Regoli ta’ kontabbiltà għall-gassijiet b’effett serra emessi jew assorbiti mill-foresti u l-agrikoltura
SOMMARJU TAD-DOKUMENT:
Deċiżjoni Nru 529/2013/UE — regoli tal-kontabilità dwar emissjonijiet ta' gassijiet serra u tneħħijiet li jirriżultaw mill-użu tal-art, tibdil fl-użu tal-art u forestrija
X'INHU L-GĦAN TAD-DEĊIŻJONI?
-
Hija l-ewwel pass lejn l-inkorporazzjoni tal-emissjonijiet u l-assorbimenti tal-gassijiet b’effett serra (GHG) mill-użu tal-art, mit-tibdil fl-użu tal-art u mill-forestrija (LULUCF)* fl-impenji tal-Unjoni Ewropea (UE) rigward it-tnaqqis tal-emissjonijiet tal-GHG.
-
Tobbliga lill-pajjiżi tal-UE sabiex iħejju u jżommu rendikonti tal-GHG emessi jew assorbiti mill-foresti, mir-raba’ u mill-mergħat b’mod preċiż, komplet, konsistenti, komparabbli u trasparenti skont il-Linji Gwida għall-Inventarji Nazzjonali tal-Gassijiet b’Effett Serra tal-Grupp ta’ Esperti Internazzjonali dwar it-Tibdil fil-Klima (IPCC).
-
Kontabbiltà u rappurtar aktar kompleti tal-GHG itejbu l-integrità ambjentali tal-UE (jiġifieri l-iżgurar tal-felħan, diversità u l-purità tal-ekosistemi tagħha).
PUNTI EWLENIN
-
Fil-perjodu attwali tal-kontabilità (2013-2020), sejjer ikun hemm rappurtar u kontabbiltà obbligatorji mill-pajjiżi tal-UE għall-emissjonijiet/assorbimenti tal-GHG minn:
-
afforestazzjoni (tħawwil ta’ foresti ġodda);
-
deforestazzjoni (il-qerda tal-foresti);
-
riforestazzjoni (ir-ripopolazzjoni tal-foresti eżistenti); u
-
· l-immaniġġjar tal-foresti
-
Il-pajjiżi tal-UE għandhom iħejju għal kontabbiltà preċiża tal-emissjonijiet/assorbimenti tal-GHG mir-raba’ u mill-mergħat, illi sejrin jibdew mill-2021.
-
Il-pajjiżi tal-UE għandhom jiġu mħeġġa wkoll sabiex jirrapportaw dwar kif ir-riveġetazzjoni (it-tkabbir tal-veġetazzjoni fuq art mhux ikkunsidrata bħala foresta) u l-ixxottar jew it-tixrib mill-ġdid tal-artijiet mistagħdra jaffettwaw l-emissjonijiet/assorbimenti tal-GHG.
Id-Deċiżjoni Nru 529/2013/UE ġiet emendata bid-Deċiżjoni (UE) 2016/374, li żżid valuri għall-Kroazja għal-listi ta' livelli ta' referenza għall-ġestjoni tal-foresti, valuri minimi għad-definizzjoni ta' foresta u sena bażi tal-emissjonijiet.
META TAPPLIKA D-DEĊIŻJONI?
Ilha tapplika mit-8 ta’ Lulju 2013.
SFOND
-
Il-foresti u l-artijiet agrikoli jkopru ’l fuq minn 75 fil-mija tal-UE. Il-ħamrija, il-pjanti, is-siġar u l-materjali organiċi mnisslin minnhom (bijomassa), li jimlew dan it-territorju vast, għandhom il-kapaċità li jaqbdu u jaħżnu ħażniet kbar ta’ karbonju.
-
Attivitajiet bħad-deforestazzjoni, il-ħrit u l-iskular jistgħu jarmu GHGs fl-atmosfera billi jfixklu l-istokks tal-karbonju maħżuna fil-foresti, fil-ħamrija u fl-artijiet mistagħdra.
-
Għalhekk, huwa importanti li dan is-settur jiġi inkluż fil-kejl tat-tnaqqis tal-emissjonijiet tal-UE.
Għal aktar tagħrif, ara:
* TERMINI EWLENIN
LUCUCF (l-użu tal-art, it-tibdil fl-użu tal-art u l-forestrija): terminu jkopri l-emissjonijiet tal-GHG fl-atmosfera u t-tneħħija tal-karbonju mill-atmosfera li jirriżultaw mill-użu tal-ħamrija, siġar, pjanti, bijomassa u injam.
DOKUMENT EWLIENI
Deċiżjoni Nru 529/2013/UE tal-Parlament Ewropew u tal-Kunsill tal-21 ta' Mejju 2013 dwar regoli tal-kontabilità dwar l-emissjonijiet u l-assorbimenti tal-gassijiet serra li jirriżultaw mill-attivitajiet relatati mal-użu tal-art, mat-tibdil fl-użu tal-art u mal-forestrija u dwar informazzjoni li tikkonċerna l-azzjonijiet relatati ma' dawk l-attivitajiet (ĠU L 165, 18.6.2013, pp. 80–97).
Emendi suċċessivi għar-Regolament (UE) Nru 236/2014 ġew inkorporati fit-test oriġinali. Din il-verżjoni kkonsolidata għandha valur dokumentarju biss.
l-aħħar aġġornament 30.08.2016