Proċedura ta' konsenja bejn il-pajjiżi tal-UE u l-Iżlanda u n-Norveġja
SOMMARJU TAD-DOKUMENT:
Deċiżjoni tal-Kunsill 2014/835/UE — ftehim dwar il-proċedura ta' konsenja bejn il-pajjiżi tal-UE u l-Islanda u n-Norveġja
X’TAGĦMEL DIN ID-DEĊIŻJONI?
-
Hija tapprova l-ftehim dwar il-proċedura ta' konsenja* bejn il-pajjiżi tal-UE u l-Islanda u n-Norveġja.
PUNTI EWLENIN
-
Il-ftehim għandu l-għan li jtejjeb il-kooperazzjoni ġudizzjarja f'materji kriminali bejn il-pajjiżi tal-UE u l-Islanda u n-Norveġja.
-
B’mod partikolari hija tistabbilixxi sistema ta’ konsenja biex tħaffef it-transferiment tas-suspettati u ta’ persuni li jkunutaħtkustodja u biex tiżgura kontrolli suffiċjenti fuq l-eżekuzzjoni tal-mandati ta' arrest.
Ambitu
-
Il-mandat ta’ arrest jista’ jinħareġ għal atti punibbli b’sentenza ta’ ħabs jew ordnijiet għal detenzjoni ta’ mill-inqas 12-il xahar jew, fejn tkun ingħatat sentenza jew ġiet magħmula ordni ta’ detenzjoni, għal sentenza ta’ mill-inqas erba’ xhur.
-
Għal reati punibbli b’sentenza ta' mill-inqas tliet snin ħabs, il-partijiet jistgħu jagħmlu dikjarazzjoni sabiex ma jkollhomx bżonn il-kundizzjoni ta’ kriminalità doppja*. Dawn jinkludu:
-
il-parteċipazzjoni f’organizzazzjoni kriminali,
-
it-terroriżmu,
-
it-traffikar tal-bnedmin,
-
il-pornografija tat-tfal,
-
it-traffikar illeċitu tal-organi umani,
-
in-narkotiċi,
Il-lista tar-reati hija l-istess bħal dik użata mill-pajjiżi tal-UE għall-Mandat ta' Arrest Ewropew.
Raġunijiet għal noneżekuzzjoni tal-mandat ta' arrest
L-awtoritajiet ġudizzjarji sejrin jirrifjutaw li jesegwixxu mandat ta' arrest jekk:
-
ir-reat li fuqu huwa bbażat huwa kopert minn amnestija;
-
il-persuna diġà ġiet iġġudikata għall-istess reat u s-sentenza ġiet skontata jew bħalissa qed tiġi skontata;
-
il-persuna ma tistax tinżamm kriminalment responsabbli minħabba l-età tagħha.
Min-naħa l-oħra, il-pajjiżi jistgħu jirrifjutaw li jesegwixxu mandat ta’ arrest f’għadd ta' każijiet, inkluż jekk:
-
l-atti li fuqhom il-mandat huwa bbażat ma jikkostitwixxux reat fil-pajjiż li fih ikun qed jinżamm is-suspettat (“stat ta' eżekuzzjoni”), ħlief fir-rigward tat-taxxi, id-dazji, id-dwana u l-iskambju;
-
il-persuna qed tiġi akkużata fl-istat ta’ eżekuzzjoni għall-istess atti;
-
l-istat għadda ġudizzju finali għall-istess atti, li ma jħallix proċeduri ulterjuri;
-
l-awtoritajiiet fl-istat ta’ eżekuzzjoni ddeċedew li ma jipproċessawx il-persuna jew waqqfu l-proċedimenti;
-
il-persuna rikjesta hija ċittadina jew residenta tal-istat ta’ eżekuzzjoni u l-istat bi ħsiebu jwettaq is-sentenza;
-
ir-reati twettqu barra mit-territorju tal-pajjiż li qed joħroġ il-mandat (“stat ta' eżekuzzjoni”) jew il-liġi tal-istat ta' eżekuzzjoni ma tippermettix il-prosekuzzjoni għal dawk ir-reati.
Mandat ta’ arrest
-
Il-mandat ta’ arrest fih id-dettalji tal-identità tal-persuna rikjesta, l-awtorità emittenti, is-sentenza u n-natura tar-reat.
-
Jiġi trasmess hekk kif il-persuna rikjesta tinstab, u mbagħad jiġi kkomunikat lis-Sistema ta’ Informazzjoni ta’ Schengen jew, jekk dan mhuwiex possibbli, lill-Interpol.
-
Jekk il-persuna tagħti l-kunsens għall-konsenja tagħha, id-deċiżjoni finali dwar l-esekuzzjoni tal-mandat ta’ arrest għandha tittieħed fi żmien 10 ijiem; jew inkella għandha tittieħed fi żmien 60 jum mill-arrest.
-
Jekk dan mhuwiex possibbli, l-awtoritajiet emittenti għandhom jiġu infurmati dwar ir-raġunijiet għad-dewmien u l-limitu taż-żmien jista’ jiġi estiż għal 30 jum.
Proċedura ta' konsenja
-
Meta l-persuna tiġi arrestata, hija għandha tiġi infurmata dwar il-mandat ta’ arrest u l-kontenut tiegħu, dwar il-possibilità li tagħti l-kunsens għall-konsenja lill-awtorità emittenti u għad-dritt li tkun assistita minn avukat u minn interpretu.
-
Is-seduta titwettaq skont il-liġi tal-istat ta’ eżekuzzjoni u b’kundizzjonijiet iffissati permezz ta’ ftehim komuni. Il-persuna tista’ tagħżel jekk tagħtix il-kunsens jew le għall-konsenja tagħha jekk din l-għażla tkun espressa volontarjament u f’għarfien sħiħ tal-konsegwenzi.
-
Il-persuna għandha tiġi konsenjata fi żmien 10 ijiem mid-deċiżjoni biex jiġi esegwit il-mandat jew, jekk dan ikun impossibli, fi żmien 10 ijiem mid-data tal-konsenja miftiehma bejn l-awtoritajiet. Jekk il-persuna tkun għadha taħt kustodja fi tmiem ta’ dak iż-żmien, hija għandha tiġi rilaxxata.
-
L-awtorità ta’ esekuzzjoni tissekwestra u tikkonsenja l-proprjetà li tista’ sservi ta’ evidenza jew li tkun inkisbet mill-persuna b’riżultat tar-reat.
Il-konsenja tal-persuna rikjesta
Il-pajjiżi li huma parti mill-ftehim għandhom jippermettu lill-persuna li tkun qed tiġi kkonsenjata sabiex tgħaddi mit-territorju tagħhom, diment li jkunu ingħataw informazzjoni dwar:
-
l-identità tal-persuna,
-
l-eżistenza ta’ mandat ta’ arrest,
-
in-natura tar-reat, u
-
deskrizzjoni taċ-ċirkostanzi.
META TAPPLIKA DIN ID-DEĊIŻJONI?
Ilha tapplika mit-28 ta’ Novembru 2014.
SFOND
* TERMINI EWLENIN
Proċedura ta' konsenja: proċedura li tippermetti lil pajjiż jikkonsenja persuna lejn pajjiż ieħor għall-finijiet tat-tmexxija ta’ azzjoni kriminali jew l-esekuzzjoni ta’ piena ta’ kustodja jew żmien f’detenzjoni.
Kriminalità doppja: il-ħtieġa li r-reat ikkonċernat ikun reat kemm fil-pajjiż li fih is-suspettat ikun qed jinżamm kif ukoll fil-pajjiż li jixtiequ jgħaddi għandu biex jidher quddiem il-qorti.
DOKUMENT EWLIENI
Id-Deċiżjoni tal-Kunsill 2014/835/UE tas-27 ta’ Novembru 2014 dwar il-konklużjoni ta' Ftehim bejn l-Unjoni Ewropea u r-Repubblika tal-Islanda u r-Renju tan-Norveġja dwar il-proċedura ta' konsenja bejn l-Istati Membri tal-Unjoni Ewropea u l-Islanda u n-Norveġja (ĠU L 343, 28.11.2014, pp. 1-2)
l-aħħar aġġornament 24.10.2016