L-użu u l-ħżin ta’ u l-kummerċ fil-merkurju

PUNTI EWLENIN

Il-kummerċ fil-merkurju, il-komposti tal-merkurju u t-taħlitiet tal-merkurju

Ir-Regolament jipprojbixxi:

• l-esportazzjonijiet tal-merkurju mill-1 ta’ Jannar 2018;
• l-esportazzjonijiet tat-taħlitiet tal-merkurju u tal-komposti tal-merkurju elenkati fl-Anness I, mill-1 ta’ Jannar 2018 jew mill-1 ta’ Jannar 2020 (skont il-kompost inkwistjoni);
• l-importazzjonijiet tal-merkurju u tat-taħlitiet tal-merkurju elenkati fl-Anness I, mill-1 ta’ Jannar 2018.

Il-kummerċ, il-manifattura u t-tqegħid fis-suq ta’ prodotti miżjuda bil-merkurju

Ir-Regolament jipprojbixxi:

• l-esportazzjoni, l-importazzjoni u l-manifattura fl-Unjoni Ewropea (UE) tal-prodotti miżjuda bil-merkurju elenkati fl-Anness II (inklużi batteriji, swiċċijiet u relays, ċerti lampi, kożmetiċi, pestiċidi, barometri u termometri) mid-dati speċifikati fl-Anness, skont il-prodott inkwistjoni;
• il-manifattura u t-tqegħid fis-suq ta’ prodotti ġodda miżjuda bil-merkurju¹, sakemm ma jkunx ippruvat li jipprovdu benefiċċji ambjentali jew għas-saħħa sinifikanti u jkunu awtorizzati mill-Kummissjoni Ewropea permezz ta’ att ta’ implimentazzjoni.

Amalgama dentali

Ir-Regolament jipprojbixxi:

• l-użu tal-amalgama dentali fil-mili ta’ snien tal-ħalib u għat-trattament dentali ta’ tfal taħt il-15-il sena u fin-nisa li qed ireddgħu jew li huma tqal mill-1 ta’ Lulju 2018.
• l-użu tal-amalgama dentali għat-trattament dentali fl-UE mill-1 ta’ Jannar 2025 (l-Istati Membri tal-UE li jeħtieġu aktar żmien biex jadattaw is-sistema tal-kura tas-saħħa nazzjonali tagħhom jingħataw deroga sat-30 ta’ Ġunju 2026);
• l-esportazzjoni tal-amalgama dentali mill-1 ta’ Jannar 2025;
• il-manifattura u l-importazzjoni tal-amalgama dentali mill-1 ta’ Lulju 2026;

Permezz ta’ deroga, l-użu, l-importazzjoni u l-manifattura tal-amalgama dentali huma awtorizzati għal trattament dentali meta jitqies li huwa strettament meħtieġ mit-tabib dentali abbażi tal-ħtiġijiet mediċi speċifiċi tal-pazjent.

Użu tal-merkurju fil-proċessi tal-manifattura

Ir-Regolament jipprojbixxi:

• l-użu tal-merkurju u l-komposti tal-merkurju fi proċessi tal-manifattura li fihom:
  • il-merkurju jew il-komposti tal-merkurju jintużaw bħala katalisti² (mill-1 ta’ Jannar 2018), inkluż għall-produzzjoni tal-poliuretan,
  • il-merkurju jintuża bħala elettrodu³ (mill-1 ta’ Jannar 2022);
• proċessi ta’ manifattura ġodda li jużaw il-merkurju jew il-komposti tal-merkurju⁴, sakemm ma jkunx ippruvat li jipprovdu benefiċċji ambjentali jew għas-saħħa sinifikanti u jkunu awtorizzati formalment mill-Kummissjoni.

Użu tal-merkurju fl-estrazzjoni tad-deheb artiġjanali u fuq skala żgħira

L-estrazzjoni u l-ipproċessar tad-deheb artiġjanali u fuq skala żgħira fejn l-amalgamazzjoni tal-merkurju tintuża biex jiġi estratt id-deheb mill-prodott tal-minjieri huma pprojbiti mill-1 ta’ Jannar 2018.

L-immaniġġjar tal-iskart

• L-operaturi ta’ faċilitajiet tal-iskart jistgħu jaħżnu temporanjament skart tal-merkurju f’forma likwida, sakemm isir ir-rimi finali, jekk jiġu ssodisfatti rekwiżiti speċifiċi għall-ħżin tiegħu u l-ħżin isir f’faċilità dedikata fuq l-art li tkun mgħammra b’mod xieraq.
• Il-ħżin temporanju tal-iskart likwidu tal-merkurju mhux se jibqa’ permess mill-1 ta’ Jannar 2026 (ir-Regolament Delegat (UE) 2022/2526).
• Ir-Regolament jintroduċi sistema li tiżgura traċċabilità fil-katina kollha tal-immaniġġjar tal-iskart tal-merkurju. Il-produtturi tal-iskart u l-operaturi tal-faċilità tal-iskart tal-merkurju għandhom iżommu reġistru tal-informazzjoni.

Emissjonijiet ta’ merkurju mill-krematorji

Sal-31 ta’ Diċembru 2025, il-Kummissjoni se tippubblika gwida dwar teknoloġiji ta’ tnaqqis għall-emissjonijiet tal-merkurju u l-komposti tal-merkurju mill-krematorji.

Rapportar

Sal-1 ta’ Jannar 2020 u f’intervalli regolari wara dan, l-Istati Membri għandhom jirrapportaw lill-Kummissjoni u jagħmlu disponibbli għall-pubbliku:

• informazzjoni dwar l-implimentazzjoni ta’ dan ir-Regolament;
• informazzjoni meħtieġa għall-issodisfar tal-obbligu ta’ rapportar tal-UE skont il-Konvenzjoni ta’ Minamata;
• sommarju tal-informazzjoni pprovduta kull sena mill-operaturi ekonomiċi ta’ sorsi speċifiċi (eż. it-tindif tal-gass naturali, l-estrazzjoni mhux ferruża u l-operazzjonijiet ta’ tidwib) lill-awtoritajiet nazzjonali rilevanti dwar l-immaniġġjar tal-iskart tal-merkurju tagħhom;
• informazzjoni dwar siti li fihom ammonti kbar ta’ merkurju jew ta’ skart tal-merkurju (aktar minn 50 tunnellata ta’ merkurju) fit-territorji tagħhom;
• informazzjoni dwar il-miżuri implimentati fuq il-bażi tal-gwida tal-Kummissjoni dwar teknoloġiji ta’ tnaqqis għall-emissjonijiet tal-merkurju mill-krematorji.

Sal-31 ta’ Mejju ta’ sena kalendarja partikolari, l-importaturi u l-manifatturi tal-amalgama dentali għandhom jirrappurtaw lill-awtorità kompetenti tagħhom għas-sena kalendarja preċedenti dwar l-ammont ta’ amalgama dentali li huma importaw jew immanifatturaw.

Rieżami

Il-Kummissjoni għandha tirrapporta sat-30 ta’ Ġunju 2029 dwar:

• l-implimentazzjoni u l-impatt tal-gwida dwar it-teknoloġiji tat-tnaqqis għall-emissjonijiet tal-merkurju mill-krematorji;
• il-ħtieġa li tinżamm l-eżenzjoni mill-projbizzjoni fuq l-użu, l-importazzjoni u l-manifattura tal-amalgama dentali abbażi tal-ħtiġijiet mediċi speċifiċi tal-pazjent;
• l-iżviluppi taħt il-Konvenzjoni ta’ Minamata fir-rigward tat-tneħħija gradwali tal-użu illegali tal-merkurju fil-kożmetiċi;
• il-ħtieġa li jitneħħew gradwalment l-użi tal-merkurju li fadal;
• il-ħtieġa li tiġi estiża l-lista ta’ sorsi ta’ skart tal-merkurju;
• il-ħtieġa li tiġi estiża l-lista ta’ komposti tal-merkurju.

Il-liġi nazzjonali

L-Istati Membri jistgħu japplikaw rekwiżiti aktar stretti minn dawk stabbiliti f’dan ir-Regolament.

Il-Konvenzjoni ta’ Minamata

Ir-Regolament jippermetti lill-UE u lill-Istati Membri japprovaw, jirratifikaw u jimplimentaw il-Konvenzjoni Minamata tal-2013 dwar il-merkurju ffirmata mill-UE u l-Istati Membri u jiżgura li d-dritt tal-Unjoni jkun konformi mal-konvenzjoni.