Lejn Żona Ewropea tar-Riċerka vibranti

Il-Komunikazzjoni dwar iż-Żona Ewropea tar-Riċerka (ŻER) ta’ Settembru 2014 hija t-Tieni Rapport ta’ Progress dwar iż-ŻER. Hija tenfasizza l-progress tajjeb li sar mis-sħubija taż-ŻER - il-pajjiżi tal-UE, l-organizzazzjonijiet tar-riċerka u l-Kummissjoni Ewropea - fit-twaqqif tas-suq uniku għar-riċerka. Hija tinnota wkoll l-isfidi li għandna quddiemna qabel tkun tista’ titlesta ż-ŻER.

ATT

Komunikazzjoni mill-Kummissjoni lill-Kunsill u lill-Parlament Ewropew: Iż-Żona Ewropea tar-Riċerka - Rapport ta’ progress tal-2014 (COM(2014) 575 final tal-15.9.2014).

SOMMARJU

X’TAGĦMEL IL-KOMUNIKAZZJONI?

Il-konklużjoni ewlenija tagħha hija li l-kundizzjonijiet għall-kisba taż-ŻER, fejn ir-riċerkaturi u l-għarfien xjentifiku jistgħu jiċċirkolaw liberament, huma fis-seħħ fil-livell Ewropew. Madankollu, it-tlestija taż-ŻER hija proċess gradwali, għalhekk, jeħtieġ li issa jsiru riformi, primarjament fil-livell tal-pajjiżi, sabiex iż-ŻER tibda titħaddem.

Ir-rapport jikkonferma li issa huma stabbiliti sewwa l-kundizzjonijiet li ġejjin għat-tlestija taż-ŻER, imħabbra fil- Komunikazzjoni dwar iż-ŻER tal-2012:

il-pajjiżi tal-UE qegħdin jadottaw dejjem aktar miżuri li jappoġġjaw iż-ŻER u jirriflettuhom fil-programmi ta’ riforma nazzjonali tagħhom;
l-UE inkludiet iż-ŻER fis-Semestru Ewropew (il-koordinazzjoni tal-politika ekonomika annwali). Hija tipprovdi wkoll finanzjament sostanzjali għall-miżuri taż-ŻER, eż. il-promozzjoni ta’ reklutaġġ miftuħ, aċċess miftuħ għall-pubblikazzjonijiet u għad-dejta, kif ukoll l-ugwaljanza bejn is-sessi permezz ta’ Orizzont 2020;
l-organizzazzjonijiet tar-riċerka, bħall-finanzjaturi tar-riċerka u l-istituzzjonijiet li jagħmlu r-riċerka, urew appoġġ qawwi għall-aġenda taż-ŻER;
ġie stabbilit Mekkaniżmu ta’ Monitoraġġ taż-ŻER li qiegħed iwassal dejta dejjem aktar b’saħħitha għall-evalwazzjoni tal-prestazzjoni fil-livelli nazzjonali u istituzzjonali.

Nuqqasijiet fir-riċerka li jridu jiġu indirizzati

Għalkemm kważi l-pajjiżi kollha tal-UE adottaw strateġiji ta’ riċerka nazzjonali, xorta waħda għad fadal differenzi kbar fil-mod ta’ kif jiġu allokati l-fondi għar-riċerka. Hemm ukoll nuqqas ta’ standards maqbula madwar l-Ewropa għat-twettiq ta’ reviżjoni bejn il-pari internazzjonali.
Hemm bżonn ta’ aktar taħriġ għall-kandidati dottorali tal-UE, sabiex ikollhom il-ħiliet xierqa biex jaħdmu barra l-akkademja.
Filwaqt li aktar pajjiżi tal-UE qegħdin jipprattikaw prattiki ta’ reklutaġġ miftuħ għall-pożizzjonijiet f’istituzzjonijiet pubbliċi tar-riċerka, l-użu ta’ prattiki ta’ reklutaġġ miftuħ huwa irregolari fost il-pajjiżi, l-istituti tar-riċerka u l-gradi.
Aktar minn nofs il-pajjiżi tal-UE għandhom inizjattivi li jappoġġjaw l-ugwaljanza bejn is-sessi fir-riċerka, iżda l-pass ta’ bidla reali huwa kajman wisq.
Il-pajjiżi tal-UE qed jirnexxielhom dejjem aktar jiżguraw aċċess miftuħ għar-riżultati tar-riċerka (pubblikazzjonijiet u dejta) u jiżviluppaw strateġiji nazzjonali ta’ trasferiment tal-għarfien, iżda jeħtieġ li jagħmlu aktar f’dawn iż-żewġ oqsma.

Ir-rapport ta’ progress jinnota li l-pajjiżi tal-UE għandhom jiżviluppaw Pjan Direzzjonali taż-ŻER sa nofs l-2015. Dan għandu jirriżulta f’inizjattivi li jimmiraw għall-ħtiġijiet speċifiċi tal-pajjiżi.

L-Isfidi fil-Ġejjieni

Sabiex timmassimizza l-potenzjal tas-sistemi ta’ riċerka miftuħa tal-Ewropa u trawwem l-innovazzjoni, iż-ŻER għandha tħaddan prijoritajiet politiċi u żviluppi fir-riċerka ġodda u toffri soluzzjonijiet sostenibbli għall-isfidi li qiegħda tiffaċċja s-soċjetà. Id-domanda dejjem tikber għall-integrità u l-kontabbiltà tar-riċerka, kif ukoll il-modi ġodda ta’ kif titwettaq u tiġi kondiviża r-riċerka (jiġifieri xjenza miftuħa), ifissru li l-partijiet interessati ġodda ser ikunu fundamentali għas-suċċess tagħha.

l-aħħar aġġornament 13.05.2015