroriżmu u l-kriminaltà organizzata, inkluż it-titjib tal-kapaċità tagħhom li jikkontrollaw u jiġġieldu l-migrazzjoni irregolari u jnaqqsu l-livell ta’ kriminalità assoċjata.

PUNTI EWLENIN

G5 tas-Saħel

Fil-2014, il-Burkina Faso, iċ-Chad, il-Mali, il-Mawritanja, u n-Niġer stabbilixxew il-grupp tal-pajjiżi tal-G5 tas-Saħel biex irawmu kooperazzjoni mill-qrib fir-reġjun u jindirizzaw l-isfidi ewlenin li jiffaċċjaw dawn il-pajjiżi, inklużi t-terroriżmu u l-kriminalità organizzata transnazzjonali.

Strateġija tal-UE

• Il-missjoni twaqqfet bħala parti mill-istrateġija Saħel tal-UE 2011 li kellha l-għan li ġġib stabilizzazzjoni fir-reġjun.
• Strateġija integrata ġdida għal Saħel kienet adottata fl-2021. Din tieħu approċċ aktar komprensiv iffukat fuq it-titjib tal-governanza u biex tindirizza d-drittijiet tal-bniedem, l-istat tad-dritt u kwistjonijiet dwar governanza demokratika f’pajjiżi Saħel billi tiżgura trasparenza u akkontabilità akbar.
• L-UE hija membru tal-Alleanza tas-Saħel, imnedija u ffirmata mill-UE, il-Ġermanja u Franza f’Lulju 2017;
  • li għandha l-għan li tipprovdi għajnuna aktar malajr u b’mod aktar effiċjenti madwar ir-reġjun;
  • li l-membri tagħha jinkludu d-Danimarka, Franza, il-Ġermanja, l-Italja, il-Lussemburgu, in-Netherlands, Spanja u r-Renju Unit, l-UE, il-Programm ta’ Żvilupp tan-Nazzjonijiet Uniti, il- Bank Afrikan tal-Iżvilupp u l-Bank Dinji.

Objettivi

Il-missjoni tal-EUCAP Saħel Niġer hi li:

• tippermetti lill-awtoritajiet Niġerjani li jiżviluppaw l-oqfsa strateġiċi bżonnjużi u biex iwettqu aktar strateġiji eżistenti;
• jikkontribwixxu għall-iżvilupp ta’ approċċ integrat, multidixxiplinarju, koerenti, sostenibbli u ffukat fuq id-drittijiet tal-bniedem fost l-atturi tas-sigurtà Niġerjani fil-ġlieda kontra t-terroriżmu u l-kriminalità organizzata;
• jassistu lill-awtoritajiet ċentrali Niġerjani u lokali u l-forza paramilitari biex jiżviluppaw politiki, tekniki u proċeduri biex jikkontrollaw b’mod effettiv u jiġġieldu l-migrazzjoni irregolari.

Kompiti

Biex jilħqu l-objettivi tal-missjoni, EUCAP Saħel Niger trid twettaq ċerti kompiti:

• ittejjeb il-kooperazzjoni fis-settur tas-sigurtà Nigerjana, u tappoġġja l-iżvilupp strateġiku u l-operazzjoni ta’ strateġiji eżistenti fil-qasam;
• Issaħħaħ il-kapaċità tal-forza paramilitari Niġerjana biex jiġġieldu t-terroriżmu u l-kriminaltà organizzata permezz ta’ parir, taħriġ u mentoraġġ;
• tappoġġja l-għanijiet tal-UE dwar il-migrazzjoni, u ssaħħaħ il-kapaċitajiet tal-forzi paramilitari tan-Niġer fil-ġestjoni tal-fruntieri u fil-ġlieda kontra l-migrazzjoni irregolari;
• tiffaċilita l-koordinazzjoni nazzjonali, reġjonali u internazzjonali fil-ġlieda kontra t-terroriżmu, il-kriminaltà organizzata u l-migrazzjoni irregolari u fil-ġestjoni tal-fruntieri.

Struttura ta’ kmand

• EUCAP Saħel Niger għandha katina unifikata ta’ kmand bħala operazzjoni fl-immaniġġjar tal-kriżijiet.
• Kmandant tal-Operazzjoni Ċivili (KOC) għandu l-kmand u l-kontroll ta’ EUCAP Saħel Niger fil-livell strateġiku, taħt il-kontroll politiku u d-direzzjoni strateġika tal-Kumitat Politiku u ta’ Sigurtà u l-awtorità ġenerali tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà.
• Il-KOC jirrapporta lill-Kunsill tal-Unjoni Ewropea permezz tar-Rappreżentant Għoli tal-Unjoni għall-Affarijiet Barranin u l-Politika tas-Sigurtà.
• Il-Kap tal-Missjoni huwa responsabbli għal, u jikkmanda u jikkontrolla l-EUCAP Saħel Niger fin-Niġer u huwa responsabbli direttament quddiem il-KOC.

MINN META TAPPLIKA D-DEĊIŻJONI?

Id-deċiżjoni ilha tapplika mis-16 ta’ Lulju 2012 Il-validità tagħha ġiet estiża diversi drabi u hi skedata li tiskadi fit-30 ta’ Settembru 2024.

SFOND

Għal aktar informazzjoni, ara:

• Is-sħubija tal-Unjoni Ewropea mal-pajjiżi tal-G5 tas-Saħel (is-Servizz Ewropew għall-Azzjoni Esterna).

DOKUMENT PRINĊIPALI

Id-Deċiżjoni tal-Kunsill 2012/392/PESK tas-16 ta’ Lulju 2012 dwar il-missjoni ta’ PSDK tal-Unjoni Ewropea fin-Niġer (EUCAP Saħel Niger) (ĠU L 187, 17.7.2012, pp. 48–51).

L-emendi suċċessivi għad-Deċiżjoni 2012/392/PESK ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

L-istrateġija integrata tal-Unjoni Ewropea fis-Saħel, il-konklużjonijiet tal-Kunsill (16 ta’ April 2021).

Strateġija għas-sigurtà u żvilupp fis-Saħel (Servizz Ewropew għall-Azzjoni Esterna, 2011).

l-aħħar aġġornament 04.09.2023