Statistika għal żmien qasir

SOMMARJU TA’:

Regolament (KE) Nru 1165/98 li jikkonċerna indikaturi għal żmien qasir

X’INHU L-GĦAN TA’ DAN IR-REGOLAMENT?

Huwa jistabbilixxi regoli għall-produzzjoni u t-trażmissjoni ta’ indikaturi ta’ attività ekonomika għal żmien qasir f’konformità mal-klassifikazzjoni NACE Reviżjoni 2. Din l-istatistika tippermetti l-analiżi ta’ żviluppi fuq perjodu qasir ta’ żmien fil-provvista u d-domanda, fatturi ta’ produzzjoni u prezzijiet. Din tippermetti lill-utenti jimmonitorjaw il-kompetittività u l-prestazzjoni tan-negozju madwar l-UE.

Huwa jħassar id-Direttivi 72/211/KEE u 78/166/KEE biex iqis l-iżviluppi ekonomiċi u tekniċi.

PUNTI EWLENIN

L-indiċijiet tal-istatistika għal żmien qasir (STS) bħalissa jkopru erba’ (4) oqsma ewlenin:

• Industrija — taqsimiet minn B sa E tan-NACE, li jinkludu:
  • minjieri,
  • barrieri,
  • provvista ta’ enerġija u ilma, u
  • ġestjoni ta’ skart u attivitajiet ta’ rimedjazzjoni;
• Kostruzzjoni — taqsima F tan-NACE u indikaturi tal-bini u inġinerija ċivili bbażati fuq il-klassifikazzjoni tat-tip ta’ kostruzzjoni;
• Negozju bl-ingrossa u bl-imnut — taqsima G tan-NACE (tkopri negozju bl-ingrossa u bl-imnut u tiswija ta’ vetturi bil-mutur u muturi);
• Servizzi — taqsimiet H, I, J, M u N tan-NACE li jkopru:
  • trasport u ħażna,
  • servizzi ta’ akkomodazzjoni u ikel,
  • informatika u komunikazzjoni,
  • attivitajiet professjonali, xjentifiċi u tekniċi, u
  • attivitajiet ta’ servizzi amministrattivi u ta’ sostenn.

Ir-rekwiżiti speċifiċi għal kull data li għandha tinġabar (pereżempju l-volum tal-produzzjoni, il-fatturat, l-ipprezzar, l-input ta’ xogħol) huma deskritti fl-annessi għar-regolament, bħalma huma:

• il-perjodu ta’ referenza,
• il-frekwenza tal-ġbir ta’ data u
• t-termini ta’ żmien għat-trażmissjoni tad-data lill-Kummissjoni Ewropea (Eurostat).

Il-pajjiżi tal-UE għandu jkollhom kollha awtorità nazzjonali waħda li tkun responsabbli għall-koordinazzjoni:

• tat-trasmissjoni tad-data u informazzjoni rilevanti oħra lill-Eurostat;
• tal-kejl tal-kwalità tad-data.

Il-pajjiżi tal-UE jistgħu jiksbu d-data billi jużaw taħlita ta’ sorsi imma għandhom dejjem jiżguraw li japplikaw il-prinċipju ta’ simplifikazzjoni amministrattiva (jiġifieri l-inqas piż possibbli għan-negozji, speċjalment dawk żgħar). Dawn is-sorsi jinkludu:

• stħarriġ obbligatorju li jinvolvi l-unitajiet legali kif definiti fir-Regolament (KEE) Nru 696/93 dwar is-sistema ta’ produzzjoni tal-UE — unitajiet tal-istatistika); dan l-istħarriġ għandu jintuża biss biex tinkiseb informazzjoni li mhix diġà disponibbli minn sorsi oħra, bħal per eżempju reġistri kummerċjali;
• sorsi oħra bħal data amministrattiva;
• proċeduri ta’ evalwazzjoni tal-istatistika xierqa;
• Skemi ta’ kampjuni Ewropej ikkoordinati mill-Eurostat.

Il-pajjiżi tal-UE għandhom jiżguraw li d-data tagħhom tissodisfa r-rekwiżiti ta’ kwalità stabbiliti mill-Eurostat. Il-pajjiżi tal-UE u l-Eurostat jittestjaw il-kwalità tad-data billi jqabbluha ma’ informazzjoni statistika oħra u jivverifikaw il-konsistenza interna.

Kull tliet (3) snin, il-Kummissjoni Ewropea tħejji rapport għall-Parlament Ewropew u l-Kunsill li jiffoka fuq ir-rilevanza u l-kwalità tal-istatistika u r-reviżjoni tal-indikaturi.

Il-Eurostat, wara li kkonsulta mal-Kumitat tas-Sistema Ewropea tal-Istatistika (ESS), ippubblika manwal metodoloġiku konsultattiv.

Il-Kummissjoni tista’ tadotta aktar leġiżlazzjoni biex timplimenta r-regolament dwar l-istatistika għal żmien qasir (STS). F’dan ir-rigward, hija tirċievi gwida mill-Kumitat tas-Sistema Ewropea tal-Istatistika.

META JIBDA JAPPLIKA R-REGOLAMENT?

Dan ilu japplika sa mis-26 ta’ Ġunju 1998.

SFOND

Għal aktar informazzjoni, ara:

• Statistika tan-negozji għal żmien qasir (Eurostat).

DOKUMENT EWLIENI

Ir-Regolament tal-Kunsill (KE) Nru 1165/98 tad-19 ta’ Mejju 1998 dwar statistika għal żmien qasir (ĠU L 162, 5.6.1998, pp. 1-15)

L-emendi suċċessivi għar-Regolament (KE) Nru 1165/98 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Regolament (KE) Nru 177/2008 tal-Parlament Ewropew u tal-Kunsill tal-20 ta’ Frar 2008 li jistabbilixxi qafas komuni għar-reġistri kummerċjali għall-finijiet tal-istatistika u li jħassar ir-Regolament tal-Kunsill (KEE) Nru 2186/93 (ĠU L 61, 5.3.2008, pp. 6-16)

Regolament tal-Kunsill (KEE) Nru 696/93 tal-15 ta’ Marzu 1993 dwar l-unitajiet tal-istatistika għall-osservazzjoni u l-analiżi tas-sistema ta’ produzzjoni fil-Komunità (ĠU L 76, 30.3.1993, pp. 1-11)

Ara l-verżjoni konsolidata.

l-aħħar aġġornament 18.04.2018