Aċċess għal u preservazzjoni ta' informazzjoni xjentifika

Proposti sabiex jissaħħaħ l-aċċess għal u l-preservazzjoni ta' informazzjoni xjentifka għandhom l-għan li jagħtu liċ-ċittadini aċċess aktar veloċi u aħjar għall-benefiċċji ta' skoperti xjentifiċi.

ATT

Rakkomandazzjoni tal-Kummissjoni tas-17 ta' Lulju 2012 dwar l-aċċess għall-informazzjoni xjentifika u l-konservazzjoni tagħha (2012/417/UE).

SOMMARJU

F'Lulju 2012, il-Kummissjoni Ewropea pproponiet modi għall-pajjiżi tal-UE sabiex itejbu l-aċċess għal informazzjoni xjentifika prodotta fl-UE. Aċċess usa' u aktar veloċi għal dokumenti xjentifiċi u dejta xjentifika jagħmilha aktar faċli għar-riċerkaturi u għan-negozji sabiex jibnu fuq is-sejbiet ta' riċerka ffinanzjata pubblikament. L-idea hawnhekk hija li dan għandu jsaħħaħ il-kapaċità tal-innovazzjoni Ewropa u jagħti liċ-ċittadini aċċess aktar veloċi għall-benefiċċji tal-iskoperti xjentifiċi.

Politiki b'aċċess miftuħ għandhom l-għan li jipprovdu lill-qarrejja b'aċċess għal pubblikazzjonijiet xjentifiċi evalwati bejn il-pari u għal dejta ta' riċerka bla ħlas minn kmieni kemm jista' jkun fil-proċess ta' disseminazzjoni u jippermettu l-użu u l-użu mill-ġdid tar-riżultati tar-riċerka xjentifika.

Aċċess miftuħ għal pubblikazzjonijiet

Il-Kummissjoni tirrakkomanda li l-Istati Membri tal-UE jiddefinixxu politiki ċari sabiex jiżguraw id-disseminazzjoni ta' u aċċess miftuħ għal pubblikazzjonijiet xjentifiċi li jirriżultaw minn riċerka ffinanzjata pubblikament.

Miri ta' dawn il-politiki jinkludu:

• aċċess miftuħ għal pubblikazzjonijiet li jirriżulta minn riċerka ffinanzjata pubblikament kemm jista' jkun malajr, preferibbilment minnufih u fi kwalunwke każ mhux aktar tard minn 6 xhur wara d-data tal-pubblikazzjoni (u 12-il xahar għal xjenzi soċjali u umanitajiet);
• sistemi ta' liċenzjar li jikkontribwixxu għal aċċess miftuħ għal pubblikazzjonijiet xjentifiċi li jirriżultaw minn riċerka ffinanzjata pubblikament;
• sistema ta' karriera akkademika li tappoġġa u tippremja lil riċerkaturi li jipparteċipaw f'ambjent ta' kondiviżjoni tar-riżultati tar-riċerka;
• aktar trasparenza, b'mod partikolari billi l-pubbliku jiġi infurmat dwar ftehimiet bejn istituzzjonijiet pubbliċi jew gruppi ta' istituzzjonijiet pubbliċi u pubblikaturi għall-għoti ta' informazzjoni xjentifika;
• intrapriżi żgħar u ta' daqs medju u riċerkaturi mhux affiljati għandhom l-akbar aċċess u l-irħas aċċess possibbli għal pubblikazzjonijiet xjentifiċi tar-riżultati ta' riċerka li tirċievi finanzjament pubbliku.

Il-preservazzjoni u l-użu mill-ġdid ta' informazzjoni xjentifika

Il-Kummissjoni għandha wkoll varjetà ta' proposti relatati mal-preservazzjoni u l-użu mill-ġdid ta' informazzjoni xjentifika. Dawn jinkludu l-iżgurar tal-preservazzjoni għal żmien twil tar-riżultati ta' riċerki, l-iżgurar li jkun hemm fis-seħħ sistema effettiva ta' depożiti għal informazzjoni xjentifika elettronika u l-preservazzjoni tal-ħardwer u softwer meħtieġ għall-qari tal-informazzjoni fil-futur jew billi ssir migrazzjoni tal-informazzjoni għal ambjenti ġodda ta' softwer u ħardwer fuq bażi regolari.

E-infrastrutturi

Il-Kummissjoni ħarġet ukoll b'sett ta' rakkomandazzjonijiet għal aktar żvilupp ta' e-infrastrutturi sabiex tiffaċilita l-fluss ta' informazzjoni xjentifika. Waħda minn dawn hija l-appoġġ għall-iżvilupp u t-taħriġ ta' koorti ġodda ta' esperti tax-xjenza komputazzjonali intensiva mil-lat ta' dejta, inkluż speċjalisti tad-dejta, teknixins u maniġers tad-dejta.

Il-Kummissjoni tissuġġerixxi wkoll li l-Istati Membri tal-UE jaħtru punt nazzjonali ta' referenza sabiex:

• jikkoordina l-miżuri f'din ir-rakkomandazzjoni;
• jaġixxi bħala interlokutur mal-Kummissjoni fuq mistoqsijiet relatati mal-aċċess għal u l-preservazzjoni ta' informazzjoni xjentifika;
• jirrapporta fuq il-follow-up għal din ir-rakkomandazzjoni.

DOKUMENTI RELATATI

Dokument ta' ħidma tal-persunal tal-Kummissjoni: Sommarju eżekuttiv tal-valutazzjoni tal-impatt li jakkompanja d-dokument Rakkomandazzjoni dwar l-aċċess għal u preservazzjoni ta' informazzjoni xjentifika (SWD(2012)221 finali tas-17.7.2012).

Dokument ta' ħidma tal-persunal tal-Kummissjoni: Valutazzjoni tal-impatt li takkompanja d-dokument. Rakkomandazzjoni tal-Kummissjoni dwar l-aċċess għal u l-preservazzjoni ta' informazzjoni xjentifika fl-era diġitali (SWD(2012)222 tas-17.7.2012).

l-aħħar aġġornament 17.03.2014