Strateġija Ewropea tal-ġustizzja elettronika

Din l-istrateġija l-ġdida tenfasizza l-importanza li qiegħda tikber tat-teknoloġija tal-informazzjoni u tal-komunikazzjoni (ICT) bħala mod kif tiżdied l-effiċjenza tal-proċessi legali u tal-awtoritajiet fost il-pajjiżi tal-UE. Tibbaża fuq xogħol diġà mibdi, inkluż il-portal tal-ġustizzja elettronika - punt ta' aċċess waħdieni, multilingwi, faċli biex jintuża għas-sistema kollha tal-ġustizzja elettronika Ewropea - u l-ewwel pjan ta' azzjoni tal-ġustizzja elettronika multiannwali (2009-2013).

ATT

Pjan ta' Azzjoni Multiannwali Ewropew tal-Ġustizzja elettronika 2014-2018 (Ġurnal Uffiċjali C 182 tal-14 ta' Ġunju 2014, pp. 2-13)

SOMMARJU

X’TAGĦMEL DIN L-ISTRATEĠIJA?

Tenfasizza l-benefiċċji tal-ġustizzja elettronika Ewropea b'mod speċjali fir-rigward ta' każijiet fejn ikunu involuti żewġ pajjiżi tal-UE. Dawn jinkludu:

—	aċċess aħjar għall-ġustizzja u għall-informazzjoni ġudizzjarja għal kulħadd;

—	kooperazzjoni aħjar bejn l-awtoritajiet ġudizzjarji tal-pajjiżi tal-UE;

—	ir-rispett għall-indipendenza u d-diversità tas-sistemi ġudizzjarji tal-pajjiżi u għad-drittijiet fundamentali.

Kisbiet prinċipali tal-ġustizzja elettronika

—	Proġetti pilota fost pajjiżi tal-UE, eż. e-CODEX (skambju sikur ta' data legali);

—	Interkonnessjoni tad-databases nazzjonali (interkonnessjoni tar-reġistri ta' insolvenza, sib avukat, sib nutar, eċċ.);

—	Vidjokonferenzi fi proċeduri ġudizzjarji;

—	netwerk ġudizzjarju Ewropew/atlas ġudizzjarju;

—	identifikatur tal-każistika Ewropea (ECLI).

Prinċipji ġenerali

Il-Ġustizzja elettronika Ewropea hija konsistenti mal-qafas ġenerali tal-Gvern elettroniku u l-qafas Ewropew tal-interoperabilità , u hija bbażata fuq dawn il-prinċipji:

—	azzjoni volontarja;

—	deċentralizzazzjoni;

—	interoperabilità (jiġifieri l-abilità tas-sistemi tal-ICT u tal-proċessi tan-negozju li huma jappoġġaw sabiex jiskambjaw dejta u sabiex jippermettu l-kondiviżjoni tal-informazzjoni u l-għarfien);

—	dimensjoni Ewropea (liġi ċivili, kriminali, amministrattiva).

Tisħiħ tal-istrateġija

L-istrateġija tal-ġustizzja elettronika 2014-2018 titlob li jkun hemm aktar żvilupp ta':

—	il-portal tal-ġustizzja elettronika (inkluż il-kontenut tal-liġi tal-UE u tal-liġi nazzjonali tal-pajjiżi tal-UE);

—	interoperabilità (rabtiet bejn awtoritajiet, professjonisti, pubbliku ġenerali u negozji relevanti);

—	użu konsistenti tal-ICT mal-leġiżlazzjoni tal-UE l-ġdida;

—	protezzjoni ta’ data personali;

—	interkonnessjoni mar-reġistri nazzjonali;

—	netwerks tal-ġustizzja elettronika;

—	kooperazzjoni tal-professjonisti legali;

—	mekkaniżmi għall-provvediment ta' traduzzjonijiet;

—	finanzjament adegwat fil-livell tal-UE.

L-istrateġija tal-Ġustizzja elettronika l-ġdida hija appoġġata minn pjan ta' azzjoni multiannwali 2014-2018, li jistabbilixxi mekkaniżmu ta' prijorità għall-implimentazzjoni tal-proġetti tal-ġustizzja elettronika ġodda u għaddejjin kollha.

Tħassib imqajjem mill-istrateġija rigward il-protezzjoni tad-dejta personali ilu jiġi indirizzat sa mill-adozzjoni tad-deċiżjoni tal-Kummissjoni Ewropea tal-5 ta' Ġunju 2014. Dan l-istrument legali jirregola eżattament fejn il-Kummissjoni għandha responsabilitajiet bħala kontrollur tad-dejta.

Għal aktar tagħrif, ara s-sit elettroniku tal-Ġustizzja elettronika Ewropea fuq is-sit elettroniku tal-Kummissjoni Ewropea.

ATTI RELATATI

Abbozz ta' strateġija dwar il-Ġustizzja elettronika Ewropea 2014-2018 (Ġurnal Uffiċjali L 376 tal-21 ta' Diċembru 2013, pp. 7-11).

Id-Deċiżjoni tal-Kummissjoni 2014/333/UE tal-5 ta' Ġunju 2014 dwar il-protezzjoni tad-dejta personali fil-Portal Ewropew tal-Ġustizzja Elettronika (ĠU L 167 tas-6 ta' Ġunju 2014, pp. 57-60).

Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni - Lejn strateġija Ewropea tal-ġustizzja elettronika (KUMM(2008) 329 finali tat-30 ta' Mejju 2008).

L-aħħar aġġornament: 23.07.2015