Aġenzija tal-Unjoni Ewropea għall-Ferroviji — l-iżgurar ta’ żona ferrovjarja sikura u interoperabbli

SOMMARJU TAD-DOKUMENT:

Regolament (UE) 2016/796 dwar l-Aġenzija tal-Unjoni Ewropea għall-Ferroviji

X’INHU L-GĦAN TAR-REGOLAMENT?

Dan jistabbilixxi l-Aġenzija tal-Unjoni Ewropea għall-Ferroviji (l-Aġenzija). L-Aġenzija għandha l-għan li:

• tikkontribwixxi għall-iżvilupp ulterjuri u l-funzjonament effettiv ta’ żona ferrovjarja unika Ewropea;
• tiggarantixxi livell għoli ta’ sikurezza u interoperabbiltà ferrovjarja*;
• ittejjeb il-kompetittività tal-ferroviji.

Ir-Regolament huwa wieħed minn 3 atti leġiżlattivi li jkopru l-aspetti tekniċi tar-raba’ pakkett ferrovjarju li għandu l-għan li jagħti nifs ġdid lis-settur ferrovjarju u joffri servizz ta’ kwalità aħjar u aktar għażla lill-passiġġieri. Ir-Regolament jaħdem flimkien mar-Regolament dwar l-interoperabbiltà tas-sistema ferrovjarja fl-UE u d-Direttiva dwar is-sikurezza ferrovjarja.

PUNTI EWLENIN

L-objettivi ewlenin tal-Aġenzija għas-sistema ferrovjarja tal-UE huma:

• l-iżvilupp ta’ approċċ komuni għas-sikurezza;
• żieda fil-livell tal-interoperabbiltà;
• l-eżami tar-regoli ferrovjarji nazzjonali sabiex jiġu appoġġjati l-awtoritajiet nazzjonali li jaġixxu fl-oqsma tas-sikurezza u l-interoperabbiltà ferrovjarja; u
• il-promozzjoni tal-aħjar proċeduri.

Sikurezza ferrovjarja

L-Aġenzija għandha diversi kompiti fir-rigward tas-sikurezza ferrovjarja fosthom:

• l-għoti ta’ rakkomandazzjonijiet lill-Kummissjoni Ewropea dwar indikaturi komuni tas-sikurezza, metodi u miri; u dwar is-sistema ta’ ċertifikazzjonijiet ta’ korpi responsabbli mis-sikurezza;
• il-ħruġ, it-tiġdid, is-sospensjoni u l-emendar ta’ ċertifikati ta’ sikurezza uniċi u l-kooperazzjoni mal-awtoritajiet tas-sikurezza nazzjonali f’dan ir-rigward;
• l-inkoraġġiment tal-iskambju ta’ informazzjoni dwar aċċidenti relatati mas-sikurezza, inċidenti u inċidenti li kważi seħħew.

Interoperabbiltà

L-Aġenzija għandha għadd ta’ kompiti mfasslin biex itejbu l-interoperabbiltà billi jitnaqqsu l-ostakli tekniċi. Dawn jinkludu:

• l-għoti ta’ rakkomandazzjonijiet lill-Kummissjoni biex tirrevedi l-ispeċifikazzjonijiet tekniċi dwar l-interoperabbiltà (TSIs);
• il-ħruġ ta’ awtorizzazzjonijiet għat-tqegħid fis-suq ta’ vetturi ferrovjarji u tipi ta’ vetturi. L-Aġenzija għandha wkoll is-setgħa li ġġedded, temenda, tissospendi u tirrevoka dawn l-awtorizzazzjonijiet;
• l-approvazzjoni ta’ tagħmir fil-ġenb tal-binarji tas-sistema Ewropea tal-Ġestjoni tat-Traffiku Ferrovjarju (l-ERTMS).

Regoli nazzjonali

L-Aġenzija għandha l-kompitu li tiżgura l-konformità tar-regoli nazzjonali mar-rekwiżiti essenzjali tas-sikurezza u l-interoperabbiltà ferrovjarja. B’mod partikolari, din għandha:

• teżamina kemm ir-regoli nazzjonali abbozzati kif ukoll dawk eżistenti sabiex tiżgura l-konformità tagħhom u li huma ma jirriżultawx f'xi diskriminazzjoni arbitrarja;
• timmaniġġja sistema tal-IT apposta li fiha regoli nazzjonali u mezzi nazzjonali aċċettabbli ta’ konformità.

ERTMS

L-Aġenzija taġixxi bħala l-awtorità tas-sistema biex tiżgura l-iżvilupp koordinat tal-ERTMS fl-UE, f’konformità mat-TSIs rilevanti.

Żona ferrovjarja unika Ewropea (SERA, Single European railway area)

L-Aġenzija għandha għadd ta’ kompiti relatati mal-monitoraġġ tas-SERA fosthom:

• il-prestazzjoni u t-teħid ta’ deċiżjonijiet ta’ awtoritajiet nazzjonali tas-sikurezza;
• korpijiet ta’ valutazzjoni tal-konformità notifikati;
• progress dwar is-sikurezza ferrovjarja u l-interoperabbiltà.

MINN META TAPPLIKA?

Din ilha tapplika mill-15 ta’ Ġunju 2016 (b’perjodu tranżitorju ta’ 3 snin għal kompiti relatati mal-awtorizzazzjoni, iċ-ċertifikazzjoni u l-approvazzjoni ta’ tagħmir fil-ġenb tal-binarji tal-ERTMS ).

SFOND

Għal iktar informazzjoni, ara:

• Aġenzija tal-Unjoni Ewropea għall-Ferroviji;
• “It-Trasport Ferrovjarju: Ftehim storiku se jwassal servizzi ferrovjarji aħjar għall-passiġġieri” (Il-Kummissjoni Ewropea - Stqarrija għall-istampa).

* TERMINI EWLENIN

DOKUMENT EWLIENI

Ir-Regolament (UE) 2016/796 tal-Parlament Ewropew u tal-Kunsill tal-11 ta’ Mejju 2016 dwar l-Aġenzija tal-Unjoni Ewropea għall-Ferroviji u li jħassar ir-Regolament (KE) Nru 881/2004 (ĠU L 138, 26.5.2016, pp. 1-43)

ATTI RELATATI

Id-Direttiva (UE) 2016/797 tal-Parlament Ewropew u tal-Kunsill tal-11 ta’ Mejju 2016 dwar l-interoperabbiltà tas-sistema ferrovjarja fl-Unjoni Ewropea (ĠU L 138, 26.5.2016, pp. 44-101)

Id-Direttiva (UE) 2016/798 tal-Parlament Ewropew u tal-Kunsill tal-11 ta’ Mejju 2016 dwar is-sikurezza ferrovjarja (ĠU L 138, 26.5.2016, pp. 102-149)

l-aħħar aġġornament 22.11.2016