Reati tat-traffiku fit-triq — l-iskambju ta’ informazzjoni bejn il-pajjiżi

PUNTI EWLENIN

Id-direttiva tapplika għar-reati segwenti:

• sewqan b’veloċità eċċessiva,
• meta ma jintlibisx iċ-ċinturin tas-sikurezza,
• meta dak li jkun ma jieqafx fid-dwal tat-traffiku,
• sewqan taħt l-influwenza tax-xorb,
• sewqan taħt l-influwenza tad-drogi,
• meta ma jintlibisx elmu ta’ protezzjoni,
• l-użu ta’ karreġġata pprojbita (eż. karreġġata għall-karozzi tal-linja),
• l-użu illegali ta’ telefon ċellulari jew ta’ kwalunkwe tagħmir ieħor ta’ komunikazzjoni waqt is-sewqan.

Kull pajjiż irid jagħti l-aċċess għad-data dwar ir-reġistrazzjoni tal-vetturi nazzjonali tiegħu lil kwalunkwe pajjiż ieħor li jkun qed jinvestiga reat imwettaq fit-toroq tiegħu, sabiex ikunu jistgħu jidentifikaw il-vetturi u s-sidien jew l-utenti tagħhom.

Jekk il-pajjiż fejn ikun seħħ ir-reat jiddeċiedi li jieħu azzjoni ulterjuri, irid jinnotifika lit-trasgressur potenzjali u jinfurmah dwar il-konsegwenzi legali, f’ittra li tiddikjara:

• in-natura tar-reat,
• il-post, id-data u l-ħin,
• il-liġi miksura u l-piena,
• (Jekk ikun xieraq), it-tagħmir li ntuża fl-osservazzjoni tar-reat.

Biex iwettaq monitoraġġ tal-prestazzjoni ta’ dan l-arranġament, kull pajjiż irid jibgħat rapport lill-Kummissjoni sa Mejju 2016 u kull sentejn wara dik id-data, bid-dettalji tat-tfittxijiet magħmula u tan-numru ta’ ittri ta’ notifika mibgħuta sussegwentement.