Kondizzjonijiet tal-għajxien għal dawk li jfittxu ażil – regoli tal-UE

SOMMARJU TAD-DOKUMENT:

Direttiva 2013/33/UE dwar l-istandards dwar l-akkoljenza ta’ applikanti għall-protezzjoni internazzjonali

X’INHU L-GĦAN TA’ DIN ID-DIRETTIVA?

• Hija toħloq regoli tal-Unjoni Ewropea (UE) dwar il-kondizzjonijiet tal-għajxien (jew “l-akkoljenza”) ta’ applikanti għall-protezzjoni internazzjonali* (dawk li jfittxu ażil jew persuni li qed ifittxu protezzjoni sussidjarja*) li qed jistennew li l-applikazzjoni tagħhom tiġi eżaminata. Dawn ir-regoli għandhom jgħinu jipprevjenu lill-persuni milli jiċċaqilqu lejn pajjiżi differenti minħabba varjazzjonijiet fil-kondizzjonijiet tal-għajxien.
• Hija għandha l-għan li tiggarantixxi standard ta’ ħajja dinjituż għal dawk li jfittxu ażil u tiżgura li d-drittijiet tal-bniedem jiġu rispettati.

PUNTI EWLENIN

Min hu affettwat?

Id-direttiva tapplika għall-applikanti għall-protezzjoni internazzjonali u l-familji tagħhom, inkluż:

• il-konjuġi jew is-sieħeb/sieħba mhux miżżewweġ/miżżewġa
• it-tfal tagħhom taħt it-18-il sena
• membri oħra tal-familja (eż. missier jew omm l-applikant jekk l-applikant huwa taħt it-18-il sena).

Kondizzjonijiet ta’ akkoljenza standard għall-UE kollha

Id-direttiva għandha l-għan li tarmonizza l-kundizzjonijiet tal-akkoljenza madwar l-UE. Dawn il-kondizzjonijiet jinkludu:

• l-aċċess għal akkomodazzjoni,
• ikel, ħwejjeġ,
• konċessjonijiet finanzjarji,
• standard ta’ ħajja deċenti, u
• kura medika u psikoloġika.

Garanziji oħra

Minbarra l-kondizzjonijiet bażiċi tal-akkoljenza, il-pajjiżi tal-UE għandhom jiżguraw li l-applikanti jistgħu jaċċessaw:

• impjieg fi żmien 9 xhur
• edukazzjoni għat-tfal taħt it-18-il sena.

Persuni vulnerabbli

• Għandha ssir stima individwali biex jiġu evalwati l-ħtiġijiet ta’ persuni vulnerabbli (tfal, persuni b’diżabilità jew vittmi ta’ abbuż).
• Japplikaw regoli speċifiċi għat-tfal, tfal mhux akkumpanjati u vittmi ta’ tortura u vjolenza.
• Persuni vulnerabbli li jfittxu ażil għandu jkollhom aċċess għall-kura psikoloġika.
• Meta tfal mhux akkumpanjati japplikaw għall-ażil, huma għandhom jingħataw rappreżentant kwalifikat biex jgħinhom. L-aħjar interessi tat-tfal u tal-għaqda tal-familja dejjem għandhom jingħataw prijorità.

Id-detenzjoni ta’ persuni li qed ifittxu l-ażil

L-applikanti m’għandhomx jinżammu sempliċiment għaliex qed ifittxu l-protezzjoni internazzjonali. Id-detenzjoni għandha tkun miżura aħħarija, u għandha tiġi deċiża fuq bażi ta’ każ b’każ.

Ġiet adottata lista eżawrjenti ta’ raġunijiet ta’ detenzjoni, biex tiġi evitata detenzjoni arbitrarja.

id-direttiva barra minn hekk:

• tillimita l-perjodi ta’ detenzjoni
• tillimita d-detenzjoni ta’ persuni vulnerabbli, speċjalment it-tfal
• toffri garanziji legali (eż. aċċess għall-assistenza legali, informazzjoni bil-miktub meta tkun qed tappella ordni ta’ detenzjoni)
• tintroduċi kondizzjonijiet speċifiċi ta’ akkoljenza għall-faċilitajiet ta’ detenzjoni, bħall-aċċess għal spazji fil-beraħ u kuntatt ma’ avukati, organizzazzjonijiet mhux governattiv u membri tal-familja.

Id-Direttiva 2013/33/UE tħassar id-Direttiva 2003/9/KE b'effett mill-21 ta’ Lulju 2015.

META TAPPLIKA DIN ID-DIRETTIVA?

Din ilha tapplika mid-19 ta’ Lulju 2013. Il-pajjiżi tal-UE kellhom jinkorporawha fil-liġi nazzjonali sal-21 ta’ Lulju 2015.

SFOND

L-UE qed taħdem lejn il-ħolqien ta’ sistema komuni Ewropea tal-ażil (CEAS). Sa mill-2013, ġew adottati serje ta’ testi legali biex itejbu l-ħidma tas-CEAS.

Wara t-tifqigħa tal-COVID-19 u l-introduzzjoni ta’ miżuri biex tindirizza l-impatt tal-kriżi, il-Kummissjoni Ewropea adottat: Komunikazzjoni tal-Kummissjoni COVID-19: Gwida dwar l-implimentazzjoni tad-dispożizzjonijiet rilevanti tal-UE fil-qasam tal-proċeduri tal-asil u tar-ritorn u dwar ir-risistemazzjoni

* TERMINI EWLENIN

DOKUMENT EWLIENI

Direttiva 2013/33/UE tal-Parlament Ewropew u tal-Kunsill tas-26 ta’ Ġunju 2013 li tistabbilixxi l-istandards dwar l-akkoljenza ta’ applikanti għall-protezzjoni internazzjonali (ĠU L 180, 29.6.2013, pp. 96-116)

DOKUMENT RELATAT

Direttiva tal-Kunsill 2003/9/KE tas-27 ta’ Jannar 2003 li tistabbilixxi l-istandards minimi dwar l-akkoljenza ta’ dawk li jfittxu ażil (ĠU L 31, 6.2.2003, pp. 18–25)

l-aħħar aġġornament 25.05.2020