Ċittadini mhux tal-UE — dħul u residenza għal riċerka, studji, taħriġ, servizz volontarju, edukazzjoni sekondarja u au pairing

PUNTI EWLENIN

Kamp ta’ applikazzjoni

• Id-Direttiva tapplika għad-dħul u r-residenza ta’ ċittadini mhux tal-UE għal riċerka, studji, traineeships u parteċipazzjoni fis-Servizz Volontarju Ewropew (SVE).
• Il-pajjiżi tal-UE jistgħu jiddeċiedu huma stess li japplikaw regoli fil-livell tal-UE għal ċittadini mhux tal-UE li jixtiequ jiġu l-UE għal skambju ta’ studenti, proġett edukattiv, attività volontarja barra s-SVE jew kollokament au pair.

Ammissjoni

• L-applikanti għandhom jissodisfaw kemm il-kundizzjonijiet ġenerali kif ukoll dawk speċifiċi għall-kategorija.
• Il-kundizzjonijiet ġenerali jinkludu:
  • dokument tal-ivvjaġġar validu għat-tul tas-soġġorn intenzjonat;
  • evidenza ta’ riżorsi suffiċjenti li jkopru l-ispejjeż ta’ sustinenza u ta’ ritorn;
  • assigurazzjoni tas-saħħa.
• Eżempji ta’ kundizzjonijiet speċifiċi huma “ftehim jew kuntratt ta’ ospitar” għar-riċerkaturi, jew aċċettazzjoni minn istitut ta’ edukazzjoni ogħla għall-istudenti.

Drittijiet

• Id-dritt li jiġu ttrattati bl-istess mod bħaċ-ċittadini tal-UE huwa bbażat fil-biċċa l-kbira fuq id-Direttiva 2011/98/UE. Dan ifisser, pereżempju, li r-riċerkaturi — ħlief fil-każijiet fejn il-pajjiżi tal-UE jistgħu japplikaw eċċezzjonijiet — huma intitolati li jiġu ttrattati fuq bażi ugwali għaċ-ċittadini tal-UE.
• L-istudenti jistgħu jaħdmu barra l-ħin tal-istudju tagħhom — il-pajjiżi tal-UE ma jitħallewx jillimitaw is-sigħat tax-xogħol tagħhom taħt 15-il siegħa fil-ġimgħa.
• Wara li jtemmu r-riċerka jew l-istudji tagħhom, l-istudenti u r-riċerkaturi għandhom id-dritt li joqogħdu mill-inqas 9 xhur biex ifittxu xogħol jew jistabbilixxu negozju.
• Il-membri tal-familja tar-riċerkaturi jitħallew jingħaqdu magħhom taħt kundizzjonijiet speċifiċi.

Mobilità

• Ir-riċerkaturi, u l-istudenti li huma koperti bi programmi li jippromwovu l-moviment ta’ ċittadini mhux tal-UE fi ħdan l-UE (pereżempju hemm ftehim bejn żewġ istituti ta’ edukazzjoni ogħla jew aktar f’pajjiż wieħed tal-UE jew f’diversi pajjiżi tal-UE), jistgħu jwettqu parti mill-istudji jew mir-riċerka tagħhom f’pajjiż ieħor tal-UE.
• Il-proċedura li għandha tiġi segwita tiddependi fuq it-tul ta’ żmien li huma se jqattgħu barra mill-pajjiż. Il-membri tal-familja tar-riċerkaturi jistgħu jakkumpanjawhom taħt l-istess kundizzjonijiet ta’ pajjiż ieħor tal-UE.

Proċedura u trasparenza

Id-Direttiva tistabbilixxi r-regoli dwar l-ipproċessar tal-applikazzjonijiet:

• Il-pajjiżi tal-UE għandhom jissodisfaw l-iskadenzi meta jittrattaw l-applikazzjonijiet.
• Għandha tiġi pprovduta informazzjoni dwar il-kundizzjonijiet ta’ dħul u residenza, inkluż l-ammont minimu ta’ flus meħtieġ għal kull xahar.
• Il-pajjiżi tal-UE jistgħu jimponu tariffi għall-ipproċessar tal-applikazzjonijiet. Madankollu, dawn ma għandhomx ikunu sproporzjonati jew eċċessivi.