Appoġġ lill-SMEs li jwettqu attivitajiet ta’ riċerka (Eurostars-2)

 

SOMMARJU TAD-DOKUMENT:

Deċiżjoni Nru 553/2014/UE – il-parteċipazzjoni tal-UE fi programm ta' riċerka u żvilupp bil-għan li tappoġġa impriżi żgħar u medji li jwettqu r-riċerka u l-iżvilupp

X'INHU L-GĦAN TA' DIN ID-DEĊIŻJONI?

Hija tistabbilixxi Eurostars-2, programm konġunt iddisinjat biex jappoġġa impriżi żgħar u medji (SMEs) li jwettqu r-riċerka u l-iżvilupp (R & Ż) u li jixtiequ jaħdmu flimkien fil-livell transnazzjonali.

PUNTI EWLENIN

Eurostars-2, li huwa s-segwitu għal Eurostars-1, huwa kofinanzjat mill-Programm Orizzont 2020 tal-Unjoni Ewropea (UE) u mill-baġits nazzjonali ta’ aktar minn 30 pajjiż parteċipanti u msieħba f’Eurostars-2. Il-pajjiżi msieħba huma membri ta’ EUREKA jew pajjiżi assoċjati ma’ Eureka. L-UE tipparteċipa f’dan il-programm konġunt fuq il-bażi tal-Artikolu 185 tat-Trattat dwar il-Funzjonament tal-Unjoni Ewropea (Sħubija Pubblika-Pubblika).

Objettivi

• Eurostars-2 għandu l-għan li jikkontribwixxi għal allinjament u sinkronizzazzjoni ulterjuri tal-programmi nazzjonali ta’ R&Ż. Dan isir sabiex tinkiseb integrazzjoni aktar b’saħħitha fuq il-livell xjentifiku, ta’ ġestjoni u finanzjarju tar-R&Ż madwar l-Ewropa.
• Għandu l-għan li jagħti appoġġ lill-SMEs li jwettqu attivitajiet riċerka (ara hawn taħt) biex iżidu l-għarfien u l-intensità tar-riċerka tagħhom — u b’hekk il-kapaċità tal-innovazzjoni tagħhom — sabiex jespandu l-attivitajiet kummerċjali tagħhom fi swieq ikbar, ħafna drabi internazzjonali. Dan jikkontribwixxi għall-kompetittività, it-tkabbir u l-ħolqien tal-impjiegi.

Definizzjoni

“SME li twettaq attivitajiet ta’ riċerka u żvilupp” hija definita bħala SME li mill-inqas tissodisfa waħda mill-kundizzjonijiet li ġejjin:

• tinvesti mill-ġdid tal-inqas 10 % tal-fatturat tagħha f’attivitajiet ta’ R&Ż;
• tiddedika tal-inqas 10 % tal-ekwivalenti full-time tagħha (jew l-istess numru ta’ sigħat maħdumin mill-persunal part-time) lil attivitajiet ta’ R&Ż;
• ikollha mill-inqas ħamsa ekwivalenti full-time (għal SME b’inqas minn 100 ekwivalent full-time) jew 10 ekwivalenti full-time (għal SME li għandha aktar minn 100 ekwivalent full-time) għall-attivitajiet ta’ R&Ż.

Parteċipazzjoni u finanzjament

• l-parteċipazzjoni ta’ entitajiet legali taħt il-proġetti tal-Eurostars-2 issir skont ir-regoli għall-parteċipazzjoni u d-disseminazzjoni tal-Orizzont 2020 (Regolament (UE) Nru 1290/2013) u d-derogi speċifiċi li jinsabu fid-Deċiżjoni dwar Eurostars2. Entitajiet legali oħrajn bħal universitajiet u istituti tar-riċerka wkoll jistgħu jipparteċipaw fil-proġetti tal-Eurostars-2.
• Entitajiet legali mill-pajjiżi msieħba tal-Eurostars-2 mhumiex eliġibbli għal kontribuzzjoni finanzjarja mill-UE. Ir-regoli tal-finanzjament tal-programmi nazzjonali parteċipanti japplikaw għall-għotjiet tal-Eurostars 2 li jitwasslu lill-benefiċjarji finali permezz tal-Korpi ta’ Finanzjament Nazzjonali (NFBs). Aktar regoli dwar il-parteċipazzjoni u l-finanzjament jinsabu ddettaljati fil-pjanijiet ta’ ħidma annwali ta’ Eurostars-2.

Proġetti

• Il-proġetti ta’ Eurostars-2 huma “minn isfel għal fuq”, transnazzjonali u ffukati fuq ir-riżultati li għadhom potenzjal tas-suq, jiġifieri fi żmien sentejn minn meta titlesta l-attività, ir-riżultati tal-proġetti huma mistennija li jiġu introdotti fis-suq.

Implimentazzjoni

• L-ESE, is-Segretarjat tal-Eureka, inħatar mill-pajjiżi parteċipanti biex jimplimenta Eurostars-2. L-ESE jikkonkludi ftehimiet bilaterali mal-NFBs li jistabbilixxu r-responsabbiltajiet tal-partijiet fir-rigward tar-regoli, l-objettivi u l-arranġamenti għall-implimentazzjoni ta’ Eurostars-2.
• L-ESE jorganizza s-sejħiet għal proposti, l-evalwazzjoni bejn il-pari (l-evalwazzjoni tax-xogħol imwettaq minn persuna waħda jew iktar b’kompetenza simili bħal ta’ min wettaq ix-xogħol (pari)), l-għażla u l-monitoraġġ tal-proġetti, kif ukoll l-allokazzjoni tal-kontribuzzjoni tal-UE.

Il-Baġit

• L-UE qed tikkontribwixxi EUR 287 miljun għall-proġetti ta’ Eurostars-2 fuq il-perjodu 2014–20244. Din il-kontribuzzjoni hija ekwivalenti għal mill-inqas terz tal-kontribuzzjoni pprovduta mill-baġits nazzjonali tal-pajjiżi parteċipanti.
• Xi finanzjament jingħata wkoll mill-organizzazzjonijiet parteċipanti.
• Il-kontribuzzjoni finanzjarja tal-UE hija soġġetta għal impenji formali mill-pajjiżi parteċipanti. L-appoġġ finanzjarju prinċipalment ikun fl-għamla ta’ għotjiet lil proġetti magħżula.

META JAPPLIKA R-REGOLAMENT?

Ilu japplika mis-27 ta' Ġunju 2014.

SFOND

Għal aktar informazzjoni ara:

• “X'inhu Eurostars” fuq is-sit web ta' Eureka.

DOKUMENT EWLIENI

Deċiżjoni Nru 53/2014/UE tal-Parlament Ewropew u tal-Kunsill tal-15 ta’ Mejju 2014 dwar il-parteċipazzjoni tal-Unjoni fi Programm ta’ Riċerka u Żvilupp imwettaq b’mod konġunt minn diversi Stati Membri li għandu l-għan li jappoġġa intrapriżi żgħar u medji li jwettqu riċerka u żvilupp (ĠU L 169, 7.6.2014, p. 1–13)

ATTI RELATATI

Regolament (UE) Nru 1291/2013 tal-Parlament Ewropew u tal-Kunsill tal-11 ta’ Diċembru 2013 li jistabbilixxi Orizzont 2020 – il-Programm Qafas għar-Riċerka u l-Innovazzjoni (2014-2020) u li jħassar id-Deċiżjoni Nru 1982/2006/KE (ĠU L 347, 20.12.2013, p. 104-173).

Emendi u korrezzjonijiet suċċessivi għar-Regolament (Euratom) Nru 1291/2013 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

Regolament (UE) Nru 1290/2013 tal-Parlament Ewropew u tal-Kunsill tal-11 ta’ Diċembru 2013 li jistabbilixxi r-regoli għal parteċipazzjoni u disseminazzjoni f’“Orizzont 2020 — il-Programm Qafas għar-Riċerka u l-Innovazzjoni (2014-2020)” u li jħassar ir-Regolament (KE) Nru 1906/2006 (ĠU L 347, 20.12.2013, p. 81-103).

l-aħħar aġġornament 03.08.2016