Għajnuna mill-Istat: Linji gwida tal-UE għal għajnuna reġjonali għall-2014 sal-2020

Linji gwida tal-UE dwar kif l-Istati Membri tal-UE jistgħu jagħtu għajnuna ta' investiment lil kumpaniji sabiex jappoġġaw l-iżvilupp ta' reġjuni żvantaġġati fl-Ewropa bejn l-2014 u l-2020 jidħlu fis-seħħ f'Lulju 2014.

ATT

Linji Gwida dwar l-għajnuna reġjonali mill-Istat għall-2014 - 2020 (Ġurnal Uffiċjali C 209 tat-23.7.2013).

SOMMARJU

Il-Kummissjoni Ewropea pproduċiet linji gwida tal-UE dwar kif l-Istati Membri tal-UE jistgħu jagħtu għajnuna ta' investiment lil kumpaniji sabiex jappoġġaw l-iżvilupp ta' reġjuni żvantaġġati fl-Ewropa bejn l-2014 u l-2020.

L-għan tal-linji gwida riveduti huwa li jħeġġu t-tkabbir ekonomiku billi jiġu promossi investimenti fi proġetti li jġibu valur miżjud reali għall-iżvilupp reġjonali, b'mod speċjali fir-reġjuni l-aktar żvantaġġati tal-Ewropa.

B'mod aktar speċifiku, il-linji gwida dwar l-għajnuna reġjonali jistabbilixxu r-regoli skont liema l-Istati Membri tal-UE jistgħu jagħtu għajnuna statali lil kumpaniji li jappoġġaw l-investimenti f'faċilitajiet ta' produzzjoni ġodda fir-reġjuni inqas vantaġġati tal-Ewropa jew li jestendu jew li jimmodernizzaw faċilitajiet eżistenti.

Il-linji gwida fihom ukoll regoli li fuq il-bażi tagħhom, l-Istati Membri tal-UE jistgħu jiddisinjaw mapep ta' għajnuna reġjonali sabiex jidentifikaw f'liema oqsma ġeografiċi l-kumpaniji jistgħu jirċievu għajnuna statali reġjonali u f'liema livell.

Karatteristiċi ewlenin tal-linji gwida l-ġodda jinkludu:

• Is-sehem ġenerali ta' reġjuni fejn l-għajnuna reġjonali tista' tingħata sejjer jiżdied għal 47 % tal-popolazzjoni tal-UE. Fil-preżent, madwar wieħed minn kull erba' Ewropej jgħix f'reġjuni inqas żviluppati (definiti bħala reġjuni b' Prodott Domestiku Gross (PDG) taħt il-75% tal-medja tal-UE). Madwar wieħed minn kull tliet Ewropej għexu f'reġjuni inqas żviluppati meta ġew adottati l-linji gwida 2007-2013. Minkejja dan it-tnaqqis fid-disparitajiet reġjonali, il-Kummissjoni qieset l-effetti tal-kriżi ekonomika u għaldaqstant żiedet il-kopertura tal-popolazzjoni.
• Il-linji gwida jadottaw approċċ aktar strett fuq l-għajnuna għall-investimenti magħmulin minn intrapriżi kbar fiż-żoni megħjunin aktar żviluppati. Għajnuna lil intrapriżi kbar f'dawn iż-żoni sejra tkun permessa biss għal investimenti li jġibu attività ekonomika ġdida, għal investimenti inizjali għad-diversifikazzjoni ta' stabbilimenti eżistenti fi prodotti ġodda jew għal innovazzjoni ta' proċess ġdid, minħabba li huwa aktar probabbli li dawn l-investimenti jitwettqu grazzi għas-sussidju. Fl-ifqar reġjuni (reġjuni taħt il-75% tal-PDG medju tal-UE), il-linji gwida jkomplu jippermettu l-għajnuna għal tipi ta' investimenti oħrajn minn kumpaniji kbar ukoll.
• Sabiex iżidu t-trasparenza u l-kontabilità, l-Istati Membri jkollhom jippubblikaw fuq l-internet id-dejta dwar kemm għajnuna reġjonali jagħtu u lil min.

L-aħħar aġġornament: 27.02.2014