Kooperazzjoni intensifikata fis-sorveljanza marittima Ewropea

PUNTI EWLENIN

Is-CISE huwa wieħed mill-objettivi strateġiċi ewlenin tal-Politika Marittima Integrata tal-UE u element importanti tal-Istrateġija dwar is-Sigurtà Marittima.

X’inhu s-CISE Marittimu?

Dan huwa proċess kollaborattiv volontarju li jibni fuq il-pjattaformi u s-sistemi eżistenti ta’ kondiviżjoni u skambju ta’ informazzjoni. L-interoperabbiltà mtejba bejn dawn għandha tottimizza l-iskambju ta’ informazzjoni fost l-awtoritajiet ta’ sorveljanza, li sussegwentement tirriżulta f’għarfien marittimu aħjar. Barra minn hekk, l-għan ewlieni tas-CISE Marittimu huwa li jagħti spinta lis-sikurezza, lis-sigurtà u lill-protezzjoni ambjentali fl-oqsma marittimi tal-UE.

X’inhuma l-benefiċċji tiegħu?

• għarfien akbar tas-sitwazzjoni marittima li jippermetti operazzjonijiet ta’ sorveljanza risponsivi u kkoordinati aħjar;
• tnaqqis sostanzjali fl-isforzi tal-ġbir tad-dejta;
• tnaqqis fl-ispejjeż amministrattivi u operattivi tal-attivitajiet ta’ sorveljanza marittima.

Kisbiet fil-livell tal-UE:

Ġew stabbiliti għadd ta’ sistemi li jservu oqsma ta’ politika differenti u li jaqsmu setturi differenti. Dawn jinkludu:

• SafeSeaNet, li tipprovdi servizzi marittimi integrati għall-monitoraġġ tat-traffiku (għarfien tas-sitwazzjoni) u għall-iżgurar tal-implimentazzjoni tal-leġiżlazzjoni tal-UE;
• Sistema Komuni ta’ Komunikazzjoni u Informazzjoni f’każ ta’ Emerġenza, li tiffaċilita l-komunikazzjoni matul diżastri u inċidenti marittimi;
• Sistema ta’ Monitoraġġ tal-Bastimenti, sistema ta’ monitoraġġ fuq bażi satellitarja li tipprovdi dejta lill-awtoritajiet tas-sajd dwar il-pożizzjoni ġeografika, id-direzzjoni u l-veloċità tal-bastimenti;
• Netwerk ta’ Sorveljanza Marittima, li jippermetti l-iskambju ta’ informazzjoni marittima operattiva u servizzi bħal pożizzjonijiet tal-vapuri, direzzjonijiet, dejta ta’ identifikazzjoni, chat jew ritratti;
• Sistema Ewropea ta’ Sorveljanza tal-Fruntieri (Eurosur), sistema b’aktar minn skop wieħed li tipprevjeni l-immigrazzjoni illegali u l-kriminalità transkonfinali fil-fruntieri esterni tal-UE;
• L-Aġenzija Ewropea għall-Ġestjoni tal-Fruntieri Esterni - Frontex, li tippromwovi, tikkoordina u tiżviluppa l-ġestjoni tal-fruntieri Ewropej;
• “Single Windows” Nazzjonali, li jipprovdu pjattaformi nazzjonali għall-iskambju ta’ informazzjoni għall-finijiet ta’ rappurtar u kondiviżjoni ta’ informazzjoni relatata mal-vapuri u li huma marbuta mas-sistema ta’ skambju u informazzjoni marittima tal-UE.

X’inhuma l-oqsma ta’ prijorità għall-kooperazzjoni trans-settorjali u transkonfinali ulterjuri?

• kondiviżjoni aġġornata tal-pożizzjonijiet tal-bastimenti u tal-inġenji tal-ajru ta’ viġilanza sabiex jiġi assigurat l-aktar rispons veloċi possibbli fil-każ ta’ operazzjonijiet ta’ salvataġġ tal-massa u/jew avvenimenti oħrajn fuq il-baħar;
• għodod kollaborattivi għall-ġestjoni ta’ kriżijiet transkonfinali;
• l-ikkombinar tad-dejta u l-iskambju ta’ informazzjoni dwar bastimenti suspettużi li jinnavigaw fl-ibħra tal-UE;
• reġistri nazzjonali ta’ dgħajjes għal skopijiet ta’ rikreazzjoni sabiex ikun jista’ jsir l-ipproċessar kompjuterizzat tat-talbiet ta’ informazzjoni bejn il-pajjiżi tal-UE.

Il-Kummissjoni tipproponi wkoll bosta azzjonijiet oħrajn. Pereżempju, hija għandha l-ħsieb li:

• tiżviluppa manwal mhux vinkolanti dwar is-CISE Marittimu sal-aħħar tal-2016 b’rakkomandazzjonijiet tal-aqwa prassi u tagħrif dwar kif għandu jiġi applikat is-CISE;
• tappoġġja miżuri li jiżviluppaw, iżommu u jiċċirkolaw standards li jippermettu li s-sistemi ta’ sorveljanza marittima jkunu interoperabbli;
• tkompli tanalizza l-leġiżlazzjoni settorjali eżistenti fil-livell tal-UE sabiex tneħħi kwalunkwe ostakoli legali li fadal għall-kondiviżjoni ta’ informazzjoni trans-settorjali, filwaqt li tassigura l-konformità mar-rekwiżiti rilevanti ta’ protezzjoni tad-dejta.

Sal-2018, il-Kummissjoni ser tniedi wkoll proċess ta’ rieżami sabiex tivvaluta l-implimentazzjoni tas-CISE Marittimu u jekk hemmx bżonn li tittieħed azzjoni ulterjuri.

Għal aktar tagħrif, ara Is-sorveljanza marittima integrata fuq is-sit elettroniku tal-Kummissjoni Ewropea.