Tnaqqis ta’ tniġġis ikkawżat minn skart mill-industrija tad-diossidu tat-titanju

Il-leġiżlazzjoni tal-UE dwar it-tniġġis ikkawżat minn skart mill-industrija tad-diossidu tat-titanju issa hija rregolata mid-Direttiva 2010/75(UE) dwar l-emissjonijiet industrijali (il-prevenzjoni u l-kontroll integrati tat-tniġġis).

ATT

Direttiva 2010/75/UE tal-Parlament Ewropew u tal-Kunsill tal-24 ta’ Novembru 2010 dwar l-emissjonijiet industrijali (il-prevenzjoni u l-kontroll integrati tat-tniġġis).

SOMMARJU

L-iskart tad-disossidu tat-titanju jista’ jwassal għal tniġġis serju tal-arja u l-ilma. Għal din ir-raġuni, id-Direttiva 2010/75/UE tiddedika kapitolu speċifiku għall-iskart tad-diossidu tat-titanju u tistabbilixxi valuri limitu stretti għall-emissjonijiet.

Projbizzjoni tar-rimi ta’ skart

Il-forom ta’ skart segwenti m’għandhomx jintremew fl-ilma, baħar jew oċean:

• skart solidu;
• il-likuri omm li jirriżultaw mill-fażi ta’ filtrazzjoni wara l-idroliżi tas-soluzzjoni tas-sulfat tat-titanil minn installazzjonijiet li japplikaw il-proċess tas-sulfat (li kumplessivament ikollu aktar minn 0.5 % aċidu sulfiriku ħieles);
• skart minn installazzjonijiet li japplikaw il-proċess tal-klorur (li jkun fih aktar minn 0.5 % aċidu idrokloriku ħieles u diversi metalli tqal);
• melħ tal-filtrazzjoni, ħama u skart likwidu li jirriżulta mit-trattament tal-iskart li japplika ż-żewġ proċessi msemmija hawn fuq u li jkun fih diversi metalli tqal, iżda ma jindkludix skart newtralizzat u ffiltrat jew imferra’ li jkun fih biss traċċi ta’ metall tqil u li, qabel kull taħlit, ikollu valur ta’ pH ta’ aktar minn 5.5.

Kontroll tal-emissjonijiet fl-ilma

Valuri limitu huma stabbiliti għall-emissjonijiet fl-ilma (Anness VII, Parti 1).

Prevenzjoni u kontroll ta’ emissjonijiet fl-arja

L-emissjoni ta’ qtar aċiduż mill-installazzjonijiet għandha tiġi evitata.

Valuri limitu huma stabbiliti għall-emissjonijiet fl-arja (Anness VIII, Parti 2).

Monitoraġġ ta’ emissjonijiet

L-Istati Membri tal-UE għandhom jiżguraw li jitwettaq monitoraġġ tal-emissjonijiet fl-ilma u fl-arja u li l-kundizzjonijiet stabbiliti fil-permess għall-operat tal-installazzjoni jiġu ssodisfati bis-sħiħ (pereżempju jittieħdu miżuri preventivi kontra t-tniġġis; l-aqwa tekniki disponibbli (BATs) jiġu applikati, l-iskart jitnaqqas, jiġi rriċiklat jew mormi bl-inqas mod li jniġġes; l-effiċjenza enerġetika tiġi massimizzata, eċċ.)

Il-monitoraġġ għandu jitwettaq skont l-istandards CEN (jew standards oħra rikonoxxuti li jiżguraw il-forniment ta’ dejta ta’ kwalità xjentifika ekwivalenti). Speċifikazzjonijiet dwar il-proċess ta’ monitoraġġ huma inklużi fl-Anness VII, Parti 3.

L-aħħar aġġornament: 11.08.2014