Ross modifikat ġenetikament mhux awtorizzat fi prodotti tar-ross miċ-Ċina — miżuri ta’ emerġenza

PUNTI EWLENIN

Notifika minn qabel

In-negozji tal-ikel u l-għalf iridu:

• jagħtu notifika adegwata minn qabel tan-natura tal-konsenja u tad-data u l-ħin stmati fil-punt tad-dħul magħżul għall-wasla fiżika tagħha;
• jindikaw jekk il-prodott huwiex ikel jew għalf tal-annimali.

Il-kundizzjonijiet tal-importazzjoni

• Kull konsenja ta’ prodotti trid tkun akkumpanjata minn rapport analitiku għal kull lott u minn ċertifikat tas-saħħa mimli, iffirmat u vverifikat minn rappreżentant awtorizzat tal-Amministrazzjoni tas-Superviżjoni tal-Kwalità, l-Ispezzjoni u l-Kwarantina tar-Repubblika tal-Poplu taċ-Ċina.
• Jekk prodott ma jkunx fih ross u ma jkunx magħmul jew prodott mir-ross, ir-rapport u ċ-ċertifikat jistgħu jiġu sostitwiti bi stqarrija mill-operatur responsabbli għall-konsenja li tindika dan il-fatt.
• Kull konsenja trid tiġi identifikata mill-kodiċi li jidher fuq iċ-ċertifikat tas-saħħa. Kull borża individwali jew forma oħra ta’ ppakkjar tal-konsenja trid tiġi identifikata minn dak il-kodiċi.

Kontrolli uffiċjali

• L-awtorità nazzjonali kompetenti trid tiżgura li d-dokumenti ta’ kull konsenja jiġu vverifikati sabiex tiġi ċċertifikata l-konformità ta’ dawn il-prodotti kollha mal-kundizzjonijiet tal-importazzjoni.
• Jekk konsenja ta’ prodotti tar-ross ma tkunx akkumpanjata minn ċertifikat tas-saħħa jew mir-rapport analitiku, il-konsenja tkun trid tintbagħat mill-ġdid lejn il-pajjiż tal-oriġini jew inkella tinqered.
• Jekk konsenja tkun akkumpanjata miċ-ċertifikat tas-saħħa u mir-rapport analitiku, l-awtorità trid tieħu kampjun sabiex tanalizza l-preżenza ta’ ross MĠ mhux awtorizzat. Jekk il-konsenja tkun magħmula minn bosta lottijiet, kull lott irid ikun soġġett għat-teħid tal-kampjuni u jiġi analizzat.
• Il-konsenja tista’ tiġi awtorizzata tkompli fi triqitha sakemm joħorġu r-riżultati tal-kontrolli fiżiċi. Madankollu, matul dan iż-żmien, hija trid tibqa’ taħt il-kontroll kontinwu tal-awtoritajiet kompetenti.
• Iċ-ċirkolazzjoni libera tal-konsenji hija permessa biss wara li jiġu pprovduti r-riżultati tat-testijiet fiżiċi u jekk il-lottijiet kollha jkunu konformi mal-liġi tal-UE.

Rapporti

Kull 3 xhur, il-pajjiżi tal-UE jridu jibagħtu rapport lill-Kummissjoni Ewropea li jagħti rendikont tar-riżultati tat-testijiet analitiċi kollha mwettqa fil-perjodu ta’ 3 xhur ta’ qabel. Ir-rapport irid jinkludi l-informazzjoni li ġejja:

• in-numru ta’ konsenji li minnhom ittieħdu l-kampjuni għall-analiżi;
• ir-riżultati tal-kontrolli mwettqa;
• l-għadd ta’ konsenji li ġew irrifjutati minħabba n-nuqqas ta’ ċertifikat tas-saħħa jew rapport analitiku.