Istitut tal-UE għall-Istudji tas-Sigurtà

L-Istitut għall-Istudji tas-Sigurtà tal-Unjoni Ewropea jipprovdi riċerka u analiżi dwar kwistjonijiet internazzjonali sabiex jgħinu lill-UE tiżviluppa l-politika barranija u tas-sigurtà tagħha.

ATT

Deċiżjoni tal-Kunsill 2014/75/PESK tal-10 ta' Frar 2014 dwar l-Istitut tal-Unjoni Ewropea għall-Istudji fuq is-Sigurtà.

SOMMARJU

Permezz ta’ din id-deċiżjoni tal-Kunsill, l-Unjoni Ewropea (UE) iddeċidiet li tkompli tibbaża fuq il-kompetenza tal-Istitut għall-Istudji tas-Sigurtà tal-Unjoni Ewropea (EUISS) sabiex tipprovdi riċerka u analiżi dwar kwistjonijiet internazzjonali għall-Politika Barranija u tas-Sigurtà Komuni tal-UE (CFSP). L-EUISS kien l-ewwel stabbilit f’Jannar 2002. Huwa stabbilit f’Pariġi u għandu uffiċċju ta’ kollegament fi Brussell.

Permezz tar-riċerka u l-analiżi tiegħu, l-EUISS jikkontribwixxi għat-teħid ta’ deċiżjonijiet Ewropej fil-qasam tal-CFSP. B’mod partikolari, huwa jagħmel analiżi u jipprovdi forum għal dibattitu dwar l-istrateġija esterna tal-UE f’oqsma li jinkludu l-prevenzjoni ta’ kunflitti u l-ħolqien tal-paċi. L-attivitajiet tiegħu jinkludu organizzazzjoni ta’ avvenimenti għal netwerks u workshops, kif ukoll il-ġabra ta’ informazzjoni relevanti għall-uffiċjali u l-esperti tal-UE. Jagħmilha wkoll ta’ interface bejn l-istituzzjonijiet tal-UE u l-grupp ta’ esperti esterni, inklużi dawk li jaħdmu fil-qasam tas-sigurtà.

L-EUISS huwa immaniġġjat minn Bord u Direttur.

• Il-Bord: ir-responsabbilità prinċipali tal-Bord hija li jadotta l-programm ta’ ħidma annwali u fit-tul kif ukoll il-baġit xieraq tal-Istitut Sat-30 ta’ Novembru ta’ kull sena, il-Bord għandu japprova l-programm ta’ ħidma annwali tal-Istitut. Il-Bord huwa magħmul minn rappreżentant wieħed minn kull Stat Membru tal-UE u rappreżentant tal-Kummissjoni. Jiltaqa’ tal-inqas darbtejn fis-sena u huwa mmexxi mir-Rappreżentant Għoli tal-Unjoni għall-Affarijiet Barranin u l-Politika tas-Sigurtà. Id-Direttur Ġenerali tal-Personal Militari tal-UE jista’ jattendi l-laqgħat tal-Bord. Il-Bord jista’ jiddeċiedi li jistabbilixxi gruppi ta’ ħidma ad hoc jew kumitati permanenti sabiex jittrattaw suġġetti speċifiċi.
• Id-Direttur: id-Direttur huwa nnominat mill-Bord fuq il-bażi ta’ rakkomandazzjoni mir-Rappreżentant Għoli tal-Unjoni Ewropea għall-Affarijiet Barranin u l-Politika tas-Sigurtà għal terminu ta’ 3 snin b’possibilità ta’ estensjoni ta’ sentejn. Ir-responsabbiltajiet tad-Direttur jinkludu l-amministrazzjoni ta’ kuljum tal-Istitut, l-abbozzar tal-programm ta’ ħidma annwali u r-rapport annwali u l-preparazzjoni tal-ħidma tal-Bord.

L-aħħar aġġornament: 11.06.2014