Il-liġi applikabbli għad-divorzju u s-separazzjoni legali

SOMMARJU TA’:

Regolament tal-Kunsill (UE) Nru 1259/2010 li jimplimenta kooperazzjoni msaħħa fil-qasam tal-liġi applikabbli għad-divorzju u għas-separazzjoni legali

X’INHU L-GĦAN TAR-REGOLAMENT?

Huwa jistabbilixxi sett wieħed ta’ regoli sabiex jiġi ddeterminat liema liġi nazzjonali għandha tapplika għal proċedimenti għad-divorzju u għas-separazzjoni legali li jinvolvu konjuġi li huma ta’ nazzjonalità differenti, jgħixu f’pajjiż differenti mill-pajjiż tan-nazzjonalità tagħhom jew li m’għadhomx jgħixu fl-istess Stat Membru tal-Unjoni Ewropea (UE).
Dan jikkumplimenta r-Regolament (KE) Nru 2201/2003 (ara s-sommarju), li jistabbilixxi regoli sabiex jiġi ddeterminat f’liema qorti trid titressaq applikazzjoni għad-divorzju jew għas-separazzjoni legali.

PUNTI EWLENIN

Pajjiżi parteċipanti

Ir-regolament japplika għal 17-il Stat Membru li jipparteċipaw fil-kooperazzjoni msaħħa dwar dan l-aspett: Il-Belġju, il-Bulgarija, il-Ġermanja, l-Estonja, il-Greċja, Spanja, Franza, l-Italja, il-Latvja, il-Litwanja, il-Lussemburgu, l-Ungerija, Malta, l-Awstrija, il-Portugall, ir-Rumanija u s-Slovenja.

Stati Membri oħrajn jistgħu jissieħbu fi kwalunkwe mument.

Meta jibda japplika r-Regolament?

Dan japplika meta jkun hemm kunflitt ta’ liġijiet nazzjonali f’każijiet ta’ divorzju u ta’ separazzjoni legali, jiġifieri meta jistgħu japplikaw diversi liġijiet nazzjonali għall-istess divorzju jew separazzjoni legali (pereżempju, il-liġi nazzjonali tal-pajjiż tan-nazzjonalità tal-konjuġi, jew il-liġi nazzjonali tal-pajjiż fejn jinsab il-post ewlieni ta’ residenza tagħhom).

Ma japplikax għal kwistjonijiet li jinvolvu:

il-kapaċità ġuridika ta’ persuni naturali;
l-eżistenza, il-validità jew ir-rikonoxximent ta’ żwieġ;
l-annullament ta’ żwieġ;
l-isem tal-konjuġi;
il-konsegwenzi taż-żwieġ fuq il-proprjetà;
ir-responsabbiltà tal-ġenituri;
l-obbligi ta’ manteniment;
trusts u suċċessjonijiet.

Għażla tal-liġi

Il-konjuġi jistgħu jilħqu ftehim formali billi jagħżlu liema liġi nazzjonali se tapplika għad-divorzju jew għas-separazzjoni legali tagħhom sakemm din tkun jew il-liġi:

tal-pajjiż fejn il-konjuġi jkollhom il-post ta’ residenza ewlieni tagħhom fiż-żmien tal-konklużjoni tal-ftehim; jew
tal-pajjiż fejn il-konjuġi kellhom l-aħħar post ta’ residenza ewlieni tagħhom, sakemm wieħed minnhom ikun għadu jirrisjedi hemmhekk fiż-żmien tal-konklużjoni tal-ftehim; jew
tal-pajjiż tan-nazzjonalità ta’ kwalunkwe konjuġi fiż-żmien tal-konklużjoni tal-ftehim; jew
tal-pajjiż fejn jitressaq il-każ.

Ftehim bejn il-konjuġi jista’ jsir u jinbidel fi kwalunkwe mument sal-mument meta l-każ jitressaq quddiem il-qorti.

Meta ma ssir l-ebda għażla ta’ liġi

Jekk il-konjuġi ma jagħżlux il-liġi li għandha tapplika għad-divorzju jew għas-separazzjoni legali tagħhom, il-każ se jkun soġġett għal-liġi tal-pajjiż:

1.
fejn il-konjuġi għandhom ir-residenza ewlenija tagħhom fil-mument meta l-każ jitressaq quddiem il-qorti; jew, jekk le
2.
fejn il-konjuġi kellhom l-aħħar residenza ewlenija tagħhom, sakemm il-perjodu ta’ residenza ma jkunx intemm aktar minn sena qabel il-każ tressaq quddiem il-qorti, sakemm wieħed mill-konjuġi jkun għadu jirrisjedi f’dak il-pajjiż fil-mument li l-każ jitressaq quddiem il-qorti; jew, jekk le
3.
li huma ċittadini tiegħu iż-żewġ konjuġi fil-mument li l-każ jitressaq quddiem il-qorti; jew, jekk le
4.
fejn jitressaq il-każ.

Jekk il-liġi nazzjonali applikabbli għall-każ ma tinkludix liġi dwar id-divorzju jew ma tagħtix aċċess ugwali għad-divorzju jew għas-separazzjoni legali lil wieħed mill-konjuġi għal raġunijiet tas-sess tiegħu jew tagħha, tapplika l-liġi tal-pajjiż fejn jitressaq il-qorti.

MINN META JAPPLIKA R-REGOLAMENT?

Ilu japplika mill-21 ta’ Ġunju 2012.

SFOND

Żewġ regolamenti oħra stipulaw regoli biex tiġi stabbilita l-liġi applikabbli fejn ikun hemm kunflitt ta’ liġijiet nazzjonali. Ir-Regolament (KE) Nru 593/2008 (ara s-sommarju) japplika għal obbligazzjonijiet kuntrattwali, filwaqt li r-Regolament (KE) Nru 864/2007 (ara s-sommarju) jkopri obbligazzjonijiet mhux kuntrattwali li jeskludu r-relazzjonijiet tal-familja u r-responsabbiltà ta’ Stat.

Ir-Regolament Nru 1259/2010, li fih regoli dwar il-liġi applikabbli għad-divorzju u għas-separazzjoni legali, ġie adottat permezz ta’ kooperazzjoni msaħħa sabiex jikkomplementa r-Regolament (KE) Nru 2201/2003, li fih regoli dwar il-ġurisdizzjoni u r-rikonoxximent u l-infurzar fir-rigward tad-divorzju u s-separazzjoni legali (kif ukoll dwar kwistjonijiet ta’ responsabbiltà tal-ġenituri).

Għal aktar informazzjoni, ara:

Divorzju u separazzjoni — Informazzjoni dwar il-liġi tad-divorzju applikabbli f’każijiet ta’ koppji internazzjonali fl-UE (Kummissjoni Ewropea)
Divorzju u separazzjoni legali (YourEurope).

DOKUMENT EWLIENI

Regolament tal-Kunsill (UE) Nru 1259/2010 tal-20 ta’ Diċembru 2010 li jimplimenta kooperazzjoni msaħħa fil-qasam tal-liġi applikabbli għad-divorzju u għas-separazzjoni legali (ĠU L 343, 29.12.2010, pp. 10-16)

DOKUMENTI RELATATI

Ir-Regolament tal-Kunsill (UE) 2019/1111 tal-25 ta’ Ġunju 2019 dwar il-ġurisdizzjoni, ir-rikonoxximent u l-infurzar ta’ deċiżjonijiet fi kwistjonijiet matrimonjali u kwistjonijiet ta’ responsabbiltà tal-ġenituri, u dwar sekwestru internazzjonali ta’ minuri (ĠU L 178, 2.7.2019, pp. 1-115)

Deċiżjoni tal-Kummissjoni (UE) 2016/1366 tal-10 ta’ Awwissu 2016 li tikkonferma l-parteċipazzjoni tal-Estonja fil-kooperazzjoni msaħħa fil-qasam tal-liġi applikabbli għad-divorzju u għas-separazzjoni legali (ĠU L 216, 11.8.2016, pp. 23-25)

Deċiżjoni tal-Kummissjoni 2014/39/UE tas-27 ta’ Jannar 2014 li tikkonferma l-parteċipazzjoni tal-Greċja fil-kooperazzjoni msaħħa fil-qasam tal-liġi applikabbli għad-divorzju u għas-separazzjoni legali (ĠU L 23, 28.1.2014, pp. 41-42)

Deċiżjoni tal-Kummissjoni 2012/714/UE tal-21 ta’ Novembru 2012 li tikkonferma l-parteċipazzjoni tal-Litwanja fil-kooperazzjoni msaħħa fil-qasam tal-liġi applikabbli għad-divorzju u s-separazzjoni legali (ĠU L 323, 22.11.2012, pp. 18-19)

Ir-Regolament tal-Kunsill (KE) Nru 2201/2003 tas-27 ta’ Novembru 2003 dwar il-ġurisdizzjoni u r-rikonoxximent u l-infurzar ta’ sentenzi fi kwistjonijiet matrimonjali u kwistjonijiet ta’ responsabbilità tal-ġenituri, u li jirrevoka r-Regolament (KE) Nru 1347/2000 (ĠU L 338, 23.12.2003, pp. 1-29)

Emendi suċċesivi u korrezzjonijiet għar-Regolament (KE) Nru 2201/2003 ġew inkorporati fit-test bażiku. Din il-verżjoni kkonsolidata hija biss għal finijiet ta’ referenza.

l-aħħar aġġornament 03.06.2021