Fondi ta’ intraprenditorija soċjali Ewropej

PUNTI EWLENIN

• In-negozji soċjali jindirizzaw objettivi soċjali bħala l-għan tal-korporazzjoni tagħhom milli sempliċient jimmassimizzaw il-profitt. Dan huwa settur ta’ tkabbir, u jirrapreżenta 10 % tal-kumpaniji kollha tal-Unjoni Ewropea (UE) u jimpjega iktar minn 11-il mijun persuna. Filwaqt li ta’ spiss jirċievu appoġġ pubblilku, investimenti privati minn fondi li jinvestu f’intrapriżi soċjali huma essenzjali għas-suċċess tagħhom.
• Dawn il-fondi jiffaċċjaw żewġ problemi:
  • jista’ jkun jiswa l-flus u diffiċli li jiġu stabbiliti tali fondi u li jattiraw investituri, b’mod partikolari investiment transfruntiera;
  • mhuwiex dejjem faċli għal investituri li jidentifikaw tali fondi jew li jqabblu l-vantaġġi ta’ tipi differenti.
• Biex tneħħi dawn l-ostakoli, l-UE adottat leġiżlazzjoni biex toħloq tikketta għall-EuSEFs, biex tagħmilha iktar faċli għall-investituri li jkunu jafu d-destinazzjoni tal-investimenti tagħhom.
• It-tikketta:
  • għandha tagħmilha iktar faċli għall-investituri biex jidentifikaw u jagħżlu l-EuSEFs;
  • tgħin negozji soċjali permezz ta’ aċċess aktar faċli għall-finanzjament;
  • tippermetti maniġers ta’ fondi ta’ investiment sabiex jiksbu finanzjament b’inqas spiża u kumplessità.
• Fondi li jippreżentaw ruħhom b’din it-tikketta jridu jidderieġu mill-anqas 70 % tal-investimenti tagħhom lejn negozji soċjali.
• Barra minn hekk, għandhom jipprovdu informazzjoni ewlenija lill-investituri b’mod standarizzat. Dan it-tagħrif ikopri oqsma bħal:
  • l-objettivi soċjali tal-fond;
  • in-negozji soċjali li jinvesti fihom;
  • kif tevalwa jekk dawn in-negozji jilħqux l-għanijiet soċjali tagħhom.
• Ladarba fond jipprovdi l-informazzjoni meħtieġa u jissodisfa l-kundizzjonijiet importanti dwar l-organizzazzjoni u t-tħaddim tiegħu, huwa jista’ jiġbor investimenti minn madwar l-UE mingħajr ma jkollu spejjeż kbar.
• Flimkien mar-regola tas-70 %, maniġer ta’ fond għandu juri tmexxija tajba tan-negozju u sistemi u kontrolli effettivi, u jevita kwalunkwe kunflitt ta’ interess. Dawn il-fondi huma sorveljati mill-awtoritajiet nazzjonali fil-pajjiż fejn huma bbażati u t-tikketta tista’ tiġi rtirata jekk ma jissodisfawx xi waħda mill-kundizzjonijiet essenzjali.
• Fl-2014, il-Kummissjoni Ewropea adottat att ta’ implimentazzjoni (ir-Regolament ta’ Implimentazzjoni (UE) Nru 594/2014) li jindirizza n-notifika ta’ avvenimenti relatati mal-passaport tal-maniġers li jikkwalifikaw għall-fondi tal-intraprenditorija soċjali u aspetti li jikkonċeraw it-tneħħija ta’ maniġer ta’ EuSEF mir-reġistru.
• Bħala waħda mill-miżuri taħt l-inizzjattiva tal-Unjoni tas-Swieq Kapitali, ir-regolament tal-EuSEF ġie emendat mir-Regolament (UE) 2017/1991 maħsub biex jiftaħ is-suq għal fondi ta’ intraprenditorija soċjali eliġibbli biex iżid l-effetti tal-iskala, inaqqas l-ispejjeż tat-tranżazzjonijiet u tal-operat, iżid il-kompetizzjoni u jsaħħaħ l-għażla tal-investituri. Huwa jestendi l-użu tad-denominazzjoni tal-“EuSEF” għal maniġers ta’ impriżi ta’ investiment kollettiv¹ awtorizzati skont id-Direttiva 2011/61/UE — ara s-sommarju.
• Ir-Regolament Delegat (UE) 2019/819 jissupplimenta r-Regolament (UE) Nru 346/2013 li jistabbilixxi r-regoli rigward il-kunflitti ta’ interess dwar:
  • it-tipi ta’ kunflitti ta’ interess;
  • il-ħtieġa li tiġi stabbilita politika bil-miktub ta’ kunflitt ta’ interess u l-proċeduri u l-miżuri li din il-politika għandha tinkludi bħala bażi minima;
  • il-ġestjoni ta’ kunflitti ta’ interess;
  • strateġiji biex jiġu eżerċitati d-drittijiet tal-vot ħalli jiġu evitati kunflitti ta’ interess;
  • id-divulgazzjoni ta’ kunflitti ta’ interess.
• Huwa jagħti wkoll id-dettalji dwar proċeduri li jkejlu l-impatt pożittiv soċjali u l-ħtiġijiet rigward informazzjoni prekontrattwali mogħtija lill-investituri fil-qasam tal-EuSEFs.