Indirizzar ta’ problemi tal-istituzzjonijiet finanzjarji fl-inkwiet

PUNTI EWLENIN

Banek f’diffikultà — prevenzjoni

• Kull bank jeħtieġ li jħejji pjan ta’ rkupru u jissottomettih lill-awtorità nazzjonali kompetenti.
• L-awtorità ta’ riżoluzzjoni nazzjonali jeħtieġ ukoll li tfassal pjan ta’ riżoluzzjoni fil-każ li l-irkupru ma jkunx effettiv u jkun hemm bżonn ta’ ristrutturar (riżoluzzjoni).
• Iż-żewġ pjanijiet jistabbilixxu l-azzjoni li għandha tittieħed jekk bank ikollu diffikultajiet li jwasslu għall-falliment tiegħu.

Banek f’sitwazzjoni finanzjarja diffiċli — intervent bikri

Meta bank ikun f’sitwazzjoni finanzjarja diffiċli, l-awtorità nazzjonali kompetenti għandha s-setgħa li tintervjeni, billi pereżempju taħtar amministratur temporanju tal-bank.

Banek li qed ifallu — ristrutturar (riżoluzzjoni)

• Jekk l-ispiral ’l isfel tal-bank ikompli, l-awtorità nazzjonali ta’ risoluzzjoni għandha varjetà ta’ setgħat ta’ ristrutturar sabiex timminimizza l-ispiża tal-kontribwenti minħabba l-falliment tiegħu inkluż il-ħtieġa li s-settur privat iġarrab l-ispejjeż l-ewwel.
• Dan il-mekkaniżmu ta’ salvataġġ, li jimmarka bidla tar-rotta meta mqabbel mal-għodda pubblika ta’ salvataġġ, kellu jidħol fis-seħħ mhux aktar tard minn Jannar 2016. L-Istati Membri diġà setgħu jiddeċiedu li jinkorporaw l-għodda ta’ salvataġġ fis-sistemi legali tagħhom qabel dik id-data.
• Jekk bank jikkrolla, l-azzjonisti jkunu minn ta’ l-ewwel li jkopru l-ispejjeż tal-istrutturar. Imbagħad, il-kredituri jintalbu jikkontribwixxu, ma’ depożitaturi mhux garantiti (li għandhom depożiti ta’ aktar minn EUR 100 000) jidħlu l-aħħar. Id-Direttiva Emendatorja (UE) 2017/2399 armonizzat ir-regoli dwar il-ġerarkija tal-kredituri tal-bank permezz tal-ħolqien ta’ klassi ġdida ta’ dejn superjuri mhux bi preferenza li tikklassifika fl-insolvenza fuq strumenti ta’ fondi proprji u passivi subordinati, iżda taħt obbligi superjuri oħra. Din il-klassifikazzjoni statutorja tal-insolvenza ġdida għal dejn superjuri mhux bi preferenza għandha l-għan li ttejjeb l-applikazzjoni tal-għodda tas-salvataġġ fir-rigward tal-istrumenti ta’ dejn li huma eliġibbli għar-rekwiżit minimu għal fondi proprji u obbligi eliġibbli (MREL). Din ser tgħin ukoll fl-implimentazzjoni tal-istandard tal-Kapaċità Totali ta’ Assorbiment tat-Telf tal-UE għal istituzzjonijiet finanzjarji globali sistematikament importanti.
• L-azzjonisti u l-kredituri jridu jikkontribwixxu għat-telf tal-istituzzjoni li tkun qed tfalli. Huma jkopru t-telf sa mill-inqas 8 % tal-passivi totali (dejn jew obbligazzjonijiet) tal-bank li jkun għaddej minn pjan ta’ ristrutturar. Jekk ikun fadal xi telf x’jiġi kopert, jista’ jintervjeni l-fond tar-riżoluzzjoni (ara taħt). Setgħat oħrajn li għandhom l-awtoritajiet nazzjonali jinkludu l-possibilità li jbiegħu l-istituzzjoni li tkun għaddejja minn ristrutturar jew jamalgamawha ma’ oħra.
• Biex jiġi implimentat l-istandard tal-Kapaċità Totali tal-Assorbiment tat-Telf żviluppat mill-Bord ta’ Stabilità Finanzjarja f’Novembru 2015, id-Direttiva Emendatorja (UE) 2019/879 introduċiet regoli ġodda li jikkonċernaw il-kapaċità ta’ assorbiment tat-telf u ta’ rikapitalizzazzjoni ta’ istituzzjonijiet ta’ kreditu u ditti ta’ investiment.
• Id-Direttiva Emendatorja (UE) 2022/2556 tallinja r-regoli tad-direttiva, u diversi direttivi relatati oħra, mar-rekwiżiti dwar ir-riskju tal-ICT għall-entitajiet finanzjarji stabbiliti fir-reżiljenza operazzjonali diġitali tar-regolament tas-settur finanzjarju, ir-Regolament (UE) 2022/2554 (ara s-sommarju).

Fondi ta’ riżoluzzjoni nazzjonali biex jipprovdu appoġġ finanzjarju għall-pjanijiet ta’ ristrutturar tal-banek

Kull Stat Membru għandu jistabbilixxi fond ta’ riżoluzzjoni nazzjonali ffinanzjat bil-quddiem minn istituzzjonijiet ta’ kreditu u ditti tal-investiment stabbiliti fit-territorju tiegħu. Dan il-fond għandu jintuża biex jiffinanzja r-ristrutturar ta’ bank li qed ifalli.

Punt ta’ aċċess uniku Ewropew

Id-Direttiva Emendatorja (UE) 2023/2864iddaħħal artikolu fid-Direttiva 2014/59/UE li tirrekjedi li Stati Membri, mill-10 ta’ Jannar 2030, jassikuraw li meta jagħmlu pubblika kull informazzjoni regolata, l-entità rilevanti tissottometti dik l-informazzjoni fl-istess ħin lill-korp tal-ġbir. Huma jridu wkoll jinnotifikaw lill-Awtorità Ewropea tat-Titoli u s-Swieq għall-iskop li jagħmluha aċċessibbli fuq il-punt uniku t’aċċess Ewropew, stabbilit taħt ir-Regolament (UE) 2023/2859.

It-twaqqif ta’ MREL interna fuq bażi konsolidat

Id-Direttiva Emendatorja (UE) 2024/1174 tintroduċi regoli li jippermettu lill-awtoritajiet tar-riżoluzzjoni biex jissettjaw l-MREL interna fuq bażi konsolidat, suġġett għal ċerti kundizzjonijiet: Dan hu biex jimmitigaw il-possibbilità ta’ impatt sproporzjonat, detrimentali għal ċerti strutturi ta’ gruppi bankarji, jiġifieri dawk li joperaw taħt il-kumpanija holding omm u ċerti strutturi ta’ kumpaniji li joperaw — xenarju identifikat mill-Kummissjoni Ewropea. Fejn grupp bankarju jkollu l-permess mill-awtorità tar-riżoluzzjoni biex japplika dan it-trattament konsolidat, is-sussidjarji intermedji mhux ser ikunu obbligati jnaqqsu t-titoli individwali tagħhom tal-MREL interna.

Atti ta’ implimentazzjoni u atti delegati

Bejn l-2015 u l-2024, il-Kummissjoni Ewropea adottat serje ta’ atti ta’ implimentazzjoni u ta’ delega fil-kuntest tad-Direttiva 2014/59/UE. Dawn jinkludu:

• Ir-Regolament Delegat (UE) 2015/63 dwar:
  • il-kalkolu u l-aġġustament għall-profil ta’ riskju tal-istituzzjonijiet u l-kontribuzzjonijiet li għandhom jitħallsu mill-banek għall-fondi ta’ riżoluzzjoni, u
  • l-informazzjoni li l-banek għandhom jipprovdu sabiex tiġi kkalkulata l-kontribuzzjoni tagħhom għal fond ta’ riżoluzzjoni.
• Ir-Regolament Delegat (UE) 2016/778 dwar:
  • iċ-ċirkostanzi u l-kondizzjonijiet li skonthom il-kontribuzzjonijiet ta’ ħlas lura ta’ istituzzjoni għal fond ta’ riżoluzzjoni jistgħu jiġu posposti parzjalment jew kompletament,
  • il-kriterji użati biex jiddeterminaw liema mill-attivitajiet, servizzi u operazzjonijiet tal-istituzzjoni huma essenzjali għall-ekonomija, u
  • il-kriterji użati biex jiddeterminaw il-linji tan-negozju prinċipali u s-servizzi assoċjati;
• Ir-Regolament Delegat (UE) 2016/860 jispeċifika ulterjorment iċ-ċirkostanzi li fihom l-eskulżjoni mill-applikazzjoni tas-segħat tal-valwazzjoni negattiva jew tal-konverżjoni huma meħtieġa skont l-Artikolu 44(3) tad-Direttiva 2014/59/UE;
• Ir-Regolament (UE) 2016/911 rigward il-forma u l-kontenut tad-deskrizzjoni ta’ ftehimiet ta’ appoġġ finanzjarju tal-grupp;
• Ir-Regolament ta’ Implimentazzjoni (UE) 2016/962 dwar formati, mudelli u definizzjonijiet uniformi biex jużawhom l-awtoritajiet kompetenti meta jidentifikaw u jittrażmettu l-informazzjoni mingħand l-awtoritajiet kompetenti u l-awtoritajiet ta’ riżoluzzjoni lill-Awtorità Bankarja Ewropea;
• Ir-Regolament Delegat (UE) 2016/1075 dwar, fost affarijiet oħra, standards li jispeċifikaw il-kontenut tal-pjanijiet ta’ rkupru, il-pjanijiet ta’ riżoluzzjoni u l-pjanijiet ta’ riżoluzzjoni tal-grupp;
• Ir-Regolament Delegat (UE) 2016/1400 dwar l-elementi minimi ta’ pjan ta’ riorganizzazzjoni tan-negozju u l-kontenut minimu tar-rapporti dwar l-implimentazzjoni tiegħu;
• Ir-Regolament Delegat (UE) 2016/1401 dwar standards għal metodoloġiji u prinċipji dwar il-valwazzjoni tal-obbligazzjonijiet li jirriżultaw minn derivattivi;
• Ir-Regolament Delegat (UE) 2016/1450 dwar il-kriterji li għandhom x’jaqsmu mal-metodoloġija għall-iffissar tal-MREL
• Ir-Regolament Delegat (UE) 2016/1712 dwar standards għal informazzjoni dwar kuntratti finanzjarji;
• Ir-Regolament Delegat (UE) 2017/867 dwar il-klassijiet ta’ arranġamenti li għandhom jiġu protetti fi trasferiment parzjali ta’ proprjetà.
• Ir-Regolament Delegat (UE) 2018/344 dwar l-istandards tekniċi regolatorji li jispeċifikaw il-kriterji li għandhom x’jaqsmu mal-metodoloġiji għall-valwazzjoni tad-differenza fit-trattament fir-riżoluzzjoni;
• Ir-Regolament Delegat (UE) 2018/345 dwar l-istandards tekniċi regolatorji li jispeċifikaw il-kriterji li għandhom x’jaqsmu ma’ metodoloġiji għall-valwazzjoni tal-valur tal-assi u l-obbligazzjonijiet tal-istituzzjonijiet jew l-entitajiet;
• Ir-Regolament Delegat (UE) 2019/348 dwar standards tekniċi regolatorji li jispeċifikaw il-kriterji għall-valutazzjoni tal-impatt ta’ falliment ta’ istituzzjoni fuq is-swieq finanzjarji, fuq istituzzjonijiet oħra u fuq il-kundizzjonijiet ta’ finanzjament;
• Ir-Regolament ta’ Implimentazzjoni (UE) 2021/622 dwar l-implimentazzjoni ta’ standards tekniċi fir-rigward ta’ mudelli, struzzjonijiet u metodoloġija għar-rapportar dwar l-MREL lill-Awtorità Bankarja Ewropea;
• Ir-Regolament Delegat (UE) 2021/1118 dwar standards tekniċi regolatorji li jispeċifikaw il-metodoloġija li għandha tintuża mill-awtoritajiet ta’ riżoluzzjoni biex jiġu stmati r-rekwiżit imsemmi fid-Direttiva 2013/36/UE u r-rekwiżit tal-bafer kombinat għall-entitajiet ta’ riżoluzzjoni fil-livell konsolidat tal-grupp ta’ riżoluzzjoni fejn il-grupp ta’ riżoluzzjoni mhuwiex soġġett għal dawk ir-rekwiżiti skont id-direttiva;
• Ir-Regolament Delegat (UE) 2021/1340 dwar standards tekniċi regolatorji li jiddeterminaw il-kontenut tal-klawżoli kuntrattwali dwar ir-rikonoxximent tas-setgħat ta’ sospensjoni tar-riżoluzzjoni.
• Ir-Regolament Delegat (UE) 2021/1527 fir-rigward tal-istandards tekniċi regolatorji dwar ir-rikonoxximent kuntrattwali ta’ setgħat ta’ tnaqqis fil-valur u ta’ konverżjoni.
• Ir-Regolament Delegat (UE) 2023/662 li jemenda r-Regolament Delegat (UE) 2015/63, fir-rigward tal-metodoloġija għall-kalkolu ta’ obbligazzjonijiet li jirriżultaw minn derivattivi:
• Ir-Regolament ta’ Implimentazzjoni (UE) 2024/1618 li jemenda r-Regolament ta’ Implimentazzjoni (UE) 2021/763 fir-rigward tar-rapportar superviżur u żvelar pubbliku tar-rekwiżit minimu għall-fondi propji u obbligazzjonijiet eliġibbli; u
• Ir-Regolament Delegat (UE) 2024/895 li jemenda r-Regolament Delegat (UE) 2015/63, fir-rigward tal-metodoloġija għall-kalkolu ta’ obbligazzjonijiet eliġibbli u r-reġim eliġibbli.