Lejn trasferimenti tal-armi iktar responsabbli: l-UE u t-Trattat dwar il-Kummerċ tal-Armi

PUNTI EWLENIN

L-għan tat-Trattat dwar il-Kummerċ tal-Armi,, li ġie adottat fl-2013, huwa li jikkontribwixxi għal paċi, sigurtà u stabbiltà internazzjonali u reġjonali billi jirregola l-kummerċ internazzjonali f’armi konvenzjonali u jeqred il-kummerċ illeċitu tal-armi.

Jagħmel dan billi jistabbilixxi l-ogħla standards internazzjonali komuni possibbli għall-kummerċ internazzjonali tal-armi konvenzjonali.

It-trattat japplika għall-armi konvenzjonali kollha fil-kategoriji li ġejjin:

• tankijiet tal-gwerra;
• vetturi tal-ġlied armati;
• sistemi ta’ artillerija ta’ kalibru kbir;
• inġenju tal-ajru tal-ġlied;
• ħelikopters ta’ attakk;
• bastimenti tal-gwerra;
• missili u lanċjaturi tal-missili; u
• armi ħfief u ta’ kalibru żgħir.

It-Trattat jimmira li jikseb regolamentazzjoni iktar responsabbli tal-kummerċ tal-armi billi jeħtieġ:

• li l-pajjiżi tal-esportazzjoni jwettqu valutazzjoni tar-riskju bir-reqqa u komprensiva qabel jesportaw l-armi. Dan ikopri oqsma bħar-riskju tal-ksur tad-drittijiet tal-bniedem fil-pajjiż tad-destinazzjoni, ir-riskju ta’ devjazzjoni tal-armi esportati u l-impatt avvers possibbli fuq l-istabbiltà interna u reġjonali.
• li l-pajjiżi jirrappurtaw l-esportazzjonijiet u l-importazzjonijiet tal-armi fuq bażi annwali. Dan għandu jtejjeb it-trasparenza.

Dan it-Trattat għalhekk jista’ jipprevjeni milli l-armi jaqgħu f’idejn ħżiena, b’hekk titnaqqas is-sofferenza tal-bniedem u jikkontribwixxi b’mod tanġibbli għall-paċi, is-sigurtà u l-istabbiltà internazzjonali.

L-UE adottat programm ta’ appoġġ ta’ implimentazzjoni. Dan jipprovdi fondi biex jappoġġja l-isforzi tal-pajjiżi biex jimplimentaw it-Trattat billi jsaħħu s-sistemi ta’ kontroll tat-trasferiment tal-armi tagħhom.

Dan it-trattat daħal fis-seħħ fl-24 ta’ Diċembru 2014.