Il-ġestjoni sostenibbli ta’ flotot tas-sajd esterni

PUNTI EWLENIN

Awtorizzazzjonijiet tas-sajd

Bastiment tal-UE li jkun qed jistad barra mill-ilmijiet tal-UE jeħtieġ awtorizzazzjoni mill-pajjiż tal-UE li huwa rreġistrat fih (“stat tal-bandiera”). Din l-awtorizzazzjoni hija bbażata fuq sett ta’ kriterji ta’ eliġibbiltà komuni li jinkludi:

• informazzjoni amministrattiva dwar il-bastiment, sidha u l-kaptan;
• numru ta’ identifikazzjoni uniku tal-bastiment mill-Organizzazzjoni Marittima Internazzjonali (OMI) fejn dan huwa meħtieġ mil-liġi tal-UE;
• liċenzja tas-sajd valida;
• prova li l-bastiment mhuwiex inkluż f’lista ta’ bastimenti tas-sajd illegali (IUU) adottata minn organizzazzjoni reġjonali għall-ġestjoni tas-sajd u/jew mill-UE.

Matul il-perjodu tal-validità, l-istat tal-bandiera kkonċernat jista’ jimmonitorja b’mod regolari jekk il-vettura għadhiex qed tissodisfa l-kundizzjonijiet tal-awtorizzazzjoni.

Għandu jiżgura li l-attivitajiet jitwettqu f’ilmijiet ta’ Stat Kostali barrani bl-awtorizzazzjoni ta’ dak l-Istat Kostali, u wara li titwettaq u tiġi vvalidata evalwazzjoni xjentifika, li tivverifika s-sostenibbiltà tal-operazzjonijiet tas-sajd.

Il-bastimenti tal-UE għandhom jistadu għall-eċċess iddeterminat mill-Istat Kostali barrani, jew għal speċi migratorji, jirrispettaw ir-regoli stabbiliti għal dawn l-ispeċi fil-livell reġjonali.

Operazzjonijiet ta’ għoti ta’ bandiera ġdida

Bastiment li ħareġ mir-reġistru tal-UE biex jerġa’ jiġi rreġistrat f’pajjiż li mhux fl-UE matul il-5 snin qabel l-applikazzjoni għal awtorizzazzjoni — u li sussegwentement irritorna għar-reġistru tal-UE — jirċievi l-awtorizzazzjoni biss jekk il-pajjiż tal-UE kkonċernat ikun iċċekkja li l-bastiment la kien involut f’attivitajiet IUU, u lanqas ma opera jew f’pajjiż li ma jikkooperax jew f’pajjiż terz identifikat li jippermeti s-sajd mhux sostenibbli.

Reġistru pubbliku

Se jiġi stabbilit reġistru elettroniku tal-awtorizzazzjonijiet tas-sajd tal-UE b’parti minnu aċċessibbli għall-pubbliku. Il-parti pubblika se jkun fiha informazzjoni dwar l-isem tal-bastiment, in-numru tal-OMI, l-ispeċijiet fil-mira u ż-żona tas-sajd.

L-UE attwalment għandha bażi ta’ data li fiha jridu jiġu reġistrati l-bastimenti kollha li jtajru l-bandiera ta’ pajjiż tal-UE, u li huma reġistrati f’territorju tal-UE.

Minn meta japplika r-Regolament?

Dan ilu japplika mis-17 ta’ Jannar 2018.