Pjan ta' Azzjoni tal-UE dwar id-Droga (2013-16)

Il-Pjan ta' Azzjoni jistabbilixxi 5 prijoritajiet fil-ġlieda kontra d-drogi: tnaqqis tad-domanda, tnaqqis tal-provvista, koordinazzjoni mal-UE kollha u fuq livell nazzjonali, kooperazzjoni internazzjonali, u fehim aħjar tal-fenomenu tad-droga.

ATT

Pjan ta' Azzjoni tal-UE dwar id-Droga għall-2013-2016

SOMMARJU

Il-Pjan ta' Azzjoni tal-UE dwar id-Droga 2013-2016 huwa l-ewwel wieħed minn 2 pjanijiet iddisinjati sabiex jimplimentaw l-Istrateġija tal-UE dwar id-Droga għall-2013-20. L-Istrateġija timmira li tnaqqas kemm il-provvista kif ukoll id-domanda u li tindirizza l-ħsara soċjali u tas-saħħa kkawżata mill-użu tad-droga u min-negozju tad-droga.

Abbażi tal-qafas stabbilt fl-Istrateġija tal-UE dwar id-Droga, il-Pjan ta' Azzjoni jkopri 5 oqsma ta' prijorità :

Tnaqqis fid-domanda

Mira: tnaqqis miżurabbli fl-użu ta' drogi ġenerali u ta' drogi problematiċi, ħsara soċjali u għas-saħħa relatata mad-dipendenza u mad-droga, dewmien tal-perjodu meta persuna tibda tagħmel użu mid-droga.

• Prevenzjoni tal-użu tad-droga/dewmien tal-perjodu meta persuna tibda tagħmel użu mid-droga
• Titjib tal-kura u r-riabilitazzjoni mid-droga sabiex jitnaqqas l-użu ta' drogi illeċiti, dipendenza fuq id-droga u l-ħsara kkawżata mid-drogi, kif ukoll appoġġ għall-irkupru u l-integrazzjoni soċjali jew ir-reintegrazzjoni ta' dawk li jagħmlu użu mid-droga
• Jiġi żgurat li jiġu kondiviżi l-aqwa prattiċi u jsir qbil fuq standards minimi ta' kwalità madwar l-UE kollha għal miżuri ta' tnaqqis fid-domanda.

Provvista mnaqqsa

Mira: tnaqqis miżurabbli fid-disponibilità u fil-provvista ta' drogi illeċiti fl-UE.

• Użu għall-aqwa effett tal-intelliġenza u ta' strumenti ta' kondiviżjoni tal-informazzjoni sabiex jitjieb l-infurzar tal-liġi dwar id-droga madwar l-UE
• Żieda fil-kooperazzjoni bejn l-awtoritajiet tal-ġustizzja tal-pajjiżi tal-UE u t-tisħiħ tal-liġijiet tal-UE fir-rigward ta', pereżempju, drogi psikoattivi ġodda u prekursuri
• Tfassil ta' strateġija sabiex jiġi indirizzat l-irwol ta' teknoloġiji tal-komunikazzjoni ġodda u l-hosting ta' siti elettroniċi assoċjati fir-irgward tal-provvista tad-droga.

Koordinazzjoni mtejba

Mira: koordinazzjoni aktar effettiva tal-politiki dwar id-drogi li jinvolvu lill-gverniijiet nazzjonali, lill-istituzzjonijiet Ewropej, korpi tal-UE oħrajn (eż. Europol u Ċentru Ewropew għall-Monitoraġġ tad-Droga u d-Dipendenza fuq id-Droga), gruppi taċ-ċittadini, organizzazzjonijiet internazzjonali u pajjiżi mhux tal-UE. Ta' importanza partikolari huma l-azzjonijiet li jiżguraw li

• il-politiki tal-UE dwar id-droga interni u esterni huma konsistenti
• it-tfassil ta' politika fuq livell nazzjonali dwar id-droga jieħu approċċ bilanċjat u integrat u jinvolvi liċ-ċittadini (eż. gruppi ta' żgħażagħ).

Kooperazzjoni internazzjonali msaħħa

Mira: djalogu u kooperazzjoni bejn l-UE, pajjiżi mhux tal-UE u organizzazzjonijiet internazzjonali.

• L-Istrateġija tal-UE dwar id-Droga tiġi integrata fil-politika barranija ġenerali tagħha
• Tgħin tifforma l-aġenda tal-politika tan-NU dwar id-droga u ssaħħaħ il-koordinazzjoni tal-UE mal-korpi internazzjonali li jaħdmu fil-qasam
• Tgħin lil pajjiżi li qed jistennew biex jissieħbu fl-UE, jew kwalunkwe kandidat prospettiv, sabiex jaddatta għal-liġijiet tal-UE fil-qasam tad-droga.

Fehim imtejjeb tal-fenomenu tad-droga

Mira: evidenza robusta u komprensiva fuq liema għandhom ikunu bbażati l-politiki u l-azzjonijiet dwar id-droga.

• Investiment fir-riċerka, ġbir ta' dejta, monitoraġġ, evalwazzjoni u l-iskambju ta' informazzjoni dwar id-droga
• Żamma u żvilupp tal-kapaċità fi ħdan u tul in-netwerk ta' organizzazzjonijiet li jipprovdu informazzjoni dwar u li jagħmlu riċerka dwar id-droga fl-UE, kif ukoll dawk li jimmonitorjaw u li jevalwaw żviluppi f'dan il-qasam.
• Tittejjeb id-disseminazzjoni tar-riżultati tar-riċerka u evalwazzjoni.

Il-Pjan ta' Azzjoni għall-2017-2020 sejjer jitfassal sal-2016, wara reviżjoni ta' nofs it-terminu tal-Istrateġija tal-UE dwar id-Droga.

DOKUMENTI LI SSIR REFERENZA GĦALIHOM

Strateġija tal-UE dwar id-Droga (2013-20)

l-aħħar aġġornament 17.03.2014